অবাধ্য ঐশ্বৰ্য, ফল ভূগিলে অভিষেকে! কন্যা শ্বেতাক বিশাল সম্পত্তি উপহাৰ দিলে অমিতাভে
কিংবদন্তি অভিনেতা অমিতাভ বচ্চন বাৰে বাৰে বিভিন্ন বিষয়ত চৰ্চালৈ আহে। কিন্তু কেইবাদিনো ধৰি পাৰিবাৰিক নানা ঘটনা পোহৰলৈ অহাৰ পিছত তেওঁ আৰু অধিক চৰ্চালৈ আহিছে। শেহতীয়াকৈ তেওঁ কন্যা শ্বেতা বচ্চনক জুহুৰ বাংলো ‘প্ৰতীক্ষা’ উপহাৰ দিছে।
বাতৰি অনুসৰি, যোৱা ৮ নৱেম্বৰত এখন উপহাৰৰ দলিল স্বাক্ষৰিত হয় আৰু ৫০.৬৫ লাখ টকা প্ৰদান কৰা হয়। এই বাংলোটো বিঠাল নগৰ সমবায় গৃহ নিৰ্মাণ সমিতিৰ অন্তৰ্গত। এইটো দুটা প্লটেৰে গঠিত।
সূত্ৰ অনুসৰি প্লট দুটাৰ আয়তন প্ৰায় ৮৯০.৪৭ বৰ্গমিটাৰ আৰু ৬৭৪ বৰ্গমিটাৰ। আৰু সেই সম্পত্তিৰ মূল্য প্ৰায় ৫০ কোটি টকা। ‘প্ৰতীক্ষা’ অমিতাভ বচ্চনৰ ঘৰ ‘জলচা’ৰ পৰা মাত্ৰ এক কিলোমিটাৰ দূৰত।
সংবাদ মাধ্যমৰ বাতৰি অনুসৰি অমিতাভ বচ্চনে প্ৰথমে ঘৰটো ক্ৰয় কৰিছিল। অভিনেতাগৰাকীয়ে পিতৃ-মাতৃ, কিংবদন্তি কবি হৰিবংশ ৰায় বচ্চন আৰু তেজী বচ্চনৰ সৈতে তাতেই বাস কৰিছিল। আৰু ঘৰটোৰ নামো কিংবদন্তি কবি অৰ্থাৎ অমিতাভ বচ্চনৰ পিতৃয়ে ৰাখিছিল।
জনপ্ৰিয় ৰিয়েলিটি শ্ব’ কৌন বনেগা কোৰপতিৰ চতুৰ্দশ ছিজনত অমিতাভ বচ্চনে ঘৰটোৰ বিষয়ে মুকলিকৈ কৈছিল। তেওঁ কয় যে এই নামটো মোৰ দেউতাই দিছিল আৰু দেউতাৰ কবিতাটোত এটা শাৰী আছে যত লিখা আছে, ‘সকলোৰে বাবে ইয়াত স্বাগতম নহয়, কোনো কোনোৰ বাবে প্ৰতীক্ষাও আছে’। এই ঘৰটো মুম্বাইত অতি জনপ্ৰিয়।
কন্যা শ্বেতা বচ্চনৰ সৈতে অমিতাভ বচ্চনৰ সম্পৰ্ক সদায় বহুত ভাল। ছোৱালীজনীক লৈ অতি গৌৰৱ অনুভৱ কৰে অভিনেতাগৰাকীয়ে। কিংবদন্তি অভিনেতাগৰাকীৰ জন্মদিনত শ্বেতাই ছ’চিয়েল মিডিয়াত পিতৃৰ সৈতে কিছু সুখৰ মুহূৰ্ত শ্বেয়াৰ কৰে। আৰু ইনষ্টাগ্ৰামত সকলোৱে সেয়া ভাল পাইছিল। এটা পোষ্টত লিখা আছিল, ‘৮১ বছৰীয়া জন্মদিনৰ শুভেচ্ছা দেউতা। প্ৰণাম। তোমাৰ ঠাই কোনেও কেতিয়াও পূৰণ কৰিব নোৱাৰে।’
জন্মদিনৰ অনুষ্ঠানৰ পৰা আন এখন ছবি শ্বেয়াৰ কৰি শ্বেতা বচ্চন নন্দাই লিখিছে, ‘তুমি সদায় প্ৰেমেৰে পৰিবেষ্টিত হৈ থাকা।’
অৱশ্যে কেইবাদিনো ধৰি শুনা গৈছে যে ঐশ্বৰ্যৰ সৈতে বচ্চন পৰিয়ালৰ বহুখিনি সমস্যা চলি আছে। বচ্চন বোৱাৰী ‘জলচা’তো নাথাকে। ইয়াৰ মাজতে এই খবৰে আকৌ নতুন চৰ্চা আৰম্ভ কৰিলে।