কা-বিৰোধিতাত হিংসাক লৈ সেনা মুৰব্বীৰ মন্তব্য, বিৰোধীৰ সমালোচনা
সেনা মুৰব্বী জেনেৰেল বিপিন ৰাৱতে নাগৰিকত্ব (সংশোধন) আইন ২০১৯-বিৰোধী আন্দোলনত হোৱা হিংসাত্মক ঘটনা আৰু নেতৃত্ব সন্দৰ্ভত বৃহস্পতিবাৰে মন্তব্য কৰিছে।
বিপৰীতে কংগ্ৰেছকে ধৰি বিৰোধী দলসমূহে জেনেৰেল ৰাৱতক এই মন্তব্যৰ বাবে সমালোচনা কৰিছে।
দেশৰ বিভিন্ন ঠাইত কা-বিৰোধী আন্দোলনত অগ্নিসংযোগ আৰু হিংসাৰ ঘটনাসমূহলৈ আঙুলিয়াই জেনেৰেল ৰাৱতে কয় যে এনে কামৰ বাবে জনতাক আগবঢ়াই দিয়াটোক নেতৃত্ব বুলি নকয়।
“তেওঁলোক নেতা নহয় যিসকলে ৰাইজক বেঠিক দিশলৈ আগবঢ়াই দিয়ে। যিহেতু আমি দেখিছো বহু বিশ্ববিদ্যালয় আৰু কলেজত, ছাত্ৰ-ছাত্ৰীসকলে নগৰ আৰু চহৰসমূহত অগ্নিসংযোগ আৰু হিংসাত্মক ঘটনাৰ বাবে কিদৰে জনতা আৰু জুমবোৰক নেতৃত্ব দিছে। এয়া নেতৃত্ব নহয়,” জেনেৰেল ৰাৱতৰ মন্তব্যৰ উদ্ধৃতি।
তেওঁ লগতে কয় যে নেতা হৈছে সেইজন যি আপোনাক সঠিক দিশত আগবঢ়াই নিয়ে, আপোনাক শুদ্ধ উপদেশ দিয়ে আৰু তাৰ পিছত এইটো নিশ্চিত কৰে যে আপুনি যিসকলৰ বাবে জীয়াই আছে তেওঁলোকৰ প্ৰতি আপুনি যত্নৱান হয়।
ইফালে জেনেৰেল ৰাৱতৰ মন্তব্যই ভাৰতীয় সেনাৰ “ৰাজনৈতিক” পক্ষপাতিত্বহীনতাৰ পৰা আঁতৰি অহা বুলি কংগ্ৰেছকে বিৰোধী দলসমূহ সৰৱ হৈছে।
কংগ্ৰেছৰ মুখপাত্ৰ ব্ৰিজেশ কালাপ্পাই সেনা মুৰব্বীজনে ৰাজনতিক বিষয়ত কিদৰে মাত মাতিব পাৰে বুলি প্ৰশ্ন কৰিছে।
“সেনা মুৰব্বী বিপিন ৰাৱতে #CAAProtestsৰ বিৰুদ্ধে মাত মতাটো সম্পূৰ্ণৰূপে সাংবিধানিক গণতন্ত্ৰৰ বিৰোধী। আজি যদি সেনা মুৰব্বীক ৰাজনৈতিক বিষয়ত মাত মাতিবলৈ অনুমতি দিয়া হয়, ই কাইলৈ তেওঁক সেনাৰ কৰ্তৃত্ব গ্ৰহণৰ চেষ্টাৰ বাবেও অনুমতি দিব!!” কালাপ্পাৰ টুইট।
চি পি আই (এম) নেতা সীতাৰাম য়েচুৰিয়ে জেনেৰেল ৰাৱতৰ মন্তব্যক লৈ নৰেন্দ্ৰ মোদী চৰকাৰক সমালোচনা কৰিছে।
এ আই এম আই এম মুৰব্বী আছাছুদ্দিন অ’ৱেছিয়ে জেনেৰেল ৰাৱতৰ সমালোচনা কৰি কয় যে নেতৃত্ব হৈছে কাৰোবাৰ কাৰ্য্যালয়ৰ সীমাবদ্ধতা সম্পৰ্কে অৱগত হোৱাটো।