প্ৰ’ষ্টেট গ্ৰন্থিৰ কৰ্কটৰোগ

আজি পুৰুষ দেহৰ প্ৰষ্টেট গ্ৰন্থিৰ কৰ্কটৰোগৰ বিষয়ে কিছু কথা জনাবলৈ লৈছোঁ। প্ৰষ্টেট গ্ৰন্থি পুৰুষ দেহৰ প্ৰজনন ব্যৱস্থাৰ এক অংশ৷ মূত্ৰস্থলীৰ (এই ঠাইত প্ৰস্ৰাৱ জমা হয় আৰু ইয়াৰে পৰা প্ৰস্ৰাৱ নিষ্কাষণ হয়) সঠিক তলত তথা ৰেক্টামৰ ঠিক আগফালে প্ৰষ্টেট গ্ৰন্থি অৱস্থিত। প্ৰষ্টেট গ্ৰন্থিটোৰ আকৃতি ঠিক আখৰোটটোৰ সমান আৰু ই প্ৰস্ৰাৱ নিষ্কাষণ হোৱা ইউথ্ৰেৰা নামৰ নলিকাৰ দ্বাৰা পৰিবেষ্টিত হৈ থাকে। প্ৰষ্টেট গ্ৰন্থিয়ে শুক্ৰাণুৰ কিছু অংশ তথা  শুক্ৰজল প্ৰস্তুত কৰে। এই প্ৰষ্টেট গ্ৰন্থিৰ কৰ্কটৰোগৰ কোষৰ সৃষ্টি হোৱা মানেই প্ৰষ্টেট গ্ৰন্থিটো কৰ্কটৰোগত আক্ৰান্ত হোৱা। এজন পুৰুষৰ বয়স বৃদ্ধিৰ লগে লগে প্ৰষ্টেট গ্ৰন্থিও ডাঙৰ হৈ গৈ থাকে এক নিৰ্দ্দিষ্ট মাত্ৰালৈ। কিন্তু কিছু পুৰুষৰ ক্ষেত্ৰত ই অধিক ডাঙৰ হৈ পৰি,প্ৰস্ৰাৱৰ গ্ৰন্থিত বাধাৰ সৃষ্টি কৰাৰ লগতে স্বাভাৱিক যৌনতাতো বাধাৰ সৃষ্টি কৰিব পাৰে। এনেদৰে বৃদ্ধি পোৱা প্ৰষ্টেটক বিনাইন প্ৰষ্টেটিক হাইপাৰপ্লাজিয়া বোলা হয়।

প্ৰষ্টেট গ্লেণ্ড বা গ্ৰন্থিটো কৰ্কটৰোগত আক্ৰান্ত হোৱাৰ আগত বা হ’লে ৰোগীৰ দেহত কিছু লক্ষণে দেখা দিয়ে।  তেনে কিছু লক্ষণৰ বিষয়ে তলত দিয়া হৈছেঃ-

১) প্ৰস্ৰাৱৰ গতিত সমস্যাৰ সৃষ্টি হোৱা

২) সঘনাই প্ৰস্ৰাৱ কৰিবলৈ লগা(বিশেষকৈ ৰাতি)

৩) প্ৰস্ৰাৱগ্ৰন্থি সম্পূৰ্ণৰূপে খালী কৰাত সমস্যাৰ সৃষ্টি হোৱা,অৰ্থাৎ প্ৰস্ৰাৱ এবাৰতে ভালকৈ হৈ নোলোৱা

৪) দুৰ্বল আৰু বাধাপ্ৰাপ্ত প্ৰস্ৰাৱৰ গতি(বন্ধ হোৱা অথবা সম্পূৰ্ণৰূপে হৈ যোৱা)

অৱশ্যে উপৰুক্ত কাৰণকেইটা মাথোঁ প্ৰষ্টেট গ্ৰন্থিৰ কৰ্কটৰোগৰে কাৰণ নহ’বও পাৰে। আন আন শাৰিৰীক বা প্ৰষ্টেট গ্ৰন্থিৰ আন কিবা সমস্যাৰ বাবেও এইখিনি লক্ষণে দেখা দিব পাৰে। গতিকে লক্ষণসমূহে দেখা দিলে চিকিৎসকৰ ওচৰ চপা জৰুৰী। অৱশ্যে যেতিয়া প্ৰষ্টেট কেঞ্চাৰ ধৰা পৰে  অৰ্থাৎ গ্ৰন্থিটো কৰ্কট ৰোগাক্ৰান্ত হয়,আৰু অতি বিপদজনক স্তৰ অৰ্থাৎ-চতুৰ্থ স্তৰত এই ৰোগ উপনীত হয়,তেতিয়া ৰোগীয়ে তলত দিয়া লক্ষণকেইটা অনুভৱ কৰিব পাৰে-

১) পিছফালৰ,ককাঁ‌ল,আৰু জঘনৰ বিষ যি বন্ধ নহয়

২) উশাহ চুটি হোৱা,ভাগৰুৱা অনুভৱ কৰা, হৃদস্পন্দন বৃদ্ধি পোৱা, জলক-তবক দেখা, এনিমিয়াৰ বাবে ছাল শেতা পৰা ইত্যাদি।

প্ৰষ্টেট কেঞ্চাৰ ধৰা পেলাবৰ বাবে আন কেঞ্চাৰৰ দৰেই চিকিৎসকে কিছুমান পৰীক্ষাৰ দিহা দিয়ে। এনে কিছু পৰীক্ষণ হৈছেঃ-

১) ডিজিটেল ৰেক্টেল এক্সামঃ-(ডি আৰ ই) : এই পৰীক্ষণত চিকিৎসকে এটা পিচল আঙুলি মলদ্বাৰলৈ সুমুৱাই, ভিতৰত কিবা অস্বাভাৱিক অৱস্থিতি আছে নেকি চাই।

২) প্ৰষ্টেট স্পেচিফিক এন্টিজেন টেষ্টঃ-(পি এছ এ) : প্ৰষ্টেট স্পেচিফিক এন্টিজেন হৈছে এনে এবিধ পদাৰ্থ যাক প্ৰষ্টেট গ্ৰন্থিয়ে সৃষ্টি কৰে। এইবিধ পৰীক্ষাত পি এছ এ ৰ তেজত মাত্ৰা কিমান আছে তাক পৰীক্ষা কৰা হয়। তেজত অধিক মাত্ৰাত থকা পি এছ এয়ে প্ৰষ্টেট গ্লেণ্ডৰ কৰ্কটৰোগক সূচায়। এইবিধ পদাৰ্থ বাঢ়ি থাকিলে প্ৰষ্টেট গ্ৰন্থিৰ সংক্ৰমণ আৰু প্ৰদাহো হ’ব পাৰে।

৩)পি এছ এম এ পেট স্কেন : এইবিধ পৰীক্ষণৰ জৰিয়তে প্ৰষ্টেট গ্ৰন্থিৰ বাহিৰত সৃষ্টি হোৱা বা বিয়পি পৰা কেঞ্চাৰজনিত কোষৰ অৱস্থিতিক ধৰা পেলাবলৈ কৰা হয়। এই পৰীক্ষণত এই পৰীক্ষণ প্ৰক্ৰিয়াত এক অতি কম মাত্ৰাৰ তেজস্ক্ৰিয় ঔষধ শৰীৰৰ ভিতৰলৈ সিৰাৰ মাধ্যমেৰে ভৰাই দিয়া হয়। তাৰপিছত এটি স্কেনাৰে দেহৰ সমগ্ৰ অংশত ঘূৰি ঘূৰি দেহৰ ভিতৰৰ পৰিস্কাৰ চিত্ৰ গ্ৰহণ কৰে। তেজস্ক্ৰিয় ঔষধক কৰ্কটৰোগজনিত কোষে অধিক শোষণ কৰে। গতিকে কৰ্কটৰোগজনিত কোষ আছে নে নাই ধৰা পৰাত সহায়ক হৈ পৰে।

৪) ট্ৰেঞ্জৰেক্টেল আলট্ৰাচাউণ্ড : এই পৰীক্ষণত এটি আঙুলিৰ আকাৰৰ শংকু আকৃতিৰ সঁ‌জুলি ৰেক্টাম বা মলদ্বাৰৰ ভিতৰলৈ প্ৰষ্টেট গ্ৰন্থিক পৰীক্ষা কৰিবলৈ ভৰাই দিয়া হয়। এই সঁ‌জুলিবিধে শব্দতৰংগৰ মাধ্যমেৰে ৰেক্টামৰ ছবি গ্ৰহণ কৰে। বায়’পছি প্ৰক্ৰিয়া কৰোতেও এইবিধ পৰীক্ষা কৰিব পাৰে।

৫) ট্ৰেঞ্জৰেক্টেল বায়’পছি : এইবিধ পৰীক্ষণত প্ৰষ্টেটৰ পৰা সামান্য পাতলীয়া কোষৰ তৰপ চিৰিঞ্জেৰে উলিয়াই আনি,পৰীক্ষা কৰা হয় তাত কৰ্কট ৰোগৰ অৱস্থিতি আছে নে নাই।

উপৰোক্ত পৰীক্ষাসমূহৰ পিছত যদিহে ৰোগী এজনৰ প্ৰষ্টেটৰ কৰ্কটৰোগ ধৰা পৰে,তেন্তে তেওঁৰ বাবে বিভিন্ন ধৰণৰ চিকিৎসা পদ্ধতি উপলব্ধ। তেনে কেইবিধমান হৈছে :

১) নিৰীক্ষণমূলক অপেক্ষা আৰু সক্ৰিয়ভাৱে নজৰ ৰখা : এইবিধ চিকিৎসা পদ্ধতি বয়স্ক ব্যক্তিসকলৰ ক্ষেত্ৰত ব্যৱহাৰ কৰা হয়,য’ত ব্যক্তিসকলৰ তেনে কোনো শাৰীৰিক লক্ষণ নেথাকে,অথচ পৰীক্ষণত কৰ্কটৰোগ ধৰা পৰে। এই পদ্ধতিত ব্যক্তিজনৰ বিভিন্ন ধৰণৰ পৰীক্ষা-নিৰীক্ষা সময় সাপেক্ষে কৰি থকা হয় আৰু খুব সুক্ষ্ম তথা সক্ৰিয়ভাৱে তেওঁৰ স্বাস্থ্যৰ ওপৰত নজৰ ৰখা হয়।

২) অস্ত্ৰোপচাৰ : সাধাৰণভাৱে সু-স্বাস্থ্যৰ গৰাকী ব্যক্তি এগৰাকীৰ ক্ষেত্ৰত প্ৰষ্টেট কেঞ্চাৰ ৰোগে দেখা দিলে প্ৰষ্টেট গ্ৰন্থিৰ পৰা কেঞ্চাৰৰ টিউমাৰটোক অস্ত্ৰোপচাৰৰ মাধ্যমেৰে দেহৰ বাহিৰ কৰিব পাৰি। অস্ত্ৰোপচাৰৰ ভাগ কেইটিমান হৈছেঃ-

ৰেডিকেল প্ৰছপেক্ট’মী :

ক) অপেন ৰেডিকেল প্ৰছপেক্ট’মীঃ-প্ৰষ্টেট আৰু ইয়াৰ চাৰিওফালৰ কলা আৰু বীৰ্যৰ ভেচিকল আঁতৰোৱাৰ অস্ত্ৰোপচাৰ। একে সময়তে ওচৰৰ লিম্ফ ন’ডসমূহ  আঁতৰোৱা হ’ব পাৰে।

খ) লেপাৰস্ক’পিক ৰেডিকেল প্ৰষ্টেটেকটমী : ৰেট্ৰ’পিউবিক অংশত (পেটৰ তলৰ অংশ) বা পেৰিনিয়াম (মলদ্বাৰ আৰু অণ্ডকোষৰ মাজৰ অংশ)ত এটা কাট কৰা হয়। ছিদ্ৰৰ জৰিয়তে অস্ত্ৰোপচাৰ কৰা হয়। অস্ত্ৰোপচাৰ বিশেষজ্ঞৰ বাবে প্ৰষ্টেটৰ ওচৰৰ স্নায়ুবোৰ ৰক্ষা কৰাটো বা পেৰিনিয়ামৰ কাষ চাপিলে ওচৰৰ লিম্ফ ন’ডবোৰ আঁতৰোৱাটো অধিক কঠিন।

গ) ৰ’ব’টিক এছিষ্টেড লেপাৰ’স্ক’পিক ৰেডিকেল প্ৰ’ছপেক্টমী : এইবিধ অস্ত্ৰোপচাৰত আন অস্ত্ৰোপচাৰৰ দৰেই পেটত কেইবাঠাইতো সৰু সৰুকৈ কটা হয়। আৰু শল্য চিকিৎসকে সেই ফুটাসমূহেদি এটি যন্ত্ৰ ভিতৰলৈ সোমোৱাই দি, তাৰ সহায়ত ভিতৰৰ অংগৰ 3D ছবি লৈ ৰ’বটৰ বাহুৰ সহায়েৰে অস্ত্ৰোপচাৰৰ সঁ‌জুলি ব্যৱহাৰ কৰি, কম্পিউটাৰৰ মণিটৰত চাই অস্ত্ৰোপচাৰ সম্পন্ন  কৰে।

প্ৰষ্টেট কেন্সাৰৰ অস্ত্ৰোপচাৰৰ পিছত সম্ভাৱ্য সমস্যাসমূহ হ’ল-

* নপুংসকতা

* মূত্ৰাশয়ৰ পৰা প্ৰস্ৰাৱ বা মলদ্বাৰৰ পৰা শৌচ বাহিৰ হোৱা

* লিংগ চুটি হোৱা (১ৰ পৰা ২ চেণ্টিমিটাৰ) ইয়াৰ সঠিক কাৰণ জানিব পৰা হোৱা নাই।

* ইংগুইনেল হাৰ্নিয়া (চৰ্বি বা ক্ষুদ্ৰান্ত্ৰৰ অংশ দুৰ্বল পেশীৰ মাজেৰে গ্ৰাইণ্ডলৈ উখহি উঠা)। আন কিছুমান প্ৰষ্টেট অস্ত্ৰোপচাৰ,ৰেডিয়’থেৰাপী বা কেৱল প্ৰষ্টেট বায়’পছি কৰা পুৰুষতকৈ ৰেডিকেল প্ৰষ্টেটকটমীৰ দ্বাৰা চিকিৎসা কৰা পুৰুষৰ ইংগুইনেল হাৰ্নিয়া বেছিকৈ হ’ব পাৰে। ৰেডিকেল প্ৰষ্টেটেক্টমীৰ পিছত প্ৰথম ২ বছৰৰ ভিতৰত ইয়াৰ সম্ভাৱনা বেছি।

৩) ৰেডিয়েচন থেৰাপী আৰু ৰেডিঅ’ফাৰ্মাচিউটিকেল থেৰাপীঃ-ৰেডিয়চন থেৰাপী হ’ল কৰ্কট ৰোগৰ চিকিৎসা, য’ত উচ্চ শক্তিৰ এক্স-ৰে বা আন ধৰণৰ ৰেডিয়েচন ব্যৱহাৰ কৰি কেন্সাৰ কোষক হত্যা কৰা হয় বা বৃদ্ধিত বাধা প্ৰদান কৰা হয়। ৰেডিঅ’থেৰাপী বিভিন্ন ধৰণৰ:

* বাহ্যিক ৰেডিয়েচন থেৰাপীত শৰীৰৰ বাহিৰৰ মেচিন ব্যৱহাৰ কৰি শৰীৰৰ কৰ্কট ৰোগত আক্ৰান্ত অংশৰ ফালে ৰেডিয়চন প্ৰেৰণ কৰা হয়। কনফৰ্মেল ৰেডিয়েচন হৈছে এক প্ৰকাৰৰ বাহ্যিক ৰেডিয়েচন থেৰাপী যিয়ে কম্পিউটাৰৰ সহায়ত টিউমাৰৰ ৩-মাত্ৰিক (৩-ডি) ছবি তৈয়াৰ কৰে আৰু টিউমাৰৰ লগত খাপ খুৱাই ৰেডিয়চন বিমবোৰক আকৃতি দিয়ে। ইয়াৰ ফলত অধিক মাত্ৰাৰ বিকিৰণ টিউমাৰত উপনীত হয় আৰু ওচৰৰ সুস্থ কলাবোৰৰ ক্ষতি কম হয়।

  হাইপ’ফ্ৰেকচনেটেড ৰেডিঅ’থেৰাপী দিব পাৰি কাৰণ ইয়াৰ চিকিৎসাৰ সময়সূচী অধিক সুবিধাজনক। হাইপ’ফ্ৰেকচনেটেড ৰেডিঅ’থেৰাপী হৈছে ৰেডিয়েচন চিকিৎসা য’ত ষ্টেণ্ডাৰ্ড ৰেডিয়’থেৰাপীৰ তুলনাত কম সময়ৰ ভিতৰত (কম দিন) দিনটোত এবাৰকৈ ৰেডিয়েচনৰ মুঠ মাত্ৰা সাধাৰণতে দিয়া হয়। ব্যৱহৃত সময়সূচীৰ ওপৰত নিৰ্ভৰ কৰি হাইপ’ফ্ৰেকচনেটেড ৰেডিয়’থেৰাপীৰ পাৰ্শ্বক্ৰিয়া মানক ৰেডিয়’থেৰাপীতকৈ বেয়া হ’ব পাৰে।

* আভ্যন্তৰীণ বিকিৰণ চিকিৎসাত তেজস্ক্রিয় ব্যৱহাৰ কৰা হয়

বেজী, বীজ, তাঁৰত বন্ধ কৰা পদাৰ্থ,কেথেটাৰ ইত্যাদি ।ব্যৱহৃত সময়সূচীৰ ওপৰত নিৰ্ভৰ কৰি হাইপ’ফ্ৰেকচনেটেড ৰেডিয়’থেৰাপীৰ পাৰ্শ্বক্ৰিয়া মানক ৰেডিয়’থেৰাপীতকৈ বেয়া হ’ব পাৰে।

* আভ্যন্তৰীণ বিকিৰণ চিকিৎসাত বেজী, বীজ, তাঁৰ বা কেথেটাৰত বন্ধ কৰা তেজস্ক্রিয় পদাৰ্থ ব্যৱহাৰ কৰা হয় যিটো পোনপটীয়াকৈ কৰ্কটত আক্ৰান্ত অংশৰ ভিতৰত বা ওচৰত ৰখা হয়। প্ৰাৰম্ভিক পৰ্যায়ৰ প্ৰষ্টেট কেন্সাৰত অণ্ডকোষ আৰু মলদ্বাৰৰ মাজত ছালৰ মাজেৰে সুমুৱাই দিয়া বেজী ব্যৱহাৰ কৰি তেজস্ক্রিয় বীজবোৰ প্ৰষ্টেটত স্থাপন কৰা হয়। প্ৰষ্টেটত তেজস্ক্রিয় বীজবোৰৰ স্থান ট্ৰেন্সৰেক্টাল আল্ট্ৰাছাউণ্ড বা কম্পিউটেড ট’ম’গ্ৰাফী (CT)ৰ ছবিৰ দ্বাৰা পৰিচালিত হয়। প্ৰষ্টেটত তেজস্ক্রিয় বীজ থোৱাৰ পাছত বেজীবোৰ আঁতৰাই পেলোৱা হয়।

* ৰেডিঅ’ফাৰ্মাচিউটিকেল থেৰাপীত কৰ্কট ৰোগৰ চিকিৎসাৰ বাবে তেজস্ক্ৰীয় পদাৰ্থ ব্যৱহাৰ কৰা হয়। ৰেডিঅ’ফাৰ্মাচিউটিকেল থেৰাপীত তলত দিয়াবোৰ অন্তৰ্ভুক্ত কৰা হৈছে:

* হাড়লৈ বিয়পি পৰা প্ৰষ্টেট কেন্সাৰৰ চিকিৎসাৰ বাবে আলফা ইমিটাৰ ৰেডিয়চন থেৰাপীত তেজস্ক্রিয় পদাৰ্থ ব্যৱহাৰ কৰা হয়। ৰেডিয়াম-২২৩ নামৰ তেজস্ক্রিয় পদাৰ্থ এটা সীৰাত সোমোৱাই দিয়া হয় আৰু ই তেতিয়া তেজৰ সোঁতত গতি কৰে। ৰেডিয়াম-২২৩ হাড়ৰ কৰ্কট ৰোগ থকা অংশত জমা হৈ কেন্সাৰ কোষবোৰক হত্যা কৰে।

৪) হ’ৰমন থেৰাপীঃ-হৰম’ন থেৰাপী হ’ল কৰ্কট ৰোগৰ চিকিৎসা যিয়ে হৰম’ন আঁতৰাই বা ইয়াৰ ক্ৰিয়া বন্ধ কৰি কৰ্কট কোষৰ বৃদ্ধি বন্ধ কৰি দিয়ে। হৰম’ন হ’ল শৰীৰৰ গ্ৰন্থিৰ দ্বাৰা নিৰ্মিত আৰু তেজত চলাচল কৰা পদাৰ্থ। প্ৰষ্টেট কেন্সাৰত পুৰুষৰ যৌন হৰম’নে প্ৰষ্টেট কেন্সাৰ বৃদ্ধি কৰিব পাৰে। ঔষধ, অস্ত্ৰোপচাৰ বা আন হৰম’ন ব্যৱহাৰ কৰি পুৰুষৰ হৰম’নৰ পৰিমাণ কমাই বা কামত বাধা দিয়ে। ইয়াক এণ্ড্ৰজেন ডিপ্ৰিভেচন থেৰাপী (ADT) বোলা হয়।

প্ৰষ্টেট কেন্সাৰৰ বাবে হৰম’ন থেৰাপীত তলত দিয়াবোৰ অন্তৰ্ভুক্ত হ’ব পাৰে:

* এবিৰাটেৰন এচিটেটে প্ৰষ্টেট কেন্সাৰ কোষক এণ্ড্ৰজেন তৈয়াৰ কৰাত বাধা দিব পাৰে। আন হৰম’ন থেৰাপীৰ দ্বাৰা ভাল হোৱা নাই উন্নত প্ৰষ্টেট কেন্সাৰ থকা পুৰুষৰ ক্ষেত্ৰত ইয়াক ব্যৱহাৰ কৰা হয়। ইয়াৰ উপৰিও উচ্চ বিপদজনক প্ৰষ্টেট কেন্সাৰ ৰোগী পুৰুষৰ ক্ষেত্ৰতো ব্যৱহাৰ কৰা হয় যিটো হৰম’নৰ মাত্ৰা হ্ৰাস কৰা চিকিৎসাৰ দ্বাৰা উন্নত হৈছে।

৫) কেম’থেৰাপী

৬) টাৰ্গেটেড থেৰাপী,

৭) ইম্মিউন’থেৰাপী

  আন আন নব্য কেইবিধমান থেৰাপী বা চিকিৎসা পদ্ধতি হৈছেঃ-

১) ক্ৰায়’চাৰ্জাৰীঃ প্ৰষ্টেট কেন্সাৰ কোষক জমা কৰি ধ্বংস কৰিবলৈ যন্ত্ৰ ব্যৱহাৰ কৰা চিকিৎসা। আল্ট্ৰাছাউণ্ডৰ সহায়ত চিকিৎসা কৰা হ’বলগীয়া অংশটো বিচাৰি উলিয়াব পাৰি। এই ধৰণৰ চিকিৎসাক ক্ৰাইঅ’থেৰাপি বুলিও কোৱা হয়। ক্ৰাইঅ’চাৰ্জাৰীৰ ফলত নপুংসকতা আৰু মূত্ৰাশয়ৰ পৰা প্ৰস্ৰাৱ বা মলদ্বাৰৰ পৰা মল নিৰ্গত হ’ব পাৰে।

২) হাই ইন্টেচিটি ফ’কাছড আলট্ৰাচাউণ্ড থেৰাপীঃ উচ্চ তীব্ৰতা কেন্দ্ৰিক আল্ট্ৰাছাউণ্ড থেৰাপী হৈছে আল্ট্ৰাছাউণ্ড (উচ্চ শক্তিৰ শব্দ তৰংগ) ব্যৱহাৰ কৰি কৰ্কট কোষ ধ্বংস কৰা চিকিৎসা। প্ৰষ্টেট কেন্সাৰৰ চিকিৎসাৰ বাবে এণ্ড’ৰেক্টাল প্ৰ’ব ব্যৱহাৰ কৰি শব্দৰ তৰংগ তৈয়াৰ কৰা হয়।

৩) প্ৰ’ট’ন বীম ৰেডিয়েচন থেৰাপীঃ প্ৰ’টন ৰশ্মি বিকিৰণ চিকিৎসা হৈছে এক প্ৰকাৰৰ উচ্চ শক্তিৰ, বাহ্যিক বিকিৰণ চিকিৎসা যিয়ে টিউমাৰ কোষক হত্যা কৰিবলৈ প্ৰ’টনৰ ধাৰা (ধনাত্মক আধান থকা ক্ষুদ্ৰ কণা) ব্যৱহাৰ কৰে। এই ধৰণৰ চিকিৎসাই টিউমাৰৰ ওচৰৰ সুস্থ কলাবোৰৰ বিকিৰণৰ ক্ষতিৰ পৰিমাণ কম কৰিব পাৰে।

৪) ফটোডাইনেমিক থেৰাপীঃ কৰ্কট কোষক ধ্বংশ কৰিবলৈ ঔষধ আৰু এটা নিৰ্দিষ্ট ধৰণৰ লেজাৰ পোহৰ ব্যৱহাৰ কৰা কৰ্কট ৰোগৰ চিকিৎসা। পোহৰৰ সংস্পৰ্শলৈ অহালৈকে সক্ৰিয় নহোৱা ঔষধ এটা সীৰাত বেজী দিয়া হয়। এই ঔষধে স্বাভাৱিক কোষতকৈ কেন্সাৰ কোষত অধিক সংগ্ৰহ কৰে। তাৰ পিছত ফাইবাৰ অপটিক টিউব ব্যৱহাৰ কৰি লেজাৰৰ পোহৰ কেন্সাৰ কোষলৈ লৈ যায়, য’ত ঔষধ সক্ৰিয় হৈ কোষবোৰক হত্যা কৰে। ফটোডাইনেমিক থেৰাপীয়ে সুস্থ কলাৰ সামান্য ক্ষতি কৰে। ইয়াক মূলতঃ ছালৰ ওপৰত বা ঠিক তলত বা অভ্যন্তৰীণ অংগৰ আৱৰণত থকা টিউমাৰৰ চিকিৎসাত ব্যৱহাৰ কৰা হয়।

শেষত ক’ব পাৰি যে, আন প্ৰায়বোৰ কৰ্কটৰোগৰ দৰেই পুৰুষৰ   প্ৰষ্টেট গ্ৰন্থিৰ কৰ্কটৰোগো এক  জটিল ৰোগ৷ কিন্তু আশাব্যঞ্জক কথা এয়ে যে এই ৰোগৰো ওপৰত উল্লেখ কৰাৰ  দৰে উপযুক্ত চিকিৎসা আছে৷ সঠিক সময়ত সঠিক চিকিৎসাৰ দ্বাৰা এই কৰ্কটৰোগ ৰোধ কৰিব পাৰি৷

ডাঃ বিক্ৰম কুমাৰ ডেকা
(কৰ্কট ৰোগ বিশেষজ্ঞ, ৰ’ব’টিক শল্য চিকিৎসক, মেক্স হস্পিটেল,দিল্লী)
চিকিৎসকৰ ফোনঃ-৯৫৬০৬৩০২০৫