আন এজন “দুৰ্ভগীয়া”ৰ জীৱনৰ কৰুণ সমাপ্তি ডিটেনশ্যন কেম্পত
ভোটাৰ তালিকাত নাম তথা ভোটাৰ কাৰ্ড আৰু ৰেচন কাৰ্ড থকাৰ পিছতো সন্দেহজনক বাংলাদেশী বুলি চৰকাৰে কাৰাগাৰত ৰখা আন এজন লোকৰ বন্দিত্ব অৱস্থাতে মৰ্মান্তিক মৃত্যু ঘটাৰ পিছত ব্যক্তিজনৰ বাসস্থান কলিয়াবৰৰ পূৱ-শোৱালনি অঞ্চলত উত্তেজনাৰ সৃষ্টি হয়।
তেজপুৰ কেন্দ্ৰীয় কাৰাগাৰৰ ডিটেনশ্যন কেম্পত বন্দী হৈ থকা ৫৮ বছৰীয়া বাসুদেৱ বিশ্বাসৰ ১১ মে’ত ডিটেনশ্যন কেম্পতে মৰ্মান্তিক মৃত্যু ঘটে।
শোণিতপুৰ জিলাৰ আৰক্ষী অধীক্ষক কুমাৰ সঞ্জিত কৃষাণে জনোৱা মতে ২০১৬ চনৰ পৰা বন্দী হৈ থকা বিশ্বাস উদফাই ৰোগত ভুগি আছিল আৰু ১১ মাৰ্চৰ নিশা বিছনাৰ পৰা পৰি তেওঁৰ মৃত্যু হয়। পৰাৰ পিছত তেওঁক কনকলতা অসামৰিক চিকিৎসালয়লৈ নিয়া হৈছিল যদিও চিকিৎসকে মৃত ঘোষণা কৰে।
কালি মৃত্যু ঘটাৰ পিছত আজি আৰক্ষীয়ে বাসুদেৱৰ মৃতদেহ তেওঁৰ কলিয়াবৰৰ পূব-শোৱালনি অঞ্চলত থকা পৰিয়ালক চমজাবলৈ অহাৰ সময়ত উত্তেজনাৰ সৃষ্টি হয়। পৰিয়ালৰ লোক আৰু স্থানীয় লোকে মৃতদেহ চমজি ল’বলৈ অস্বীকাৰ কৰে।
“ভাৰতীয় যদি কিয় বন্দী কৰিছিল উত্তৰ দিয়ক, বাংলাদেশী যদি বাংলাদেশলৈ মৃতদেহ পঠাওক”, মৃত্যু হোৱাৰ লগে লগে দেহটো চমজাবলৈ অহা পৰিয়াল আৰু স্থানীয় লোকৰ আৰক্ষীক দাবী।
স্থানীয় লোকে বাসুদেৱ বিশ্বাস পৰিয়ালক ২০ লাখ টকাৰ ক্ষতিপূৰণৰো দাবী জনায়।
স্থানীয় লোকৰ প্ৰতিবাদত আৰক্ষী এক আহুকলীয়া পৰিস্থিতিৰ সন্মুখীন হয়। পৰিস্থিতি উত্তেজনাময় হৈ পৰাত কলিয়াবৰ মহকুমা প্ৰশাসনে ঘটনাস্থলীত আৰক্ষী আৰু অৰ্ধ-সামৰিক বাহিনীৰ লোক মোতায়েম কৰিছে। কলিয়াবৰৰ দুগৰাকী কাৰ্যবাহী দণ্ডাধীশো উপস্থিত আছে ঘটনাস্থলীত।
স্থানীয় লোকৰ সৈতে আৰক্ষী আৰু প্ৰশাসনে বুজাবুজিৰ চেষ্টা কৰি আছে যদিও বাতৰি লিখা পৰ্য্যন্ত অচলাৱস্থা অব্যাহত আছে।
২০১৬ চনত বাংলাদেশী সন্দেহত আৰক্ষীৰ হাতত গ্ৰেপ্তাৰ হোৱা বাসুদেৱে দুজন পুত্ৰ আৰু দুগৰাকী কন্যাক এৰি গৈছে।
উল্লেখযোগ্য যে যোৱা ১০ মাৰ্চত উচ্চতম ন্যায়ালয়ে ৩ বছৰৰো অধিক সময় ডিটেনশ্যন কেম্পত বন্দী হৈ থকাসকলক কিছুমান চৰ্তত মুকলি কৰি দিয়াৰ অনুমতি দিছিল ৰাজ্য চৰকাৰক।
অসমৰ ডিটেনশ্যন কেম্পবোৰত থকা বন্দীসকলৰ ক্ষেত্ৰত হোৱা মানৱ অধিকাৰ উলংঘন আৰু এইসকলৰ দুৰ্দশাগ্ৰস্ত অৱস্থাটোৱে ৰাষ্ট্ৰীয় পৰ্য্যায়ৰ মানৱ অধিকাৰ কৰ্মীৰ দৃষ্টি আকৰ্ষণ কৰিছে। উচ্চতম ন্যায়ালয়ত এই সম্পৰ্কীয় এটা গুৰুত্বপূৰ্ণ গোচৰ চলি আছে।