জনজাতিকৰণ নহয়, বিকল্প প্ৰস্তাৱ প্ৰধান মন্ত্ৰী মোদীক

অসমৰ ৬টা জনগোষ্ঠীক জনজাতিকৰণৰ পৰিৱৰ্তে কেন্দ্ৰক এক বিকল্প প্ৰস্তাৱ আগবঢ়াইছে ৰাজ্যৰ জনজাতীয় সংগঠনসমূহৰ সমন্বয় সমিতি চি চি তি অ’ এ’ (CCTOA)ই।

ছয় জনগোষ্ঠীৰ জনজাতিকৰণৰ বিৰুদ্ধে বৃ্হস্পতিবাৰে নতুন দিল্লীত অৱস্থান ধৰ্মঘটৰ পিছতে প্ৰধান মন্ত্ৰী নৰেন্দ্ৰ মোদী আৰু গৃ্হ মন্ত্ৰী ৰাজনাথ সিঙক স্মাৰক পত্ৰযোগে তেওঁলোকৰ প্ৰস্তাৱ জনাই দিছে সংগঠনটোৱে।

“অন্যান্য পিছপৰা বৰ্গৰ গোষ্ঠী ৬টাক জনজাতিকৰণৰ পৰিৱৰ্তে তেওঁলোকৰ সংৰক্ষণ ব্যৱস্থাৰ অধীনতে উচিত আৰু পৰ্য্যাপ্ত চৰকাৰী সমৰ্থন আগবঢ়াবলৈ আমি দাবী জনাইছো,” নৰ্থ ইষ্ট নাও-ক জনালে এবছু সভাপতি প্ৰমোদ বড়োৱে।

৬টা গোষ্ঠীক জনজাতিকৰণে অসমৰ ভূমিপুত্ৰ জনজাতিসকলক নিঃশেষ কৰি পেলাব বুলিও মন্তব্য কৰিছে বড়ো ছাত্ৰ নেতাজনে।

উমৈহতীয়া সংগঠনটোৰ সাধাৰণ সম্পাদক তথা ত্ৰাইবেল সংঘৰ নেতা আদিত্য খাখলাৰীয়ে কয় বৰ্তমানৰ অ’ বি চি গোষ্ঠীকেইটাৰ জনজাতিকৰণে অসমৰ “প্ৰকৃত” জনজাতিসকলৰ ৰাজনৈতিক অধিকাৰ খৰ্ব কৰিব।

বিষয়টোক লৈ কেন্দ্ৰ, অসমৰ মুখ্য মন্ত্ৰী আৰু জনজাতীয় সংগঠনৰ উমৈহতীয়া মঞ্চটোৰ মাজত এখন জৰুৰী ত্ৰিপাক্ষিক বৈঠকৰো দাবী জনাইছে তেওঁলোকে।

লগতে পঢ়ক– জনজাতিকৰণ: ২৮ জানুৱাৰিৰ পৰা ধাৰাবাহিক আলোচনা, ১৫ ফেব্ৰুৱাৰিত প্ৰতিবেদন

জনজাতিকৰণ সন্দৰ্ভত বিবেচনাৰ বাবে হিমন্ত বিশ্ব শৰ্মাৰ অধ্যক্ষতাত কেন্দ্ৰই গঠন কৰা মন্ত্ৰী গোটৰ শেহতীয়া কাৰ্য্যকলাপৰ পিছতে সক্ৰিয় হৈ পৰিছে জনজাতীয় সংগঠনসমূহ।