ৰাজ্যখনৰ অন্যান্য প্ৰান্তৰ দৰেই ডিফুতো আজি মহিলাসকলে ছেমছং চিং মেমৰিয়েল পাৰ্কত অৱস্থান ধৰ্মঘট কৰি CAA-বিৰোধী আন্দোলনত ভাগ লয়।
কাৰ্বি আংলং জিলা আঞ্চলিক ছাত্ৰ সন্থা আৰু ডিফু আঞ্চলিক ছাত্ৰ সন্থাই নেতৃত্ব লোৱা এই কাৰ্য্যসূচীত কাৰ্বি আংলং জিলা মহিলা কংগ্ৰেছ কমিটীয়েও অংশগ্ৰহণ কৰে।
অৱস্থান ধৰ্মঘটত ভাগলোৱা মহিলাসকলক সম্বুধি কাৰ্বি আংলং জিলা মহিলা কংগ্ৰেছ কমিটীৰ সভানেত্ৰী কাছাং তেৰংপীয়ে সকলো মহিলাক আইনখনৰ বিৰোধিতা কৰিবলৈ ঘৰৰ পৰা ওলাই আহিবলৈ আহ্বান জনায়।
তেওঁ বিজেপি নেতৃত্বাধীন চৰকাৰখনক আক্ৰমণ কৰিয় কয়, “বিজেপিয়ে নিৰ্বাচনত দিয়া প্ৰতিশ্ৰুতিবোৰ পূৰণ কৰাৰ পৰিৱৰ্তে চৰকাৰখনে এশ এবুৰি সমস্যাহে সৃষ্টি কৰি গৈছে।”
আন্দোলনকাৰীক উদ্দেশ্যি ৰাজ্যিক বিজেপিৰ সভাপতি ৰঞ্জিত দাসৰ তুলুঙা মন্তব্যক উভতি ধৰি তেৰংপীয়ে কয়, “যোৱা শনিবাৰে অসম প্ৰদেশ বিজেপিৰ সভাপতি ৰঞ্জিত দাসে কৈছিল যে প্ৰতিবাদকাৰীসকল কণী বেপাৰী, হাঁহ-কুকুৰা বেপাৰীহে। কিন্তু আজি ইয়াত যিসকলে প্ৰতিবাদ কৰি আছে, তেওঁলোক অসমীয়া আৰু কাৰ্বি তেজৰ মানুহ। বুদ্ধিজীৱী, শিল্পী, জ্যেষ্ঠ নাগৰিক, মহিলা, যুৱক-যুৱতী সকলো আজি ওলাই আহিছে। দাসে তেওঁৰ মন্তব্যৰ বাবে লাজ পোৱা উচিত। তেওঁৰ যদি চকুৰ গণ্ডগোল আছে তেন্তে চিকিৎসাৰ বাবে যাব লাগে”।
কাৰ্বি সাহিত্য সভা কাৰ্বি লেম্মেট আমেই (কে এল এ)-ও বিতৰ্কিত আইনখনৰ বিৰোধিতা কৰে।
“আইনখন সংবিধান বিৰোধী আৰু অসম চুক্তিৰ পৰিপন্থী”, কাৰ্বি লেম্মেট আমেই কয়।
কাৰ্বি সাহিত্যৰ অনুষ্ঠানটোৱে বিজেপিৰ ৰাষ্ট্ৰীয় সভাপতি অমিত শ্বাহলৈ প্ৰেৰণ কৰা স্মাৰকপত্ৰত কয় যে অবৈধ বিদেশীসকলে অসমৰ গুৰুতৰ ক্ষতি কৰিব। আইনখন অসমৰ খিলঞ্জীয়া লোকৰ স্বাৰ্থৰ পৰিপন্থী।
