তিনিচুকীয়া জিলাৰ দিহিং সংৰক্ষিত বনাঞ্চলত অইল ইণ্ডিয়া লিমিটেডক হাইড্ৰকাৰ্বন খননৰ বাবে দিয়া অনুমতিৰ তীব্ৰ বিৰোধিতা কৰিছে কাজিৰঙা ৱাইল্ডলাইফ ছ’চাইটিয়ে। জৈৱ বৈচিত্ৰ্যৰে ভৰা এই বনাঞ্চলসমূহক সকলো ধৰণৰ খনন কাৰ্যৰ পৰা সম্পূৰ্ণৰূপে মুক্ত ৰাখিবলৈ ৰাজ্যৰ এই পুৰণি বেচৰকাৰী সংস্থাটোৱে দাবী জনাইছে।
সংস্থাটোৱে এক বিবৃতিত কয় যে দিহিং পাটকাই হৈছে অসমৰ একমাত্ৰ বৰ্ষাৰণ্য। কয়লা খনন, তেল খনন, বেদখল আৰু অবৈধ গছ কটাৰ দৰে কাৰ্যই এই বনাঞ্চলৰ বিস্তৰ ক্ষতিসাধন কৰিছে। এনে স্পৰ্শকাতৰ পৰিৱেশত পুনৰ প্ৰদূষণকাৰী উদ্যোগ স্থাপনৰ অনুমতি দিলে আমাৰ বৰ্ষাৰণ্যসমূহ ধ্বংসৰ মুখত পৰিব, যাৰ ফল ভয়াবহ আৰু অপূৰণীয় হ’ব।
১৯৮০ চনৰ বন (সংৰক্ষণ) আইনৰ অধীনত ডিগবৈ বন সংমণ্ডলৰ প্ৰায় ৪.৯ হেক্টৰ বনভূমি এই প্ৰকল্পৰ বাবে ব্যৱহাৰ কৰাৰ অনুমতি দিয়া হৈছে। প্ৰস্তাৱিত এই স্থান দিহিং পাটকাই হাতী সংৰক্ষিত বনাঞ্চলৰ অন্তৰ্গত, যি বন্যহস্তীৰ বাসস্থান আৰু বিচৰণৰ বাবে অতি গুৰুত্বপূৰ্ণ। বনাঞ্চল সংৰক্ষণ কেৱল পৰিৱেশৰ প্ৰতি থকা দায়িত্বই নহয়, ভৱিষ্যত প্ৰজন্মৰ বাবেও ই অত্যন্ত জৰুৰী বুলি ছ’চাইটিয়ে উল্লেখ কৰে।
দিহিং পাটকাইত আঠবিধ মেকুৰী প্ৰজাতিৰ লগতে বহুতো বন্যপ্ৰাণী আৰু চৰাই-চিৰিকটি পোৱা যায়। পৰিৱেশ কৰ্মী মৌচম হাজৰিকায়ো এই তেল খননৰ অনুমতিৰ তীব্ৰ সমালোচনা কৰিছে। বৰ্তমান সময়ত বনাঞ্চল ধ্বংসৰ ফলত খাদ্যৰ অভাৱত মানুহ আৰু হাতীৰ সংঘাত বৃদ্ধি পোৱাৰ সময়ত এই সিদ্ধান্ত অতি চিন্তাজনক বুলি তেওঁ কয়। খনন কাৰ্যই হাতীৰ আহ-যাহ বাধাগ্ৰস্ত কৰিব আৰু সংঘাত অধিক বৃদ্ধি কৰিব, যি বন্যপ্ৰাণী আৰু স্থানীয় ৰাইজ দুয়োৰে বাবে বিপদজনক।
হাজৰিকাই লগতে আঙুলিয়াই দিয়ে যে এই প্ৰকল্পৰ বাবে অতি ঘন আৰু অক্ষত অৱস্থাত থকা বনাঞ্চলখনৰ প্ৰায় ১৩৫ জোপা গছ কাটিব লাগিব। হাইড্ৰকাৰ্বন আহৰণৰ বাবে এনে চহকী প্ৰাকৃতিক আৱাসস্থল ধ্বংস কৰাটোৱে পৰিৱেশ আৰু নৈতিকতাৰ ফালৰ পৰা প্ৰশ্নৰ সৃষ্টি কৰিছে। পূবৰ আমাজান হিচাপে পৰিচিত দিহিং পাটকাইত ৫০০ তকৈ অধিক হাতী, ৪৭ বিধ স্তন্যপায়ী প্ৰাণী আৰু প্ৰায় ২৯৩ বিধ চৰাইৰ বাসস্থান। এই সংলগ্ন বনাঞ্চলত হোৱা যিকোনো ক্ষতিয়ে দিহিং পাটকাই ৰাষ্ট্ৰীয় উদ্যানৰ পৰিৱেশৰ ভাৰসাম্য বিনষ্ট কৰিব বুলি বিশেষজ্ঞসকলেও সতৰ্ক কৰি দিছে।
প্ৰকল্পটোৰ বাবে পথ নিৰ্মাণ, খনন আৰু আৱৰ্জনা পেলোৱাৰ ফলত সৃষ্টি হ’ব পৰা দীৰ্ঘম্যাদী পৰিৱেশগত বিপদৰ বিষয়েও হাজৰিকাই উদ্বেগ প্ৰকাশ কৰে। গভীৰ গাঁত খান্দি কৰা খননৰ ফলত তেল নিৰ্গত হৈ সমগ্ৰ অঞ্চলটোৰ জৈৱ বৈচিত্ৰ্য ধ্বংস হোৱাৰ আশংকা আছে। আন জিলাত ক্ষতিপূৰণ হিচাপে গছপুলি ৰোপণৰ প্ৰস্তাৱ দিয়া হৈছে যদিও ই কেতিয়াও এখন পূৰ্ণাংগ বৰ্ষাৰণ্যৰ বিকল্প হ’ব নোৱাৰে বুলি তেওঁ স্পষ্ট কৰি দিয়ে। পৰিৱেশ আৰু বহনক্ষম উন্নয়নৰ স্বাৰ্থত এই সিদ্ধান্ত পুনৰ বিবেচনা কৰিবলৈ তেওঁ পৰিৱেশ, বন আৰু জলবায়ু পৰিৱৰ্তন মন্ত্ৰালয়ক আহ্বান জনাইছে।
