এইবাৰ সাংবাদিক দিলোৱাৰ হুছেইনৰ জ্যেষ্ঠ ভাতৃক গ্ৰেপ্তাৰ হিমন্ত বিশ্ব শৰ্মাৰ আৰক্ষীৰ
শেহতীয়াকৈ প্ৰতিবাদৰ বাতৰি সংগ্ৰহ কৰিবলৈ গৈ বেংক মেনেজাৰক প্ৰশ্ন সুধি গ্ৰেপ্তাৰ হোৱা সাংবাদিক দিলোৱাৰ হুছেইন মোজুমদাৰৰ জ্যেষ্ঠ ভাতৃক গ্ৰেপ্তাৰ কৰিছে অসম আৰক্ষীয়ে।
হোজাই জিলাত ভূমি দখল, জালিয়াতি, অপৰাধমূলক অভিযোগৰ অধীনত গ্ৰেপ্তাৰ কৰা হৈছে দিলোৱাৰ হুছেইনৰ জ্যেষ্ঠ ভাতৃ টাইবুৰ ৰহমান মজুমদাৰক।
ইতিমধ্যে এই গ্ৰেপ্তাৰ নিশ্চিত কৰিছে হোজাইৰ আৰক্ষী অধীক্ষক সৌৰভ গুপ্তাই।
উল্লেখ্য কৰাৰ প্ৰয়োজন নাই যে যোৱা সপ্তাহত অসম সমবায় এপেক্স বেংকত সংঘটিত হোৱা কথিত কেলেংকাৰী সন্দৰ্ভত প্ৰতিবাদৰ বাতৰি দিওঁতে গ্ৰেপ্তাৰ হৈছিল গুৱাহাটী প্ৰেছ ক্লাৱৰ সহকাৰী সাধাৰণ সম্পাদক দিলোৱাৰ হুছেইন মজুমদাৰ। কিন্তু ন্যায়িক যুদ্ধ আৰু সাংবাদিকৰ প্ৰতিবাদৰ পিছত তেওঁক জামিন প্ৰদান কৰা হয়।
আৰক্ষী বিষয়াসকলে প্ৰকাশ কৰা অনুসৰি ২০২১ চনত টাইবুৰ ৰহমান মজুমদাৰক একেধৰণৰ অপৰাধৰ বাবে গ্ৰেপ্তাৰ কৰা হৈছিল।
ইফালে মুখ্যমন্ত্ৰী হিমন্ত বিশ্ব শৰ্মাই কয় যে দিলোৱাৰ হুছেইন মজুমদাৰৰ প্ৰাথমিক বৃত্তি সাংবাদিকতা নহয়, ব্যৱসায়হে। দিলোৱাৰ ডাম্পাৰ ব্যৱসায়ত নিয়োজিত আৰু তেওঁৰ সাংবাদিকৰ প্ৰমাণপত্ৰ নাই। হোজাইৰ ৰাইজক সুধিলে তেওঁলোকে ক’ব যে সমগ্ৰ পৰিয়ালটো অবৈধ ভূমি দালালিৰ সৈতে জড়িত।