ফিল্মফেয়াৰ চলি থকাৰ মাজতে কিয় আটক হ’ল মানস ৰবীন?

গুৱাহাটীৰ সৰুসজাই ষ্টেডিয়ামত ফিল্মফেয়াৰ এৱাৰ্ডছ ২০২০ চলি থকাৰ মাজতে বৰঝাৰ বিমান বন্দৰৰ পৰা কালি নিশা আটক হ’ল কন্ঠশিল্পী মানস ৰবীন।

কালি নিশা প্ৰায় ১০ বজাত আজাৰা আৰক্ষীয়ে কন্ঠশিল্পীজনক বৰঝাৰ বিমান বন্দৰৰ পৰা অন্য ১০ গৰাকী সহযোগীৰ সৈতে আটক কৰে।

সহকাৰী আৰক্ষী আয়ুক্ত প্ৰাঞ্জল বৰাৰ নেতৃত্বত আজাৰা আৰক্ষীৰ এটা দলে শিল্পীজনক আটক কৰি সোধ-পোচৰ বাবে আজাৰা আৰক্ষী চকীলৈ লৈ যায়।

ফিল্মফেয়াৰ এৱাৰ্ডৰ বৰ্ণাঢ্য অনুষ্ঠান চলি থকা স্বত্তেও শিল্পীগৰাকীয়ে সেই অনুষ্ঠানত উপস্থিত নাথাকি লগত ১০ গৰাকী সহযোগীক লৈ নাগৰিকত্ব সংশোধনী আইন ২০১৯ ৰ বিৰুদ্ধে মৌন প্ৰতিবাদ সাব্যস্ত কৰিছিল।

হাতে হাতে বিভিন্ন ধৰণ প্লে কাৰ্ড লৈ এই প্ৰতিবাদ সাব্যস্ত কৰিছিল য’ত’ লিখা আছিল ‘Dear Sir Akshay Kumar, we Love You, Dear Medam Madhuri We Love You So Much’।

কিন্তু তেনেদৰে লিখি মৌন প্ৰতিবাদ সাব্যস্ত কৰাটোৱেই যেন তেওঁলোকৰ অপৰাধ আছিল যাৰ বাবে আটাইকেইগৰাকীয়ে আৰক্ষীয়ে আটক কৰি লৈ যায়।

বলীউদৰ তাৰকাক বিতৰ্কিত আইনখনৰ বিৰুদ্ধে মাত মাতিবলৈ আহ্বান জনাই এই প্ৰতিবাদ সাব্যস্ত কৰিছিল মানস ৰবীনে।

‘CAA ৰ বিৰুদ্ধে যিখন সংগ্ৰাম চলি আছে অসমত সেই বিষয়ে বলিউদৰ শিল্পীসকল অৱগত হৈ যাওঁক বুলি আমি এই মৌন প্ৰতিবাদ কৰিছো। আমি তেওঁলোকক ভাল পাওঁ, গতিকে তেওঁলোকেও CAA বিৰোধিতা কৰি অসমীয়া ভাষা সংস্কৃতি ৰক্ষাৰ ক্ষেত্ৰত মাত মাতক।‘ মৌন প্ৰতিবাদ চলি থকাৰ সময়তে সংবাদ মাধ্যমৰ আগত এইদৰে কয় শিল্পীগৰাকীয়ে।

তেওঁ আৰু কয়, ‘বলীউডৰ শিল্পীসকলে কেৱল ৰঙা নীলা লাইট দেখি গ’লেই নহ’ব। অসমৰ পৰা সঁচা খবৰ এটাও তেওঁলোকে লৈ যাওঁক, কিজানিবা কোনোবা এজনে মাত এষাৰ মাতেই। আমি তেওঁলোকক অনুৰোধ জনাবলৈ আহিছো। অসম চৰকাৰে যিদৰে ফিল্মফেয়াৰৰ জৰিয়তে পৰ্যটক অহাটো বিচাৰিছে সেই একেদৰে আমিও বিচাৰিছো আমাৰ মনৰ কথাখিনি তেওঁলোকে লৈ গৈ ভাৰতবৰ্ষত বিলাই দিয়ক।‘

অৱশ্যে গোটেই নিশাটো আজাৰা আৰক্ষী থানাতে ৰখাই পুৱা প্ৰায় ৫ মান বজাত যাবলৈ দিয়ে কন্ঠশিল্পীগৰাকীক।