মেঘালয়ত বিজেপিৰ ৩জনকৈ নেতাই সমৰ্থকসহ দলত্যাগ কৰাৰ এদিন পিছতে একে ধৰণৰ এটা আঘাত অৰুণাচল প্ৰদেশ বিজেপিৰ মূৰতো পৰে। লোকসভা আৰু বিধানসভাৰ নিৰ্বাচনমুখী অৰুণাচল প্ৰদেশৰ বিজেপিৰ সাধাৰণ সম্পাদক জাৰপাম গামলিনে আজি দলত্যাগ কৰে।
জাৰপাম গামলিন অসন্তুষ্ট আছিল আগন্তুক বিধানসভাৰ নিৰ্বাচনৰ বাবে কালি প্ৰকাশ পোৱা দলৰ প্ৰাৰ্থী তালিকাক লৈ। ২৭ নং লিৰ’ম’বা সমষ্টিৰ পৰা দলৰ টিকট আশা কৰিছিল জাৰপামে। কিন্তু তেওঁৰ পৰিৱৰ্তে দলে সমষ্টিটোত ন্যমাৰ কৰবাককহে টিকট দিয়ে।
“মই ২০১৯-অৰ নিৰ্বাচনক লক্ষ্য কৰি ২৭ নং লিৰ’ম’বা সমষ্টিৰ ৰাইজৰ লগত থাকি কাম কৰি আহিছো প্ৰাৰ্থিত্ব প্ৰত্যাশী হিচাপে। দলেও এই সম্পৰ্কে অৱগত। কিন্তু দলে ঘোষণা কৰা প্ৰাৰ্থী তালিকা মোৰ সপক্ষে নগ’ল।… মই মোৰ ওপৰত বিশ্বাস ৰখা সমৰ্থকসকলক হতাশ কৰিব নোৱাৰো”, ৰাজ্যিক সভাপতি তাপিৰ গাওলৈ নিজৰ পদত্যাগ পত্ৰত এইদৰে লিখে জাৰপাম গামলিনে।
জাৰপামে নিজৰ দলত্যাগৰ বিষয়ে ফেচবুকত এটা পোষ্ট দি বহুকেইজন সতীৰ্থক তেওঁলোকৰ পৰা পোৱা সহযোগিতা, সমৰ্থনৰ বাবে ধন্যবাদ দিয়ে। “মই মোৰ আটাইতকৈ প্ৰিয় দলটো ত্যাগ কৰিলো”, নিজৰ দুখ প্ৰকাশ কৰি জাৰপামে পোষ্টটোত কয়।
উল্লেখযোগ্য যে ৰাজ্যখনত অহা ১১ এপ্ৰিলত হ’ব লগীয়া বিধানসভাৰ নিৰ্বাচনৰ বাবে শাসনাধিষ্ঠিত দলটোৰ প্ৰাৰ্থী তালিকাক লৈ প্ৰবল আপত্তিয়ে গা কৰি উঠিছে।
ইপিনে কিৰেন ৰিজিজু আৰু বিজেপিৰ বিৰুদ্ধে মুকলি অসন্তুষ্টি ৰাজ্যখনৰ অৰাজনৈতিক জনাংশৰ মাজতো দেখা গৈছে। ছ’চিয়েল মিডিয়াত বিজেপিক ভোট নিদিবলৈ মুকলি আহ্বান কৰা দেখা গৈছে। চাকমা শৰণাৰ্থীক অৰুণাচলৰ নাগৰিকৰ মৰ্য্যাদা দিয়া প্ৰচেষ্টা, ৬টা জনগোষ্ঠীক স্থায়ী বাসিন্দাৰ প্ৰমাণপত্ৰ দিয়াৰ প্ৰচেষ্টা আদিকে ধৰি চৰকাৰৰ কেইবাটাও খিলঞ্জীয়া বিৰোধী ইচ্ছ্যুৱে এইবাৰ নিৰ্বাচনত প্ৰভাৱ পেলোৱাৰ পূৰ্ণ সম্ভাৱনা আছে।
