বৰপেটাত শনিবাৰে লোকসভাৰ সাংসদ ফণী ভূষণ চৌধুৰীৰ সভাপতিত্বত জিলা উন্নয়ন সমন্বয় আৰু নিৰীক্ষণ সমিতি চমুকৈ ডিছাৰ (DISHA) এখন বৈঠক অনুষ্ঠিত হয়।
এই বৈঠকত বিধায়ক, ডিচি ৰোহন কুমাৰ ঝা, চিইঅ জিলা পৰিষদ, বৰপেটা জিলা উন্নয়ন পৰিষদ, এডিচি, সহকাৰী আয়ুক্ত, আৰু লাইন বিভাগৰ মুৰব্বীসকলো উপস্থিত থাকে। বৈঠকত তেওঁলোকৰ হাতত অৰ্পন কৰা আঁচনিসমূহৰ অগ্ৰগতিৰ প্ৰতিবেদন দাখিল কৰে আৰু আলোচনাত বিভিন্ন চৰকাৰী আঁচনি আৰু প্ৰকল্পৰ ৰূপায়ণৰ পৰ্যালোচনাৰ ওপৰত গুৰুত্ব আৰোপ কৰা হয়।
সাংসদ চৌধুৰীয়ে উন্নয়নমূলক প্ৰকল্পসমূহ সময়োপযোগী ৰূপায়ণৰ প্ৰয়োজনীয়তাৰ ওপৰত গুৰুত্ব আৰোপ কৰি ইয়াৰ ৰূপায়ণ ক্ষিপ্ৰতাৰে কৰিবৰ বাবে পৰামৰ্শ আগবঢ়ায়। এই বৈঠকত নির্বাচিত প্রতিনিধি আৰু জিলা প্রশাসনৰ মাজত সমন্বয় শক্তিশালী কৰি সুদক্ষ শাসন ব্যৱস্থা সুনিশ্চিত কৰাৰ লক্ষ্য স্থিৰ কৰে।
উপায়ুক্ত ৰোহন কুমাৰ ঝাই জিলা পৰ্যায়ত শাসন ব্যৱস্থা উন্নত কৰাৰ ক্ষেত্ৰত ডিছাৰ উপযোগিতাৰ ওপৰত আলোকপাত কৰাৰ লগতে শাসনৰ ক্ষেত্ৰত ডিছাই সহযোগিতামূলক প্ৰচেষ্টা শক্তিশালী কৰিব বুলি উপায়ুক্তগৰাকীয়ে উল্লেখ কৰে।
এই বৈঠকত বিভিন্ন বিভাগৰ প্ৰতিনিধিয়ে নিজ নিজ বিভাগৰ আঁচনি আৰু কাৰ্যসূচীৰ অগ্ৰগতিৰ খতিয়ান দাঙি ধৰে। ইয়াৰ পূৰ্বে ২০২৫ চনৰ ১৯ ফেব্ৰুৱাৰীত ডিছাৰ বৈঠক অনুষ্ঠিত হৈছিল। তাৰ আগতে ২০২৩ চনৰ নৱেম্বৰ মাহত ডিছাৰ শেষৰখন বৈঠক অনুষ্ঠিত হৈছিল।
