অসমৰ তাৰকা দৌৰবিদ হিমা দাসে আজি ডোহাত অনু্ষ্ঠিত হ’ব লগীয়া ২৩ সংখ্যক এছিয়ান এথলেটিকছ চেম্পিয়নশ্বিপত অংশ গ্ৰহণৰ বাবে ৰাওনা হয়। ২১ৰ পৰা ২৪ এপ্ৰিললৈকৈ ডোহাৰ খালিফা ষ্টেডিয়ামত এই ২৩ সংখ্যক এছিয়ান এথলেটিকছ চেম্পিয়নশ্বিপ অনুষ্ঠিত হ’ব।
স্বৰ্ণজয়ী তথা দৌৰৰাণী হিমা দাসে ২১ এপ্ৰিলৰ পৰা আৰম্ভ হ’বলগীয়া এথলেটিকছ চেম্পিয়নশ্বিপখনৰ ৪০০ মিটাৰ দৌৰত অংশ গ্ৰহণ কৰিব। হিমাই আজি টুইটাৰযোগে বন্ধুবৰ্গ আৰু শুভাকাংক্ষী সকলক এথলেটিকছ চেম্পিয়নশ্বিপত অংশ গ্ৰহণৰ বাবে ডোহালৈ ৰাওনা হোৱাৰ কথা জনায়।
উল্লেখযোগ্য যে পাটিয়ালাত অনুষ্ঠিত হৈ যোৱা ফেডাৰেশ্যন কাপ ছিনিয়ৰ এথলেটিকছ চেম্পিয়নশ্বিপত ৪০০ মিটাৰ দৌৰত হিমাই এছিয়ান চেম্পিয়নশ্বিপৰ বাবে যোগ্যতা অৰ্জনকাৰী মাপ স্পৰ্শ কৰিবলৈ সক্ষম হোৱা নাছিল। কিন্তু ফেডাৰেশ্যন কাপৰ ফাইনেলত হিমাই ৫২.৮৮ ছেকেণ্ডত ৪০০ মিটাৰ দৌৰি সোণৰ পদক অৰ্জন কৰিবলৈ সক্ষম হৈছিল।
যাৰ বাবে হিমা দাসে এছিয়ান এথলেটিকছ চেম্পিয়নশ্বিপৰ বাবে ঘোষণা কৰা ভাৰতীয় দলত স্থান লাভ কৰিবলৈ সক্ষম হৈছিল।
