পাকিস্তান সীমান্তত গোৰ্খা ৰেজিমেণ্টেৰ হাবলদাৰ হিচাপে কৰ্মৰত অসমৰ এজন জোৱান জম্মু আৰু কাশ্মীৰত সীমান্তৰ সিপাৰৰ পৰা কৰা অতৰ্কিত আক্ৰমণত চহিদ হৈছে।
জোৱানজনৰ নাম পদম বাহাদুৰ শ্ৰেষ্ঠ আৰু তেওঁৰ ঘৰ গোলাঘাট জিলাৰ বৰপথাৰৰ হাতীঘূলিত।
সেনাৰ সূত্ৰৰ উদ্ধৃতি দি এফ ই নিউজে প্ৰকাশ কৰামতে, ১৯ অক্টোবৰৰ ৰাতিৰ আক্ৰমণটোত পদমৰ লগতে গমিল কুমাৰ শ্ৰেষ্ঠ নামৰ আন এজন জোৱানেও চহিদী বৰণ কৰে।
বাতৰিটোৰ মতে, নিয়ন্ত্ৰণ ৰেখাৰ তাংধৰ ছেক্টৰত পাকিস্তানৰ স্থল সৈনিকৰ গুলীয়ে তেওঁলোকত আঘাত কৰে।
আনহাতে পাকিস্তান সেনাৰ গুলীত মহম্মদ ছাদিক নামৰ এজন ৫৫ বছৰীয়া অসামৰিক লোকৰ মৃত্যু হোৱাৰ লগতে আন তিনিজন আহত হৈছে।
সেনাই ইতিমধ্যে পদমৰ মৃত্যুৰ বিষয়ে পৰিয়ালক জনোৱা বুলি খবৰ পোৱা গৈছে। তেওঁৰ মৃতদেহ এতিয়াও আহি পোৱা নাই।
বীৰ জোৱানজনে পত্নী আৰু দুগৰাকী কন্যা, এটি পুত্ৰৰ লগতে মাক-দেউতাকক এৰি থৈ গৈছে।
২০ অক্টোবৰত ভাৰতীয় সেনাই ইয়াৰ প্ৰত্যুত্তৰ দি পাকিস্তানৰ ভিতৰত থকা কেইবাটাও সন্ত্ৰাসবাদীৰ ঘাটিত আক্ৰমণ কৰে আৰু এই আক্ৰমণত ৬-১০ জনৰ ভিতৰত পাকিস্তানী সেনাৰ মৃত্যু হয় বুলি বাতৰিটোত কোৱা হৈছে।
