বিশ্বনাথৰ গণ প্ৰহাৰৰ ঘটনাত জড়িতৰ সন্দেহত ১১ জনক আটক

ডকমকা কাণ্ডৰ পুনৰাবৃত্তি কৰি  যোৱা বৃহস্পতিবাৰে পুৱা বিশ্বনাথতো এজন নিৰ্দোষী লোকক গৰু চোৰৰ সন্দেহত হত্যা কৰা হৈছে। এই গণ প্ৰহাৰৰ ঘটনাত আন তিনিজন লোক বেয়াকৈ আহত হৈছে। এই পৈশাচিক গণ প্ৰহাৰৰ ঘটনাত জড়িতৰ সন্দেহত ১১ জন লোকক গ্ৰেপ্তাৰ কৰিছে বিশ্বনাথ আৰক্ষীয়ে

‘দ্য ইণ্ডিয়ান এক্সপ্ৰেছ’ কাকতত প্ৰকাশিত এটা প্ৰতিৱেদনত কোৱা হৈছে যে দেবেন ৰাজবংশী নামৰ ৩৫ বছৰীয়া লোক এজনক একাংশ উন্মত্ত লোকে গৰু চোৰৰ সন্দেহত মৰিয়াই হত্যা কৰিছে। বৃহস্পতিবাৰে পুৱা বিশ্বনাথৰ ছুটী (Sootea) আৰক্ষী থানাৰ অন্তৰ্গত দিপলংগা চাহ বাগিচাৰ লাইন নং ১৫ত এই হত্যাকাণ্ডটো সংঘটিত হৈছে।

বিশ্বনাথৰ আৰক্ষী অধীক্ষক দিগন্ত কুমাৰ চৌধুৰীৰ উদ্ধৃতিৰে কৈছে যে এই পৰ্যন্ত ১১ জনক গ্ৰেপ্তাৰ কৰা হৈছে আৰু ঘটনা সন্দৰ্ভত জোৰ তদন্ত চলি আছে। আৰক্ষীয়ে দাবী কৰিছে যে ঘটনাৰ বলি লোককেইজনে ব্যৱহাৰ কৰা দুটা গৰুসহ এখন পীক-আপ ভানখন আৰক্ষীয়ে উদ্ধাৰ কৰিবলৈ সক্ষম হৈছে। উন্মত্ত গণ প্ৰহাৰৰ পৰা প্ৰাণটো লৈ কথমপি বাচি অহা লোককেইজনে কৈছে যে তেওঁলোকে  গাহৰি কিনাৰ বাবে গৈছিল এই এলেকাটোলৈ গৈছিল। গণ প্ৰহাৰৰ পৰা হাত সাৰি যোৱা পঞ্চমজনে পলাই যাবলৈ সক্ষম হৈছিল যদিও আৰক্ষীয়ে তেওঁৰ সন্ধান লাভ কৰিছে।

এখন ব্যক্তিগত চিকিৎসালয়ত আহত লোক কেইজনক চিকিৎসা কৰি থকা হৈছে। আহত লোককেইজন হৈছে ফুলচান ছাহু, বিজয় নায়ক আৰু পুজেন ৰাজবংশী। জানিব পৰা মতে এই লোক কেইজন গাহৰিৰ ব্যৱসায়ী আৰু তেওঁলোকে গাহৰি কিনাৰ বাবে বৃহস্পতিবাৰে এই এলেকাটোলৈ গৈছিল।

কিন্তু গাঁৱবাসীসকলে বিশ্বাস কৰে যে এই লোককেইজন গৰু চোৰ আৰু বিগত কেইদিন মান ধৰি এলেকাটোত গৰু চোৰৰ মাত্ৰা বাঢ়ি গৈছে। ইতিমধ্যে, গণ প্ৰহাৰৰ ঘটনাটোক কেন্দ্ৰ কৰি এলেকাটোত চেপা উত্তেজনাই বিৰাজ কৰি আছে।