সোণ সৰবৰাহৰ গোচৰত গ্ৰেপ্তাৰ হোৱা কানাড়া অভিনেত্ৰী ৰান্যা ৰাওৰ সংস্থাক উদ্যোগৰ বাবে ভূমি আবণ্টন দিছিল কৰ্ণাটক চৰকাৰে! ২০২৩ চনত তেতিয়াৰ মুখ্যমন্ত্ৰী বাসৱৰাজ বোমাই নেতৃত্বাধীন বিজেপি চৰকাৰে ১২ একৰ মাটি ‘ক্ষীৰোদা প্ৰাইভেট লিমিটেড’ নামৰ সংস্থাএটাক দিছিল। এই সংস্থাটোৰ অন্যতম সঞ্চালক হৈছে অভিনেত্ৰী ৰান্যা।
কৰ্ণাটক ইণ্ডাষ্ট্ৰিয়েল এলেকা ডেভেলপমেণ্ট ব’ৰ্ডে (KIADB) প্ৰদান কৰা মাটিত ১৩৮ কোটি টকা ব্যয় সাপেক্ষে তীখাৰ কাৰখানা নিৰ্মাণ কৰাৰ প্ৰতিশ্ৰুতি দিছিল অভিনেত্ৰীগৰাকীৰ সংস্থাটোৱে।
কৰ্ণাটক ঔদ্যোগিক এলেকা উন্নয়ন নিগমৰ মুখ্য কাৰ্যবাহী বিষয়াই দেওবাৰে কয় যে সোণ সৰবৰাহৰ গোচৰত গ্ৰেপ্তাৰ হোৱা অভিনেত্ৰীগৰাকী সংস্থাটোৰ সৈতে জড়িত। ২০২৩ চনৰ জানুৱাৰী মাহত সংস্থাটোৰ বাবে ১২ একৰ মাটি আবণ্টন দিয়া হৈছিল। কৰ্ণাটক ঔদ্যোগিক উন্নয়ন নিগমৰ এগৰাকী বিষয়াই কয় যে এই কাৰখানাটো নিৰ্মাণ হ’লেই বহু চাকৰিৰ সৃষ্টি হোৱাৰ কথা আছিল। কিন্তু কৰ্ণাটক চৰকাৰে এই ভূমি সংস্থাটোক হস্তান্তৰ কৰা হৈছে নে নাই সেয়া স্পষ্ট কৰা নাই।
যোৱা ৩ মাৰ্চত ডুবাইৰ পৰা উভতি অহাৰ সময়ত বেংগালুৰুৰ কেম্পেগৌড়া আন্তঃৰাষ্ট্ৰীয় বিমানবন্দৰত ১২ কোটি টকাৰ সোণসহ গ্ৰেপ্তাৰ হৈছিল ৰান্যা। কৰ্ণাটকৰ এগৰাকী আই পি এছ বিষয়াৰ কন্যা। ৰাজহ চোৰাংচোৱা বিভাগৰ তদন্তকাৰীয়ে অনুমান কৰিছে যে এই সোণৰ চোৰাং কাৰবাৰত ৰান্যা অকল নহয়, ইয়াৰ আঁৰত আছে এটা ডাঙৰ ‘চক্ৰ’! কিন্তু সেই চক্ৰৰ সৈতে ৰান্যা কেনেদৰে জড়িত আৰু তেওঁলোকৰ নেটৱৰ্ক কিমানলৈ বিস্তৃত সেয়া চোৰাংচোৱা বিষয়াসকলে তদন্ত কৰি আছে।
কেৱল ডুবাইয়ে নহয়, ৰান্যাৰ পাছপ’ৰ্ট পৰীক্ষা কৰি চোৰাংচোৱা বিষয়াসকলে জানিব পাৰে যে তেওঁ কমেও ৪৫খন দেশ ভ্ৰমণ কৰিছে। সূত্ৰ অনুসৰি, জেৰাৰ সময়ত অভিনেত্ৰীগৰাকীয়ে তদন্তকাৰীক জনোৱা মতে, ডুবাইৰ বাহিৰেও তেওঁ ইউৰোপ, আমেৰিকা আৰু পশ্চিম এছিয়াৰ বহু দেশ ভ্ৰমণ কৰিছে। কিয় ইমান সঘনাই বিদেশ ভ্ৰমণ কৰে তদন্তকাৰীয়ে তাৰো তদন্ত কৰি আছে।
সোণ সৰবৰাহৰ গোচৰৰ তদন্তত চিবিআইও নামিছে। ৰাজহ চোৰাংচোৱা বিভাগৰ সমান্তৰালকৈ কেন্দ্ৰীয় তদন্তকাৰী সংস্থাটোৱেও সোণ সৰবৰাহৰ গোচৰৰ তদন্ত আৰম্ভ কৰিছে। বাতৰি অনুসৰি ডি আৰ আইৰ পৰা সকলো তথ্য সংগ্ৰহৰ প্ৰক্ৰিয়া চলি আছে। ইয়াৰ পিছতে কেন্দ্ৰীয় তদন্তকাৰী দলে তদন্ত তীব্ৰতৰ কৰি তুলিব। ৰাষ্ট্ৰীয় পৰ্যায়ত কোনো সোণ সৰবৰাহকাৰী চক্ৰ সক্ৰিয় হৈ আছে নেকি সেয়া চোৰাংচোৱা বিষয়াসকলে তদন্ত কৰিব।
