কেব নামানে, প্ৰয়োজন হ’লে সমূহীয়া পদত্যাগ কৰিব মাজুলী জিলা অগপই
ক্ষমতা আৰু মন্ত্ৰীত্বৰ লালসাত খিলঞ্জীয়া বিৰোধী কাৰ্যকলাপত সহযোগ কৰা অগপৰ কেন্দ্রীয় সমিতিৰ বিষয়ববীয়া সকলৰ বিপৰীতে মাজুলী জিলা অগপই কোনোপধ্যেই মানি নলয় নাগৰিকত্ব (সংশোধনী) বিধেয়ক। মাজুলী জিলা অগপই আজি এই গুৰুত্বপূৰ্ণ সিদ্ধান্ত লয়।
অগপৰ কেন্দ্রীয় সমিতিৰ বিষয়ববীয়া সকলে চৰকাৰত মন্ত্রীত্বৰ গাদী লাভ কৰি নিজৰ স্বাৰ্থ সুৰক্ষিত কৰাৰ বাবেই কেবৰ সপক্ষে সুৰ মিলোৱা কাৰ্যক কঠোৰ সমালোচনা কৰিছে দলটোৰ তৃণমূলৰ কৰ্মী তথা মাজুলী জিলা সমিতিয়ে।
মাজুলী জিলা অগপৰ গড়মূৰস্থ কাৰ্য্যালয়ত জিলা সভাপতি ফনী টাহুৰ সভাপতিত্বত অনুষ্ঠিত এখন ৰাজহুৱা সভাত কোনোমতেই কেব মানি নোলোৱাৰ লগতে কেবাটাও সিদ্ধান্ত গ্রহণ কৰা হয়।
জিলা অগপৰ সম্পাদক ব্ৰজেন গাম, উপ সভাপতি ৰুদ্ৰ শইকীয়াকে ধৰি কৃষক পৰিষদ, মহিলা পৰিষদ, যুৱ পৰিষদৰ বিষয়ববীয়া, জিলাৰ কুৰিখন আঞ্চলিকৰ সভাপতি-সম্পাদক, কৰ্মীসহ প্ৰায় দুই শতাধিক কৰ্মী উপস্থিত থকা সভাই দলটোৰ কেন্দ্রীয় নেতৃত্বৰ কাম-কাজত লজ্জিত হোৱা বুলি ব্যক্ত কৰে জিলা সমিতিয়ে।
সভাত কোনোপধ্যেই কেব মানি নোলোৱা, প্ৰয়োজন হলে মাজুলী জিলা অগপৰ সমূহীয়া পদত্যাগ, কেবৰ সমৰ্থনত থিয় দিয়া কোনো কেন্দ্রীয় বা ৰাজ্যিক নেতাৰ সপক্ষত নথকা আৰু কেব বিৰোধী অৰাজনৈতিক সংগঠনৰ প্ৰতিবাদী কাৰ্যসূচীত অগপ মাজুলী জিলা সমিতিয়ে সম্পূৰ্ণ সহযোগিতা আগবঢ়োৱাকে ধৰি কেবাটাও গুৰুত্বপূৰ্ণ সিদ্ধান্ত গ্রহণ কৰা হয়।