সদৌ অসম বাঙালী যুৱ ছাত্ৰ ফেডাৰেশ্যন নামৰ সংগঠনটোৱে আজি দিয়া অসম বন্ধৰ মাজতে সংগঠনটোৰ ডিমৌ আঞ্চলিকৰ সম্পাদক ৰাজ ঘোষে নিজৰ দায়িত্বৰ পৰা পদত্যাগ কৰে।
আজি ছ’চিয়েল মেডিয়া ফেচবুকৰ জৰিয়তে এই কথা সদৰী কৰি ঘোষে ব্যক্তিগত কাৰণত এই সিদ্ধান্ত লোৱা বুলি জানিবলৈ দিয়ে।
উল্লেখযোগ্য যে তিনিচুকীয়াৰ ধলা খেৰবাৰীত ৫জন নিৰীহ বঙালী লোকক হত্যা কৰাৰ প্ৰতিবাদত বাঙালী যুৱ ছাত্ৰ ফেডাৰেশ্যন আজি দিয়া অসম বন্ধৰ প্ৰভাৱ শিৱসাগৰ জিলাৰ ডিমৌত তিলমানো পৰিলক্ষিত নহ’ল। ইয়াৰ পৰিৱৰ্তে ডিমৌৰ ৰাইজে অসম বন্ধক তীব্ৰ প্ৰত্যাহ্বান জনাই স্বতঃস্ফুতভাৱে ৰাজ পথলৈ ওলাইহে আহে।
আনহাতে কালি সদৌ অসম বাঙালী যুৱ ছাত্র ফেডাৰেশ্যন ডিমৌ আঞ্চলিক সমিতিৰ কেইজনমান বিষয়ববীয়াই ডিমৌত বন্ধৰ সমৰ্থনত প’ষ্টাৰ লগাবলৈ আহোতেই স্থানীয় ৰাইজে পহুখেদা দিয়াত তেওঁলোকে ঠাইতে সকলো সামগ্ৰী পেলাই পলাই পত্ৰং দিয়ে।
আজি পুৱাৰ পাঁচ বজাতেই ডিমৌৰ প্ৰতিটো জাতীয় সংগঠনৰ লোকসকল একলগ হৈ ডিমৌ চাৰি আলিত সমৱেত হয় আৰু তেওঁলোকে আজি উদ্ধতম কৰ্তৃপক্ষৰ নিৰ্দেশলৈ বাট নাচাই বন্ধৰ বিৰুদ্ধে অৱস্থান গ্ৰহণ কৰে। বন্ধৰ সময়ছোৱাত ডিমৌৰ সকলো অনুষ্ঠান প্ৰতিষ্ঠান, বিদ্যালয়, চৰকাৰী কাৰ্যালয় আৰু দোকান পোহাৰ সম্পূৰ্ণভাৱে খোলা থাকে। তদুপৰি ডিমৌৰ অসমীয়া ব্যৱসায়ীসকলে আন দিনাতকৈ আজি সোনকালেই দোকান পোহাৰ খোলা দেখা যায়।
অৱশ্যে দুই এজন বঙালী ব্যৱসায়ীয়ে প্ৰথমে দোকান খোলা নাছিল যদিও পিছত তেওঁলোকে ব্যৱসায়িক প্ৰতিষ্ঠান খুলিবলৈ বাধ্য হয় ৷
