আজি সুধাকন্ঠৰ ৯৪ তম জন্ম জয়ন্তী। ৰাজ্যৰ বিভিন্ন প্ৰান্তত বিশ্ববৰেণ্য শিল্পীগৰাকীৰ জন্ম জয়ন্তী অতি উলহ-মালহৰে পালন কৰিছে।
এই জন্ম জয়ন্তীৰ সৈতে সংগতি ৰাখি অসমীয়াৰ হিয়াৰ আমঠু শিল্পীগৰাকীক দেৱালত একে নিশাৰ ভিতৰতে ৰং তুলিকাৰে অংকন কৰি উলিয়ালে লখিমপুৰৰ চিত্ৰশিল্পী নীলিম মহন্তই।
নিশা প্ৰায় ১২ বজাৰ পৰা আৰম্ভ কৰি পুৱা ৬ বজাৰ ভিতৰত সুধাকন্ঠৰ আলোকচিত্ৰ সম্পূৰ্ণ কৰি উলিয়ায় নীলিমে।
খানাপাৰা উৰণীয়া সেঁতুৰ তলত মুঠ ৬ ঘন্টাৰ ভিতৰত তেওঁ সম্পূৰ্ণ কৰি উলিয়ায় সুধাকন্ঠৰ এখন সুন্দৰ প্ৰতিচ্ছবি।
লগতে লিখি উলিয়াই সুধাকন্ঠৰ বিখ্যাত এটি গীতৰ শাৰী ‘We’re the same boat Brother’।
গীত মাতৰ মাজেৰে নিজৰ শিল্পৰাজি এনেদৰেই প্ৰতিষ্ঠা কৰে চিত্ৰশিল্পী নীলিম মহন্তই।
তেওঁৰ সংগীবৃন্দ বিশেষকৈ গায়ক ৰাকেশ ৰিয়ানকে আদি কৰি বহুজনে তেওঁক উৎসাহ যোগাবলৈ ভূপেন্দ্ৰ সংগীত পৰিৱেশন কৰে।
পূৰ্বেও যুৱ প্ৰজন্মৰ হাৰ্টথ্ৰব জুবিন গাৰ্গক লখিমপুৰ বাইপাছৰ এখন উৰণীয়া সেঁতুৰ তলত অংকন কৰিছিল নীলিমে।
শ্ৰদ্ধাৰ বিশ্বৰত্ন ড০ ভূপেন হাজৰিকালৈ শ্ৰদ্ধাঞ্জলি জনোৱাৰ উদ্দেশ্যে চিত্ৰশিল্পীগৰাকীৰ এই প্ৰচেষ্টা নিশ্চয়কৈ শলাগ লবলগীয়া।
