৬ জুলাইৰ পৰা আৰম্ভ হ’ব অসম বিধানসভাৰ বাজেট অধিৱেশন

অসম বিধানসভাৰ বাজেট অধিৱেশন অহা ৬ জুলাইৰ পৰা আৰম্ভ হ’ব। অসমৰ ৰাজ্যপাল লক্ষ্মণ প্ৰসাদ আচাৰ্যই আনুষ্ঠানিকভাৱে বিধানসভাৰ এই অধিৱেশন আহ্বান কৰিছে।

বিধানসভা সচিবালয়ে প্ৰকাশ কৰা জাননী অনুসৰি, ৬ জুলাই সোমবাৰে পুৱা ৯:৩০ বজাত দিছপুৰস্থিত বিধানসভা ভৱনত অধিৱেশন আৰম্ভ হ’ব।

ৰাজ্যপাল লক্ষ্মণ প্ৰসাদ আচাৰ্যই ১০ জুনত বিধানসভাৰ বাজেট অধিৱেশন আহ্বান কৰাৰ সিদ্ধান্ত গ্ৰহণ কৰিছিল। পৰৱৰ্তী সময়ত বিধানসভা সচিবালয়ে আনুষ্ঠানিকভাৱে এই নিৰ্দেশ প্ৰকাশ কৰে।

ভাৰতীয় সংবিধানৰ ১৭৪ অনুচ্ছেদৰ ১ নম্বৰ দফাৰ অধীনত লাভ কৰা ক্ষমতা প্ৰয়োগ কৰি ৰাজ্যপালে ষোড়শ অসম বিধানসভাৰ বাজেট অধিৱেশন আহ্বান কৰা বুলি নিৰ্দেশটোত উল্লেখ কৰা হৈছে।

ৰাজ্যপালৰ নিৰ্দেশ অনুসৰি প্ৰকাশ কৰা জাননীখনত বিধানসভাৰ ভাৰপ্ৰাপ্ত সচিব ৰাজীৱ ভট্টাচাৰ্যই স্বাক্ষৰ কৰিছে।

বাজেট অধিৱেশন ওচৰ চাপি অহাৰ লগে লগে ৰাজ্যৰ ৰাজনৈতিক ক্ষেত্ৰতো তৎপৰতা বৃদ্ধি পোৱাৰ সম্ভাৱনা আছে। অধিৱেশনত ৰাজ্য চৰকাৰৰ নীতি, আঁচনি আৰু আগন্তুক বৰ্ষৰ বিভিন্ন অগ্ৰাধিকাৰ বিষয়ক লৈ আলোচনা হ’ব।