জুন মাহত অনুষ্ঠিত নহয়, পিছুৱাই দিয়া হৈছে অসম লোকসেৱা আয়োগৰ মূল (Mains) পৰীক্ষা।
আয়োগে প্ৰিলিমছ পৰীক্ষাৰ ফলাফল ঘোষণা কৰা দিনা এক অধিসূচনাত উল্লেখ কৰিছিল যে জুন মাহত মূল পৰীক্ষা অনুষ্ঠিত হ’ব।
মন কৰিবলগীয়া যে আয়োগৰ কেলেণ্ডাৰ অনুসৰি মূল পৰীক্ষাটো আগষ্ট আৰু ছেপ্টেম্বৰ মাহত অনুষ্ঠিত হোৱাৰ কথা আছিল যদিও আয়োগে দুমাহ আগুৱাই দিছিল। ইয়াৰ পিছতেই পৰীক্ষাৰ্থীসকলৰ মাজত প্ৰতিক্ৰিয়াৰ সৃষ্টি হয়।
শনিবাৰে লোকসেৱা আয়োগে এক জাননী যোগে পুনৰ অৱগত কৰিছে যে জুন মাহত নহয়, তাৰ পৰিবৰ্তে জুলাই মাহত হে লোকসেৱা আয়োগৰ মূল পৰীক্ষা অনুষ্ঠিত হ’ব।
শেহতীয়া অধিসূচনা অনুসৰি অহা ৮, ৯ আৰু ১০ জুলাইত অনুষ্ঠিত হ’ব মূল পৰীক্ষা। অধিসূচনা অনুসৰি ছযখন কাকতৰ এই পৰীক্ষা পুৱা ৯ বজাৰ পৰা দুপৰীয়া ১২ বজালৈ আৰু দুপৰীয়া ১:৩০ বজাৰ পৰা ৪:৩০ বজালৈ দুটা বেলাত অনুষ্ঠিত হ’ব।
সদৌ অসম ছাত্ৰ সন্থাকে ধৰি বিভিন্ন ছাত্ৰ সংগঠনে জুন মাহত পৰীক্ষা অনুষ্ঠিত কৰাৰ সিদ্ধান্তৰ বিৰুদ্ধে প্ৰতিবাদ কৰাৰ পিছতে জুনৰ সলনি জুলাইত পৰীক্ষা অনুষ্ঠিত কৰাৰ সিদ্ধান্ত লৈছে অসম লোক সেৱা আয়োগে।
লগতে এইবাৰ শিলচৰ, যোৰহাট, নগাঁও, তেজপুৰ, লখিমপুৰ, বঙাইগাঁও আৰু গুৱাহাটীত অৰ্থাৎ সাতটিকৈ অঞ্চলত এই পৰীক্ষা অনুষ্ঠিত হ’ব।
জানিব পৰা মতে অহা ১৫ জুনৰ পৰা ১৭ জুনৰ ভিতৰত আয়োগৰ ৱেবছাইট www.apsc.nic.in ত পৰীক্ষাৰ প্ৰৱেশ পত্ৰ মুকলি কৰা হ’ব।
