এ আই য়ু ডি এফৰ মুৰব্বী মৌলানা বদৰুদ্দিন আজমলে যিমানেই নিজকে সংযুক্ত প্ৰগতিশীল মৰ্চা (য়ু পি এ)ৰ অংশীদাৰ বুলি চিনাকি নিদিয়ক কিয় অসমৰ কংগ্ৰেছে তেওঁক গ্ৰহণ নকৰে। ২০১৯’ৰ নিৰ্বাচনলৈ মাজত মাত্ৰ কেইটামান মাহ থকাৰ সময়তে এতিয়া সাংসদগৰাকীক দূৰৈতে নমস্কাৰ দি দুৱাৰ মাৰিব বিচাৰিছে বিৰোধী দল কংগ্ৰেছে।
মঙলবাৰে দিচপুৰত অনুষ্ঠিত ৰাজ্যৰ কংগ্ৰেছ বিধায়িনী দলৰ এখন গুৰুত্বপূৰ্ণ বৈঠকৰ পাছতেই অনুষ্ঠিত এখন সংবাদমেলত এই কথা প্ৰকাশ কৰিছে বিৰোধী দলপতিয়ে।
বৈঠকত কংগ্ৰেছ বিধায়িনী দলে আগন্তুক লোকসভা নিৰ্বাচনত কোনো কাৰণতেই এ আই য়ু ডি এফৰ সৈতে মিত্ৰতা নকৰাৰৰ সিদ্ধান্ত গ্ৰহণ কৰিছে। এই সম্পৰ্কে বিধায়িনী দলে অসম প্ৰদেশ কংগ্ৰেছ কমিটিৰ সৈতে যৌথভাৱে কংগ্ৰেছ হাইকমাণ্ডক এক প্ৰস্তাৱ প্ৰেৰণ কৰিব বুলি বেঠকৰ পাছত অনুষ্ঠিত সংবাদমেলত বিৰোধী দলপতি দেৱব্ৰত শইকীয়াই প্ৰকাশ কৰে।
‘’বদৰুদ্দিন আজমল বতৰ চাই কঠিয়া পৰা মানুহ। দেশত কংগ্ৰেছৰ সপক্ষে বতাহ বলা দেখি আজমলে দিল্লীত কংগ্ৰেছৰ লগত থাকিব বুলি কৈছে। এই কথাত আমি গুৰুত্ব নিদিও আৰু এই কথা আমি হাইকমাণ্ডকো জনাম’’,-দেৱব্ৰত শইকীয়াই সংবাদমেলত কয়।
উল্লখ্য যে, অসমৰ কংগ্ৰেছ নেতৃত্ব আৰু এ আই য়ু ডি এফৰ মাজত দীৰ্ঘদিন ধৰি এক বাকযুদ্ধ আৰু কথাৰ কটাকটি চলিয়েই আছে। প্ৰাক্তন মুখ্য মন্ত্ৰী তৰুণ গগৈৰ পৰা আৰম্ভ কৰি অসম কংগ্ৰেছৰ বহুকেইজন নেতাই এ আই য়ু ডি এফৰ সৈতে কংগ্ৰেছে কোনো কাৰণতে মিত্ৰতা নকৰে বুলি বহুবাৰ মন্তব্য কৰাৰ পাছতো দলটোৱে কংগ্ৰেছৰ সৈতে মিত্ৰতা কৰাৰ আশা বাদ দিয়া নাছিল।
এ আই য়ু ডি এফৰ মুৰব্বী বদৰুদ্দিন আজমলে অসমৰ কংগ্ৰেছীয়ে কৰা মন্তব্যক আওকাণ কৰি ‘আমাৰ মিত্ৰতা দিল্লীৰ লগতহে, মিত্ৰতা সন্দৰ্ভত কংগ্ৰেছ হাইকমাণ্ডৰ লগতহে কথা পাতিম’ বুলি কেইবাবাৰো মন্তব্য কৰিছিল।
এতিয়া আজি কংগ্ৰেছ বিধায়িনী দলে লোৱা এই সিদ্ধান্তক কংগ্ৰেছ হাইকমাণ্ডে কেনেদৰে গ্ৰহণ কৰে সেয়া নিশ্চয়কৈ গুৰুত্বপূৰ্ণ বুলি বিবেচিত হ’ব। কাৰণ ৰাষ্ট্ৰীয় পৰ্যায়ত য়ু পি এৰ অংশীদাৰ এ আই য়ু ডি এফ।
আজিৰ সংবাদমেলতেই কংগ্ৰছে এনআৰচিত বাদ পৰা প্ৰকৃত ভাৰতীয়ৰ নাম অন্তৰ্ভুক্তিৰ বাবে সহায় কৰিব বুলিও বিৰোধী দলপতিগৰাকীয়ে প্ৰকাশ কৰে।
ইপিনে বিতৰ্কিত নাগৰিকত্ব সংশোধনী বিধেয়ক ২০১৬’ সন্দৰ্ভত কালি যুটীয়া সংসদীয় সমিতিয়ে বিৰোধী দলসমুহে অনা আটাইকেইটা সংশোধনী প্ৰস্তাৱ নাকচ কৰাৰ পাছত বিজেপিয়ে অসমৰ জনগণৰ মতক উপেক্ষা কৰা বুলি সংবাদমেলত দেৱব্ৰত শইকীয়াই কয়। লগতে বিধেয়কখন বিপক্ষে কংগ্ৰেছে সৰ্বতোপ্ৰকাৰে প্ৰতিৰোধ সংগ্ৰাম গঢ়ি তুলিব বুলিও কংগ্ৰেছ বিধায়িনী দলে জানিবলৈ দিয়ে।
