বোকাখাতত বাঢ়নি পানীত পৰি এজন যুৱকৰ সলিল সমাধি; ক্ষতিপূৰণৰ দাবী জীপালৰ

শেহতীয়া বানে সমগ্ৰ বোকাখাত মহকুমাৰ বিস্তৃৰ্ণ অঞ্চল প্লাৱিত কৰাৰ বাবে প্ৰায়বোৰ অঞ্চলতে পানীত হাঁহ নচৰাৰৰ দৰে অৱস্থাৰ সৃষ্টি হৈছে সৰ্বসাধাৰণৰ৷

ইয়াৰ মাজতে সোমবাৰে পানীত পৰি এজন যুৱকৰ মৃত্যু হোৱা ঘটনাই শোকস্তব্ধ কৰি তোলে অঞ্চলবাসীক। নিহত যুৱকজনৰ নাম সুনীল পাঠৰি৷

জানিব পৰা মতে বোকাখাত মহকুমাৰ দুসুঁতিমুখ পঞ্চায়তৰ পাঠৰী কাঞ্চাচাপৰি গাঁৱৰ সুনীল মিলি নামৰ যুৱকজনে বানপানীত গাঁওখন প্লাৱিত হোৱাত পৰিয়ালৰে সৈতে আন ঠাইত আশ্ৰয় লৈছিল।

পানী বাঢ়ি থকাৰ বাবে এজন সতীৰ্থৰ লগত নাৱেৰে পানীত বুৰি যোৱা নিজৰ বাসগৃহ চাবলৈ যাওঁতে পানীৰ সোঁতত আৱদ্ধ হৈ পৰে আৰু সুনীল মিলি নাঁৱৰ পৰী পানীত পৰি যায়৷

সোঁতৰ কৱলত দিশহাৰা হৈ পৰা যুৱকজন পানীৰ পৰা উঠিব নোৱাৰা হয়৷ সতীৰ্থ জনে কথমপি নিজৰ প্ৰাণৰক্ষা কৰে যদিও পানীৰ সোঁতে উটুৱাই নিয়ে সুনীল মিলিক৷

স্থানীয় লোকে পিছত সুনীলক  উদ্ধাৰ কৰে যদিও ইতিমধ্যে তেওঁৰ মৃত্যু ঘটে।

দৰিদ্ৰ খেতিয়ক হৰকান্ত মিলি আৰু পেটুলী মিলিৰ পুত্ৰ সুনীল মিলি দেৰগাঁওৰ কমল দুৱৰা মহাবিদ্যালয়ৰ দ্বাদশ শ্ৰেণীৰ ছাত্ৰ আছিল।

এই শোকাৱহ ঘটনাৰ পাছত ঘটনাস্থলীত উপস্থিত হৈ জীপাল কৃষক শ্ৰমিক সংঘৰ প্ৰতিনিধিৰ এটা দলে সুনীল মিলিৰ পৰিয়ালক সাক্ষাৎ কৰি সমবেদনা জ্ঞাপন কৰে৷ 

জীপাল কৃষক শ্ৰমিক সংঘই সুনীল মিলিৰ মৰণোত্তৰ পৰীক্ষাৰ সকলো ব্যয় গোলাঘাট জিলা প্ৰশাসনক বহন কৰাৰ দাবী জনোৱাৰ লগতে চাৰি লাখ টকাৰ সাহায্য এসপ্তাহৰ ভিতৰতে মৃতকৰ পৰিয়ালটিলৈ প্ৰদান কৰিবলৈও দাবী জনায়।

মৃত সুনীল মিলিৰ পৰায়ালক প্ৰধান মন্ত্ৰী সাহায্য নিধিৰ অধীনত দুই লাখ টকাৰ সাহায্য ষোল্ল দিনৰ ভিতৰত পৰিয়ালটোক প্ৰদান কৰাৰ লগতে দহ লাখ টকাৰ এককালীন সাহায্যও অতি সোনকালে পৰিয়ালটোক প্ৰদান কৰিবৰ বাবে জীপালৰ সম্পাদক প্ৰবীণ পেগু আৰু জিলা সমন্বয়ক মণিকংকনা বৰবৰাই দাবী জনাইছে।