ৰাজ্যৰ চলচ্চিত্ৰ জগতৰ দীৰ্ঘদিনীয়া দাবী অসম চলচ্চিত্ৰ নীতিক অনুমোদন জনালে ৰাজ্য চৰকাৰৰ কেবিনেটে। চৰকাৰৰ এই ইতিবাচক সঁহাৰিৰ বাবে মুখ্য মন্ত্ৰী, বিত্ত মন্ত্ৰী আৰু সাংস্কৃতিক পৰিক্ৰমা বিভাগৰ মন্ত্ৰীক ধন্যবাদ জনাইছে চলচ্চিত্ৰ সমাজে।
আজি গুৱাহাটীৰ নেমকেয়াৰ হাস্পতালৰ প্ৰেক্ষাগৃহত এখন সংবাদমেল সম্বোধন কৰি অসমীয়া বোলছবিজগতৰ কেইবাগৰাকী বিশিষ্ট ব্যক্তিয়ে কেবিনেটৰ উক্ত সিদ্ধান্তক আদৰণি জনায়।
সংবাদমেলত নেমকেয়াৰ হাস্পতালৰ পৰিচালন সঞ্চালক, তথা সংগীত পৰিচালক হিতেশ বৰুৱাই কয় ‘অসমীয়া চলচ্চিত্ৰ জগতৰ ৪০ বছৰীয়া সপোন পূৰণ হোৱাৰ পথত। সঁচাকৈয়ে আমাৰ বাবে আনন্দৰ দিন। এই নীতিৰ জৰিয়তে চলচ্চিত্ৰ জগতক অধিক আগুৱাই নিব পাৰিম।‘
যোৱা ২২ জুলাইত অনুষ্ঠিত ৰাজ্যিক কেবিনেটৰ বৈঠকত অসম চলচ্চিত্ৰ নীতি ২০১৯ক অনুমোদন জনোৱা হয়।
আজিৰ সংবাদমেলত উপস্থিত থকা অভিনেত্ৰী মলয়া গোস্বামীয়ে কয়, ‘এই নীতিৰ বাবে আমি ৪০ বছৰে বহুত যুদ্ধ কৰিছিলো। এতিয়া এক আশাৰ ৰেঙণি দেখা পাইছো। চিনেমা হলৰ ক্ষেত্ৰত চৰকাৰে উত্তম সিদ্ধান্ত গ্ৰহণ কৰিছে। জ্যোতি চিত্ৰবনৰ কাঠামো আৰু উন্নত হ’ব। আমাৰ দায়িত্ব আগতকৈ বাঢ়িব যাতে দৰ্শকক এখন ভাল চিনেমাৰ সোৱাদ দিব পাৰো।‘
‘বিজু ফুকন, আব্দুল মজিদ, মুনিন বৰুৱাৰ সপোন পূৰণ হৈছে। ৩৬৫ দিনেই হলত অসমীয়া চিনেমা চলিব। ইচ্ছা কৰিলেই চলচ্চিত্ৰ নির্মাতাই হলত প্ৰদৰ্শন কৰিব পাৰিব।‘ – কয় পৰিচালক ৰাজেশ ভূঞাই।
উল্লেখযোগ্য যে নতুন চলচ্চিত্ৰ নীতিত অসমীয়া ছবি নিৰ্মানত ২৫ শতাংশ ৰাজ সাহায্য দিয়াৰ কথা ঘোষণা কৰা হৈছে।, সেই অনুসৰি ১ কোটি টকা ব্যয়েৰে চিনেমা নিৰ্মান কৰিলে প্ৰযোজকে ২৫ লাখ টকা ৰাজ সাহায্য লাভ কৰিব।
ইয়াৰ উপৰি চৰকাৰৰ ফালৰ পৰা ৰাষ্ট্ৰীয় পুৰষ্কাৰপ্ৰাপ্ত চিনেমাক ১ কোটি আৰু অস্কাৰলৈ মনোনীত চিনেমাক ২ কোটি টকা প্ৰদান কৰা হ’ব। লগতে কলা-কুশলীৰ চিকিৎসাৰ ক্ষেত্ৰত ২ লাখ টকাৰ জীৱন বীমাৰ কথা উল্লেখ আছে এই চলচ্চিত্ৰ নীতিত।
আজিৰ উক্ত সংবাদমেলত অভিনেত্ৰী মলয়া গোস্বামী, মৃদুলা বৰুৱা, অভিনেতা ৰবি শৰ্মাকে ধৰি পৰিচালক ৰাজেশ ভূঞা, সংগীত পৰিচালক হিতেশ বৰুৱা উপস্থিত থাকে।
