ছিকিমত প্ৰচণ্ড তুষাৰপাতৰ ফলত বহুতো পৰ্যটক পাহাৰীয়া ৰাস্তাত আৱদ্ধ হৈ পৰিছে। শনিবাৰে আবেলি ছিকিমৰ বতৰৰ অৱনতি ঘটিবলৈ আৰম্ভ কৰিছিল। সূৰ্যাস্তৰ পিছৰে পৰা প্ৰচণ্ড তুষাৰপাতৰ বাবে পৰ্যটকসকল পূব ছিকিমৰ নাথুলা আৰু চাংগুত আৱদ্ধ হৈ পৰে।
স্থানীয় সূত্ৰ অনুসৰি, তুষাৰপাতৰ ফলত প্ৰায় ১৫ কিলোমিটাৰ অঞ্চলত কমেও ১১৩ খন বাহনত প্ৰায় ৯০০ জন পৰ্যটক আৱদ্ধ হৈ আছে। সেনাৰ উদ্ধাৰকাৰী দল নিশা অঞ্চলটোলৈ ৰাওনা হয়।
লগতে পঢ়ক: ৰহস্য! ১৫ কোটি টকাৰ বাবে হত্যা কৰা হৈছিল সতীশ কৌশিকক? অচিনাক্ত মহিলাৰ দাবীত চাঞ্চল্য
সূত্ৰসমূহৰ মতে, নিশা ১১ বজাৰ ভিতৰত বহু লোকক উদ্ধাৰ কৰা হয় আৰু ৪২ কিলোমিটাৰ দূৰত থকা গেংটকলৈ ঘূৰাই অনা হয়। অৱশ্যে, বহুতো পৰ্যটক এতিয়াও তাত আৱদ্ধ হৈ আছে।
এজন আৰক্ষী বিষয়াই জনায় যে নাথুলা আৰু চাংগুৰ পৰা ছিকিমলৈ উভতি অহাৰ সময়ত বহুতো বাহন বৰফত আৱদ্ধ হৈ পৰে। এতিয়া বৰফ আঁতৰোৱাৰ কাম চলি আছে। নিশা ৯:৩০ বজালৈকে ১৫ খন বাহন উদ্ধাৰ কৰা হৈছে।
অভিযানকাৰী দলে আৱদ্ধ লোকসকলৰ বহুতক উদ্ধাৰ কৰি ওচৰৰ সেনা শিবিৰলৈ লৈ গৈছে। সেনাৰ চিকিৎসকসকলে তেওঁলোকৰ চোৱাচিতা কৰাৰ লগতে খাদ্যৰ ব্যৱস্থাও কৰিছে।
