চৰকাৰী মাধ্যমৰ শিক্ষানুষ্ঠান সমূহৰ শিক্ষাগত মান উন্নত কৰাৰ লক্ষ্যৰে ৰাজ্য চৰকাৰে অতি শীঘ্ৰে শিক্ষক নিযুক্তিৰ প্ৰক্ৰিয়া আৰম্ভ কৰিব। ৩ জানুৱাৰিত শিক্ষা মন্ত্ৰী সিদ্ধাৰ্থ ভট্টাচাৰ্যই এই কথা জানিবলৈ দি কয় যে শিক্ষানুষ্ঠানসমূহত খালী হৈ থকা পদত ৯ হাজাৰ শিক্ষকক নিযুক্তি দিবলৈ আমাৰ চৰকাৰে সিদ্ধান্ত গ্ৰহণ কৰিছে।
৩ জানুৱাৰি অৰ্থাৎ বৃহস্পতিবাৰে শিক্ষা মন্ত্ৰী সিদ্ধাৰ্থ ভট্টাচাৰ্যই এক শিক্ষকৰ নিযুক্তি পত্ৰ বিতৰণ কাৰ্যসূচীত অংশ লৈ উক্ত গুৰুত্বপূৰ্ণ ঘোষণা কৰে। বৃহস্পতিবাৰে ৰাজ্যৰ ৯খন জিলাৰ ১০৪ গৰাকী বিষয় শিক্ষকৰ মাজত নিযুক্তি-পত্ৰ বিতৰণ কৰা হয়।
নিযুক্তি পত্ৰ বিতৰণ কাৰ্যসূচীত মন্ত্ৰীগৰাকীয়ে কয় যে মাধ্যমিক শিক্ষা বিভাগত ২৪৩৭টা খালী পদ আছিল, ইয়াৰে ১,০৫৮টা পদত ইতিমধ্যে নিযুক্তি কাৰ্য সম্পন্ন হ’ল আৰু বাকী খালী পদসমূহ চলিত বৰ্ষৰ ভিতৰতে পূৰণ কৰা হ’ব।
মাধ্যমিক শিক্ষা সঞ্চালকালয়ত আয়োজিত উক্ত নিযুক্তি পত্ৰ বিতৰণ কাৰ্যসূচীত মন্ত্ৰী ভট্টাচাৰ্যই কয় যে যিবোৰ শিক্ষানুষ্ঠানত খালী পদ আছে, সেইবোৰ পদৰ বাবে পৰিচালনা সমিতিক বিজ্ঞাপন দিয়াৰ লগতে বাছনী কমিটীৰ দ্বাৰা বাছনি কৰাৰ প্ৰক্ৰিয়া আৰম্ভ কৰি শিক্ষা বিভাগলৈ প্ৰস্তাৱ প্ৰেৰণৰ নিৰ্দেশ দিয়া হৈছে।
উল্লেখ্য যে ইয়াৰ পূৰ্বেও ৰাজ্য চৰকাৰে ৯ হাজাৰ শিক্ষকক নিযুক্তি দিবলৈ সাজু হৈছিল কিন্তু বিষয়টো উচ্চ ন্যায়ালয়ৰ দ্বাৰস্থ হৈ পৰাত ডেৰ বছৰে প্ৰক্ৰিয়াটো স্থবিৰ হৈ আছিল। কিন্তু এতিয়া উচ্চ ন্যায়ালয়ৰ বাধা আঁতৰাত নিযুক্তি প্ৰক্ৰিয়া কাৰ্য পুনৰ আৰম্ভ হ’ব।
ইফালে শিক্ষক বাছনি প্ৰক্ৰিয়া সম্পূৰ্ণ স্বচ্ছ আৰু কোনোধৰণৰ যাতে খামখেয়ালিৰ সৃষ্টি নহয় সেই কথাও উল্লেখ কৰে নিযুক্তি-পত্ৰ বিতৰণৰ কাৰ্যসূচীত।
উল্লেখ্য যে বৃহস্পতিবাৰে অসমৰ ৯খন জিলা ক্ৰমে শিৱসাগৰ, মৰিগাঁও, নলবাৰী, দৰং, কাছাৰ, নগাঁও, তিনিচুকীয়া, কৰিমগঞ্জ আৰু গোলাঘাটৰ ১০৪ গৰাকী শিক্ষক-শিক্ষয়িত্ৰীৰ মাজত মন্ত্ৰী সিদ্ধাৰ্থ ভট্টাচাৰ্যই নিযুক্তি-পত্ৰ বিতৰণ কৰে।
