পুনৰ জ্বলিছে মণিপুৰ। মণিপুৰৰ বিধায়ক আৰু মুখ্যমন্ত্ৰীৰ বাসগৃহত সংঘটিত হয় হৈছে আক্ৰমণ।
এনে পৰিস্থিতিত কেন্দ্ৰীয় গৃহমন্ত্ৰী অমিত শ্বাহে নিজৰ সকলো নিৰ্বাচনী প্ৰচাৰ বাতিল কৰে।
সূত্ৰ অনুসৰি তেওঁ মহাৰাষ্ট্ৰত অনুষ্ঠিত হোৱা সকলো প্ৰচাৰ সভা বাতিল কৰি দিল্লীলৈ উভতি আহে।
যোৱা ৬ মে’ত জিৰিবাম জিলাৰ এজন নাগৰিকৰ মৃতদেহ উদ্ধাৰ হোৱাৰ পৰাই মণিপুৰত সৃষ্টি হৈছে আন এক হিংসাৰ অধ্যায়।
২৪ ঘণ্টাৰ ভিতৰত দোষীক গ্ৰেপ্তাৰ কৰাৰ দাবীত প্ৰায় সমগ্ৰ ৰাজ্যতে মেটেই লোকসকলে প্ৰতিবাদ আৰম্ভ কৰিছে। সেই প্ৰতিবাদ শনিবাৰে নিশা অধিক গুৰুতৰ হৈ পৰে।
মুখ্যমন্ত্ৰী এন বীৰেণ সিঙৰ ঘৰত আক্ৰমণ চলাইছে উত্তেজিত জনসাধাৰণে। দুৱাৰ ভাঙি মুখ্যমন্ত্ৰীৰ বাসগৃহত প্ৰৱেশ কৰাৰ চেষ্টা কৰে প্ৰতিবাদকাৰীয়ে। পৰিস্থিতি নিয়ন্ত্ৰণৰ বাহিৰলৈ যোৱাৰ লগে লগে আৰক্ষীয়ে কন্দুৱা গেছ নিক্ষেপ কৰে। অৱশ্যে আক্ৰমণৰ সময়ত মুখ্যমন্ত্ৰীগৰাকী বাসগৃহত নাছিল বুলি জানিব পৰা গৈছে।
কেৱল মুখ্যমন্ত্রীকে নহয়, তেওঁৰ কেবিনেট মন্ত্রীসকলৰ কেইবাজনৰো বাসগৃহত আন্দোলনকাৰী ৰাইজে আক্রমণ কৰে৷ শনিবাৰে বিয়লিৰ পিছত সমগ্ৰ ইম্ফলত জাৰি কৰা হয় কাৰ্ফিউ। সেনা, অসম ৰাইফলছ আৰু মণিপুৰ আৰক্ষীৰ নিৰাপত্তাৰক্ষীয়ে প্ৰতিবাদ বন্ধ কৰিব পৰা নাই।
সূত্ৰ অনুসৰি প্ৰতিবাদী লোক সকলে মুখ্যমন্ত্ৰীৰ জোঁৱাই তথা বিজেপিৰ বিধায়ক আৰ কে ইমো, স্বাস্থ্য আৰু পৰিয়াল কল্যাণ মন্ত্ৰী সপম ৰঞ্জন আৰু গ্ৰাহক পৰিক্ৰমা মন্ত্ৰী এল সুসিন্দ্ৰ সিঙৰ ঘৰত আক্ৰমণ চলায়। আৰক্ষীৰ সূত্ৰ অনুসৰি শনিবাৰে নিশা মুঠ ৮জন লোক আহত হয়।
এনে পৰিস্থিতিত কেন্দ্ৰীয় গৃহমন্ত্ৰীয়ে নিৰ্বাচনী প্ৰচাৰ কৰ্তন কৰিছে। দেওবাৰে বিদৰ্ভত প্ৰচাৰ চলোৱাৰ কথা আছিল। কিন্তু সেই নিৰ্বাচনী সভা বাতিল কৰি নাগপুৰৰ পৰা দিল্লীলৈ উৰা মাৰিলে।
শ্বাহৰ সলনি স্মৃতি ইৰানী আৰু শিৱৰাজ সিং চৌহানে তাত প্ৰচাৰ চলাব।
উল্লেখযোগ্য যে মণিপুৰৰ হিংসাত্মক পৰিস্থিতিৰ বাবেই কৰ্ণাটকৰ নিৰ্বাচনী প্ৰচাৰ বাতিল কৰিছিল অমিত শ্বাহে।
