‘আৰু কিমান অসম সন্তানৰ মৃত্যু হ’লে, কিমান খেতি মাটি ব্ৰহ্মপুত্ৰই খহাই নিলে, কিমান শস্যভূমি নষ্ট হ’লে তথা কিমান জীৱ-জন্তুৰ মৃত্যু হ’লে বানপানীক ৰাষ্ট্ৰীয় সমস্যা হিচাপে ঘোষণা কৰিব কেন্দ্ৰীয় চৰকাৰে?’ আজি ৰাজগড়স্থিত অসম সংগ্ৰামী মঞ্চৰ ৰাজ্যিক কাৰ্য্যালয়ত এক সংবাদমেল সম্বোধন কৰি এই প্ৰশ্ন কৰে দলটোৰ কাৰ্য্যকৰী সভাপতি অদীপ ফুকনে।
‘১৮৯৭ চনৰ পৰা অসমবাসীয়ে বানপানীৰ লগত যুঁজি থাকিবলগীয়া হৈছে। ভাৰতৰ ১০.২ শতাংশ ভূমি বান আক্ৰান্ত হোৱাৰ বিপৰীতে অসমৰ ৩৯.৫৮ শতাংশ ভূমি বান আক্ৰান্ত। ১৯৯০ চনৰ পৰা প্ৰতিবছৰে গড়ে ৬২ বৰ্গ কিল’মিটাৰ মাটি খহাই নিছে ব্ৰহ্মপুত্ৰই। যোৱা ২৯ বছৰত ব্ৰহ্মপুত্ৰই ১,৯১৮ বৰ্গ কিল’মিটাৰ ভূমি খহাই নিয়াৰ পাছতো এই সমস্যা ৰাষ্ট্ৰীয় সমস্যা হিচাপে গণ্য কৰা নহ’ল কিয়?’ অদীপ ফুকনৰ প্ৰশ্ন।
১৯২৮ চনৰ পৰা ৭৮ বছৰত ব্ৰহ্মপুত্ৰৰ পৰিষৰ ২২১০ বৰ্গ কিল’মিটাৰলৈ বৃদ্ধি পালে বুলি উল্লেখ কৰি ফুকনে কয়, ‘১৯২৮ চনত ব্ৰহ্মপুত্ৰৰ পৰিসৰ আছিল ৩,৮৭০ বৰ্গ কিল’মিটাৰ, ২০০৬ চনত ই ৬০৮০ বৰ্গ কিল’মিটাৰলৈ বৃদ্ধি পালে।’
ইয়াৰোপৰি, ৰাজ্যত যোৱা ২০ বছৰত গৰাখহনীয়াত ৪,০৫,৬৬০ বিঘা ভূমি উছন হ’ল বুলি উল্লেখ কৰি তেওঁ কয়, ‘১৯৫০ চনত ব্ৰহ্মপুত্ৰই ১.২৫ লাখ কৃষিজীৱি পৰিয়ালৰ প্ৰায় ৪.২৭ লাখ হেক্টৰ ভূমি বিলুপ্তি কৰিছে। ১৯৫১ চনত মাজুলীৰ মুঠ ভূমি আছিল ৯,২৩,৭১২ বিঘা ৩ কঠা ৪ লেচা। ২০১৭ চনত ব্ৰহ্মপুত্ৰৰ কবলত পৰি মাজুলীৰ ভূমি হ’লগৈ ৫,২৫,২৩৬ বিঘা ১২ লেচা। মুঠ ৪,০৫,৪৭৬ বিঘা ভূমি ব্ৰহ্মপুত্ৰত জাহ গ’ল।‘
‘১৯৫৩ চনৰ পৰা ২০১৭ চনলৈ কেন্দ্ৰীয় চৰকাৰে সংসদত দিয়া তথ্য মতে অসমৰ ৩,০৯৩ জন লোকৰ আৰু ৬,৭৯,৫৭৮ জীৱ-জন্তুৰ বানৰ কবলত পৰি মৃত্যু হৈছে,, ৪,৩৯,৩১২ টা গৃহ ব্ৰহ্মপুত্ৰত জাহ গৈছে। প্ৰকৃতাৰ্থত ক্ষতিৰ পৰিমাণ চৰকাৰী তথ্যতকৈ অধিক।’ ফুকনে এইদৰে কয়।
আনহাতে, জলসম্পদ বিভাগে বাজেটত অনুমোদিত ধনৰাশিৰ খুব কম পৰিমানহে খৰচ কৰে বুলি অভিযোগ তুলি ফুকনে কয় ‘২০১৫-১৬, ২০১৬-১৭, ২০১৭-১৮ বিত্তীয় বৰ্ষত ষ্টেট প্লেন ২২৫.৪ কোটি বাজেট অনুমোদন পোৱাৰ পাছত বিভাগে ৫৯.৮৬ কোটি, নাৱাৰ্ডৰ ৫৬২ কোটিৰ ৩০৫ কোটি, এন. ই. ছি ৰ ১৯.৬৫ কোটিৰ ৪.৭৫ কোটি, এন এল অ’ পি আৰৰ ৬.৮৬ কোটিৰ ৯৭ লাখ আৰু আৰ আই ডি এফৰ ৰাজ্যিক অংশৰ ২৪৩.১২ কোটিৰ মাত্ৰ ১১.৩১ কোটি টকাহে জলসম্পদ বিভাগে বান নিয়ন্ত্ৰণৰ বাবে ব্যয় কৰিলে।’
সংবাদমেলত অতীতৰ পৰা হৈ অহা বানপানীৰ ইমান ভয়াৱহতাৰ পাছতো ইয়াক ৰাষ্ট্ৰীয় সমস্যা হিচাপে কিয় ঘোষণা কৰা নহ’ল বুলি প্ৰশ্ন কৰি ফুকনে ইয়াক ৰাষ্ট্ৰীয় সমস্যা হিচাপে ঘোষণা কৰিবলৈ দাবী জনায়। লগতে তেওঁ ব্ৰহ্মপুত্ৰক পৰিস্কাৰ কৰিবলৈয়ো কেন্দ্ৰীয় চৰকাৰক আহ্বান জনায়।
