ৰিজাৰ্ভ বেংকৰ প্ৰাক্তন গৱৰ্ণৰ উৰ্জিত পেটেলক আন্তঃৰাষ্ট্ৰীয় মুদ্ৰা নিধিৰ (আই এম এফ) কাৰ্যবাহী সঞ্চালক হিচাপে নিযুক্তি দিয়া হৈছে। তেওঁ তিনি বছৰ এই পদত থাকিব। বাতৰি অনুসৰি, এই সন্দৰ্ভত কেবিনেটৰ নিযুক্তি সমিতিয়ে সেউজ সংকেত দিছে।
উৰ্জিত পেটেলে ভাৰতীয় ৰিজাৰ্ভ বেংকৰ ২৪ সংখ্যক গৱৰ্ণৰ হিচাপে কাৰ্যনিৰ্বাহ কৰিছিল। ৰঘুৰাম ৰাজনৰ পিছত তেওঁ আৰ বি আইৰ গৱৰ্ণৰ হয়। ২০১৬ চনৰ ৪ ছেপ্টেম্বৰৰ পৰা এই দায়িত্ব গ্ৰহণ কৰিছিল যদিও কাৰ্যকাল শেষ হোৱাৰ পূৰ্বে ২০১৮ চনৰ ডিচেম্বৰ মাহত আৰ বি আইৰ গৱৰ্ণৰ পদৰ পৰা পদত্যাগ কৰিছিল।
ব্যক্তিগত কাৰণত তেওঁ পদত্যাগ কৰা বুলি সদৰী কৰিছিল। আৰ বি আইৰ গৱৰ্ণৰ হৈ থকাৰ সময়ত তেওঁ কেন্দ্ৰীয় চৰকাৰৰ সৈতেও বিবাদত লিপ্ত হৈছিল।
উল্লেখ্য যে উৰ্জিত পেটেলে ইয়াৰ পূৰ্বেও আন্তঃৰাষ্ট্ৰীয় মুদ্ৰা নিধিৰ বাবে কাম কৰি আহিছে। ১৯৯৬-১৯৯৭ চনত ৰিজাৰ্ভ বেংকৰ পৰা ডেপুটেচনত আই এম এফৰ বাবে কাম কৰিছিল। সেই সময়ছোৱাত তেওঁ বেংকিং খণ্ডৰ সংস্কাৰ, পেঞ্চন ফাণ্ড আৰু বৈদেশিক মুদ্ৰাৰ বজাৰৰ সৈতে সম্পৰ্কিত কামৰ লগত জড়িত আছিল।
১৯৯৮ চনৰ পৰা ২০০১ চনলৈ কেন্দ্ৰীয় বিত্ত মন্ত্ৰালয়ৰ উপদেষ্টা হিচাপেও কাৰ্যনিৰ্বাহ কৰা পেটেলে ইয়াৰ উপৰিও কেইবাটাও ৰাজহুৱা আৰু ব্যক্তিগত খণ্ডৰ সংস্থাত বিভিন্ন পদত কাৰ্যনিৰ্বাহ কৰি আহিছে।
