‘পি পি ই কীটকে ধৰি ক’ভিড-প্ৰতিৰোধী বিভিন্ন সামগ্রী যোগানৰ ঠিকা সকলো নীতি-নিয়ম জলাঞ্জলি দি তেতিয়াৰ স্বাস্থ্যমন্ত্ৰী আৰু বৰ্তমানৰ মুখ্যমন্ত্ৰী হিমন্ত বিশ্ব শৰ্মাৰ পত্নী ৰিণিকি ভুঞা শৰ্মাৰ এটা আৰু মুখ্যমন্ত্ৰীৰ ‘ব্যৱসায়ী বন্ধু’ অশোক ধানুকাৰ পুত্ৰ ঘনশ্যাম দাস ধানুকাৰ দুটা প্ৰতিষ্ঠানক আবণ্টন দিয়া কাৰ্যৰ তদন্ত চিবিআই আৰু এনফর্চমেন্ট ডাইৰেক্টৰেট (ই ডি)ৰ দ্বাৰা কৰাবলৈ দাবী তুলি বৃহস্পতিবাৰে অসম প্রদেশ কংগ্ৰেছ কমিটীয়ে এক ধর্ণা কাৰ্যসূচী ৰূপায়িত কৰে।
তাৎপর্যপূর্ণভাৱে ৰাজীৱ ভৱনত অনুষ্ঠিত এই ধর্ণা কাৰ্যসূচীত কংগ্ৰেছৰ নেতাই ‘পি পি ই কীট’ পৰিধান কৰি অংশগ্ৰহণ কৰে।
এই সন্দৰ্ভত মনজিত মহন্তই কয়, “প্রধানমন্ত্রী নৰেন্দ্ৰ মোদীয়ে ‘দুৰ্নীতিৰ ক্ষেত্ৰত শূন্য সহনশীলতা’ নীতি গ্ৰহণ কৰা বুলি কথাই কথাই দেশৰ ৰাইজক আভুঁৱাভৰা শ্ল’গানেৰে মোহাচ্ছন্ন কৰিবলৈ অহৰহ চেষ্টা কৰি থকা সময়তে স্বয়ং অসমৰ মুখ্যমন্ত্ৰী হিমন্ত বিশ্ব শৰ্মাই তেওঁৰ পত্নী ৰিণিকি ভূঞা শৰ্মা আৰু পুত্ৰ নন্দিল বিশ্ব শৰ্মা জড়িতহৈ থকা ঘনশ্যাম দাস ধানুকাৰ প্ৰতিষ্ঠানক চৰা দামত ক’ভিড-প্ৰতিৰোধী বিভিন্ন সামগ্ৰী যোগানৰ ঠিকা দি কোটি কোটি টকাৰ কেলেংকাৰী সংঘটিত কৰা ঘটনাৰ তদন্ত এতিয়া চিবিআই আৰু এনফৰ্চমেণ্ট ডাইৰেক্টৰেট (ইডি)ৰ দ্বাৰা কৰোৱাৰ সাহস প্রধানমন্ত্ৰীগৰাকীৰ হ’বনে নহয় সেইটো অসমৰ ৰাইজে প্রত্যক্ষ কৰিব। অন্যথা এই কথা স্পষ্ট হৈ পৰিব যে মুখ্যমন্ত্ৰীৰ সেই লুণ্ঠনৰ ভাগ পাইছিল স্বয়ং প্রধানমন্ত্ৰীয়েও।”
কঠিন আৰু দুৰ্যোগপূর্ণ মুহূৰ্তত অসমৰ জনসাধাৰণৰ অসহায় অৱস্থাৰ সুযোগলৈ মুখ্যমন্ত্ৰীজনে দুহাতেৰে ৰাজহুৱা ধন আত্মসাৎ কৰিবলৈ নিজৰ পত্নী আৰু পুত্ৰক আগবঢ়াই দি কেনে জঘন্য অপৰাধ কৰিলে সেয়া অসমৰ ৰাইজে এতিয়া বুজিবলৈ আৰম্ভ কৰিছে।
প্ৰথমতে মুখ্যমন্ত্ৰীজনৰ ভূমি কেলেংকাৰী আৰু এতিয়া ক’ভিড-প্ৰতিৰোধী সা-সামগ্ৰী যোগানৰ কেলেংকাৰীৰে হিমন্ত বিশ্ব শৰ্মাই অসমৰ পূৰ্বৰ মুখ্যমন্ত্ৰীসকলে কৰিব নোৱৰা কাম কৰি সকলো ‘ৰেকৰ্ড’ ভংগ কৰিলে বুলি অসম প্ৰদেশ কংগ্ৰেছে তীব্র কটাক্ষ কৰে।
লগতে পঢ়ক: Sonia Gandhi Covid Positive: কোভিদত আক্ৰান্ত ছোনিয়া গান্ধী; সামন্য জ্বৰৰ লগতে আছে আন লক্ষণো
‘পি পি ই কীট’কে ধৰি ক’ভিড-প্ৰতিৰোধী সামগ্রী যোগানৰ নামত স্বয়ং মুখ্যমন্ত্ৰীয়ে সংঘটিত কৰা এই বৃহৎ কেলেংকাৰীৰ তদন্ত হ’বই লাগিব আৰু যেতিয়ালৈকে ইয়াৰ এটা উচ্চ-পৰ্যায়ৰ নিৰপেক্ষ তদন্ত নহ’ব তেতিয়ালৈকে কংগ্ৰেছে এই বিষয়টোকলৈ সকলো পর্যায়তে সংগ্রামী কার্যসূচী গ্ৰহণ কৰি যাব বুলি প্ৰদেশ কংগ্ৰেছৰ সাধাৰণ সম্পাদক অপূৰ্ব কুমাৰ ভট্টাচাৰ্য্যই উল্লেখ কৰে।
