আত্মসহায়ক গোটৰ দ্বাৰা উৎপাদিত সামগ্ৰীসমূহ প্ৰদৰ্শন আৰু বিক্ৰীৰ উদ্দেশ্য আগত ৰাখি কোকৰাঝাৰৰ জিলা উদ্যোগ আৰু বাণিজ্য কেন্দ্ৰত (DICC) এখন প্ৰদৰ্শনীৰ আয়োজন কৰা হৈছে।
এই প্ৰদৰ্শন আৰু বিক্ৰী মেলাখন উদ্বোধন কৰে কোকৰাঝাৰৰ জিলা উদ্যোগ আৰু বাণিজ্য কেন্দ্ৰৰ মহা প্ৰৱন্ধক এইচ্চডি দাসে। তেওঁ এই মেলাখনৰ উদ্দেশ্য ব্যাখ্যা কৰে আৰু এই মেলাখনৰ আত্মসহায়ক গোট সমূহৰ সৱলীকৰণ কৰা হ’ব বুলি প্ৰকাশ কৰে।উল্লেখ্য যে এই আত্মসহায়ক গোটসমূহৰ সৰ্বাধিক সংখ্যক হৈছে মহিলা।
‘‘আমি আত্মসহায়ক গোট সমূহৰ উৎপাদিত সামগ্ৰীসমূহ এনে ধৰণৰ মেলাৰ জৰিয়তে জনপ্ৰিয় কৰিব পাৰিম।’’ জিলা উদ্যোগ আৰু বাণিজ্য কেন্দ্ৰৰ মহা প্ৰৱন্ধকগৰাকীয়ে প্ৰকাশ কৰে।
এই ৩ দিনীয়া মেলাখনত বাঁহ আৰু বেতৰ সামগ্ৰী, জৈৱ আৰু প্ৰাকৃতিক আৰু ধাতুৰে নিৰ্মিত বিভিন্ন জনজাতীয় সামগ্ৰী প্ৰদৰ্শন কৰা হৈছে।
বিটিচিৰ বাণিজ্য আৰু উদ্যোগ বিভাগৰ উপ সচিব কুলদীপ বসুমতাৰী, কোকৰাঝাৰ বাণিজ্য মহাবিদ্যালয়ৰ অধ্যক্ষ উদ্বোধনী অনুষ্ঠানত উপস্থিত আছিল। এই মেলাখনত মুঠ ২৭টা আত্মসহায়ক গোটে অংশগ্ৰহণ কৰিছিল। এই মেলাখন ৩১ জানুৱাৰিলৈকে চলি থাকিব।
