সদৌ অসম ছাত্ৰ সন্থাৰ সক্ৰিয় কৰ্মী হিচাপে ছাত্ৰাৱস্থাৰ পৰা বিদেশী সমস্যাকে ধৰি অসমৰ অন্যান্য জলন্ত সমস্যাৰ বিৰুদ্ধে ৰাজপথত আন্দোলন কৰি মুখ্য মন্ত্ৰীৰ আসনত অধিষ্ঠিত হোৱা সৰ্বানন্দ সোণোৱাল এতিয়া আন্দোলনৰ ঘোৰ বিৰোধী।
এসময়ত আই এম ডি টি আইন বাতিলৰ বাবে আছুৰ পৰা ‘জাতীয় নায়ক’ৰ সন্মান লাভ কৰা সোণোৱালৰ মুখত আজি আন্দোলন আৰু আন্দোলনকাৰীৰ বিৰুদ্ধে আখৈ ফুটাদি ফুটিল কেতবোৰ মন্তব্য।
নাগৰিকত্ব সংশোধনী বিধেয়কৰ বিৰুদ্ধে সমগ্ৰ ৰাজ্যজুৰি উত্তাল প্ৰতিবাদ হৈ থকাৰ মাজতে আজি গণেশগুৰিৰ পৰা খানাপাৰা সংযোগী উৰণীয়া সেঁতুৰ আধাৰশিলা স্থাপন কৰি ভাষণ প্ৰসংগত আন্দোলন আৰু আন্দোলনকাৰীৰ বিৰুদ্ধে সৰৱ হৈ পৰিল মুখ্য মন্ত্ৰীগৰাকী।
‘কাম নকৰি কেৱল আন্দোলন কৰি থাকিলে এইখন অসমত পৰিৱৰ্তন আহিব নোৱাৰে।‘ বুলি উল্লেখ কৰি সোণোৱালে কয়, ‘ৰাজপথত আন্দোলন কৰিলেই জাতীয় স্বাৰ্থ সুৰক্ষিত নহয়। ইয়াৰ বাবে নিজ নিজ কৰ্মভূমিত নিষ্ঠা আৰু সততাৰে শ্ৰদ্ধা আৰু ভক্তিৰে কৰ্ম সংস্কৃতিত আত্ম নিয়োগ কৰিব লাগিব।‘
তেওঁ আৰু কয়, ‘পূৰ্বৰ আন্দোলন সমূহৰ পৰা আপোনালোকে কথাবিলাক শিকিবলৈ চেষ্টা কৰক। আমি সকলোৱে বৰাক-ব্ৰহ্মপুত্ৰ পাহাৰ ভৈয়ামত বসবাস কৰা বসতি সন্ততি। ইয়াৰ শক্তি, সম্পদ আৰু সম্ভাৱনাৰ বিকাশ ঘটাব লাগিব।‘
তাৎপয্যপূৰ্ণভাৱে সোণোৱালৰ বক্তব্যতে স্পষ্ট হৈ পৰিল অসমৰ আন্দোলনকাৰীসকলে অশান্তিৰ সৃষ্টি কৰিছে।
‘ইয়াত অশান্তি সৃষ্টি কৰিলে অসমৰ ভৱিষ্যত কোনো যুক্তিতেই পৰিৱৰ্তন হ’ব নোৱাৰে।‘ এইদৰে সদৰী কৰি তেওঁ লগতে আন্দোলনকাৰীক আহ্বান জনাই কয় ‘গতিকে আন্দোলনকাৰীসকলক আহ্বান জনাইছো আপোনালোকে আন্দোলনৰ যোগেদি অসমৰ ভৱিষ্যত পৰিৱৰ্তন কৰিব নোৱাৰে। উঠি অহা চামটোক আন্দোলনৰ পৰিৱৰ্তে শিক্ষাৰ প্ৰতি ধাউতি বৃদ্ধি কৰাৰ প্ৰয়াস কৰক।‘
ইপিনে, সোণোৱালে কৰা এই মন্তব্যৰ পাছতেই তেওঁক উভটি ধৰিছে একালৰ সতীৰ্থ ড০ সমুজ্জ্বল কুমাৰ ভট্টাচাৰ্য্যই।
‘তেওঁ আন্দোলন কৰি গৈয়েই এতিয়া মুখ্য মন্ত্ৰীৰ আসনত বহি আছে। মুখ্য মন্ত্ৰীৰ আসনত বহি এতিয়া আন্দোলনৰ ভাষা বুজিবলৈ তেওঁৰ কিয় সাহস নাই? তেওঁ সাহস গোটাওঁক।‘ সোণোৱালক কটাক্ষ কৰি ভট্টাচাৰ্য্যই এইদৰে কয়।
ইপিনে, সোণোৱালে ছাত্ৰ-ছাত্ৰীক আন্দোলনৰ পৰিৱৰ্তে অধ্যয়নত মনোনিবেশ কৰিবলৈ দিয়া পৰামৰ্শৰ প্ৰত্যুত্তৰ দি ভট্টাচাৰ্য্যই কয় ‘এইবাৰ ছাত্ৰ-ছাত্ৰীয়ে আন্দোলনো কৰিব লগতে পঢ়িবওঁ। তেওঁলোকে অধ্যয়নো কৰিব আৰু অসমখনক বচাব আৰু জাতিটোক বচাব। কিন্তু বাংলাদেশীৰ ভোটত দিল্লীৰ আজ্ঞাবাহী হৈ থকা ৰাজ্য চৰকাৰৰ মুখ্য মন্ত্ৰী আৰু মন্ত্ৰীসকলৰ কথা অসমৰ ৰাইজে নুশুনে।‘