যোৱা এবছৰ ধৰি কৃষকৰ সমস্যাক লৈ মৌন হৈ থকা পঞ্জাৱ কংগ্ৰেছৰ নেতা তথা প্ৰাক্তন ক্ৰিকেটাৰ নৱজোত সিং সিদ্ধুৱে আজি কৃষি বিধেয়কৰ বিৰুদ্ধে ধৰ্ণাত বহিব।
১১.৩০ বজাত আৰম্ভ হ’বলগীয়া ধৰ্ণা কাৰ্যসূচী অমৃতসৰৰ হল গেটত ৰূপায়ণ কৰা হ’ব। তদুপৰি ভণ্ডাৰি দলঙৰ পৰা হল গেটলৈকে এটা ৰেলী উলিওৱা হ’ব বুলিও জানিব পৰা গৈছে।
লোকসভাত কৃষি বিধেয়ক গৃহীত হোৱাৰ পিছতে সিদ্ধুৱে চৰকাৰৰ বিৰুদ্ধাচৰণ কৰি ইটোৰ পিছত সিটো অৰ্থাৎ দুটা টুইট কৰে।
প্ৰথমটো টুইটত সিদ্ধুৱে কয়, “বহু বছৰ ধৰি চৰকাৰে একেই ভুল কৰি আছে, বালি তেওঁলোকৰ মুখত আছিল, আইনা চাফা কৰি থাকিল”।
দ্বিতীয়টো টুইটত তেওঁ লিখে, “কৃষক পঞ্জাৱৰ আত্মা। শৰীৰৰ ঘাঁ ঠিক হৈ যায়, কিন্তু আত্মাৰ নহয়। আমাৰ অস্তিত্বৰ ওপৰত কৰা আক্ৰমণ সহ্য কৰা নহ’ব। পঞ্জাৱ, পাঞ্জাৱী আৰু প্ৰত্যেক পাঞ্জাৱী কৃষকৰ লগত আছে”.
উল্লেখ্য যে লোকসভা নিৰ্বাচনৰ পিছতে মন্ত্ৰিত্ব এৰা নৱজোত সিং সিদ্ধুৱে প্ৰায় এবছৰৰ মূৰত আজি ৰাজপথলৈ ওলাই আহি ধৰ্ণা কাৰ্যসূচীত অংশ ল’ব।
আনহাতে বিজেপি নেতৃত্বাধীন চৰকাৰে কৃষি বিধেয়ক উত্থাপন কৰাৰ পিছৰে পৰা পঞ্জাৱৰ কৃষকসকলে তীব্ৰ বিৰোধ প্ৰদৰ্শন কৰি আহিছে। সেয়ে ৰাজ্যখনৰ মুখ্য ৰাজনৈতিক দলসমূহে এই বিধেয়কৰ বিৰোধিতা কৰি আছে।
