যোৱা বছৰৰে “ব’হাগ বিহুৰ দিনা” অসমৰ প্ৰতিগৰাকী চৰকাৰী কৰ্মচাৰীক খাদি বস্ত্ৰ উপহাৰৰ সপোন আছিল মন্ত্ৰী হিমন্ত বিশ্ব শৰ্মাৰ।
কিন্তু দুটাকৈ ব’হাগ যোৱাৰ পিছতো এদিনৰ এশ চোলা বিতৰণতে হেৰাই গৈছে দক্ষতাৰ বাবে বিৰোধীৰো স্বীকৃতি পোৱা মন্ত্ৰীজনৰ সপোন।
কৰ্মচাৰীক উপহাৰৰূপে পিন্ধাব খোজা মন্ত্ৰী শৰ্মাৰ খাদি বস্ত্ৰ এতিয়া আগবাঢ়িছে মুকলি বিক্ৰীৰ মুখে। মিথ্যাচাৰত পৰিণত হৈছে সত্যকে জয় বোলা জাতিৰ পিতা গান্ধীজীৰ জয়ন্তীৰ দিনাই ২০১৭ চনত তদানীন্তন খাদি আৰু গ্ৰামোদ্যোগ মন্ত্ৰী হিমন্ত বিশ্ব শৰ্মা ঘোষিত প্ৰতিশ্ৰুতি।
খোদ খাদি ব’ৰ্দৰ অধ্যক্ষ কমলাকান্ত কলিতাই জনোৱা মতে অসমৰ চৰকাৰী কৰ্মচাৰীক খাদি যোগানৰ আঁচনিখনেই বন্ধ হৈ গৈছে।
ফলত বিপদত পৰা খাদি ব’ৰ্দে এতিয়া চৰকাৰী কৰ্মচাৰীৰ বাবে প্ৰস্তুত কাপোৰৰ মুকলি বিক্ৰী কৰি মোকলাব খুজিছে ঘূৰি নহা ধন।
চৰকাৰৰ পুঁজি মুকলি নোহোৱাৰ বাবেই কৰ্মচাৰীক উপহাৰ দিবলৈ অনা বস্ত্ৰ এতিয়া বিক্ৰী কৰি দিবলৈ তেওঁলোক সাজু হৈছে, জনায় কলিতাই।
লগতে পঢ়ক– বহাগ বিহুও গ’ল, মাহো গ’ল; ৰাজ্যত উৎপাদনেই নহ’ল : কৰ্মচাৰীক চৰকাৰে পিন্ধাব বহিঃৰাজ্যৰ খাদিবস্ত্ৰ
২০১৮চনৰ গান্ধী জয়ন্তীত যি এশটা চোলা উপহাৰ দি খোদ মুখ্য মন্ত্ৰী সৰ্বানন্দ সোণোৱালে আঁচনিখন আৰম্ভ কৰিছিল সেইকেইটাৰ পইচাও আজিলৈকে দিয়া নহ’ল ব’ৰ্ডক, কলিতাই জনায়।
তেওঁ জনোৱা মতে চৰকাৰৰ নিৰ্দেশত ব’ৰ্ডে নিজৰ পুঁজিৰেই প্ৰথম পৰ্য্যায়ত বিতৰণৰ বাবে প্ৰায় ২৫লাখ টকাৰ চাৰ্ট আৰু মহিলাৰ শ্বল সাজু কৰিছিল।
আশ্বৰ্য্যজনক কথাটো হ’ল, ব’ৰ্দৰ প্ৰাপ্য ধন মোকলাই নিদিয়াৰ পৰিৱৰ্তে বাজেটত কিন্তু আঁচনিটোৰ বাবে ঘোষিত হৈছিল ১৫কোটি টকা।
অধ্যক্ষ কমলাকান্ত কলিতাই নৰ্থ ইষ্ট নাও-ক কয়, “চৰকাৰে লোৱা এই আঁচনি মতে ১৫কোটি টকা বাজেটত ধাৰ্য্য হৈছিল। মন্ত্ৰীৰ নিৰ্দেশ অনুযায়ী যোৱা ২ অক্টোবৰত ১০০গৰাকী কৰ্মচাৰীক খাদি চাৰ্ট উপহাৰ দি এই আঁচনিৰ শুভাৰম্ভ কৰা হৈছিল। কিন্তু বিভিন্ন অজুহাতত ধাৰ্য্য হোৱা ১৫ কোটি টকা মোকলাই দিয়াৰ বাবে চৰকাৰৰ খাদি আৰু গ্ৰামোদ্যোগ বিভাগৰ পৰা বিত্ত বিভাগলৈ প্ৰস্তাৱ নপঠিয়ালে। যাৰ বাবে খাদি ব’ৰ্ডে চৰকাৰৰ পৰা টকা নোপোৱাত এই আঁচনি ইমানতেই স্থগিত ৰাখিবলগীয়া হ’ল।”
এতিয়া পঢ়ক ২০১৭ৰ গান্ধী জয়ন্তীত আঁচনি ঘোষণা কৰি মন্ত্ৰী হিমন্ত বিশ্ব শৰ্মাই দিয়া ভাষণ।
“অসম চৰকাৰে এটা সিদ্ধান্ত লৈছো, অসমৰ প্ৰতিগৰাকী চৰকাৰী কৰ্মচাৰীক আমি খাদি কাপোৰ উপহাৰ দিম। পুৰুষৰ কাৰণে দুটাকৈ চাৰ্ট আৰু মহিলাৰ কাৰণেও চুৰিদাৰ বা শাড়ী তেনেকুৱা কিবা দিয়া হ’ব। আমি বাজেটত ধন ধাৰ্য্য কৰিছো। দায়িত্বটো খাদি ব’ৰ্ডক দিছো। এই কামটো যাতে ৩১মাৰ্চৰ ভিতৰত শেষ কৰিব পাৰো তাৰ বাবে ক্ষিপ্ৰতাৰে ব্যৱস্থা ল’বলৈ মই খাদি ব’ৰ্ডক অনুৰোধ জনাম যাতে ব’হাগ বিহুৰ দিনা সকলোকে দুটাকৈ চাৰ্ট উপহাৰ হিচাপে দিব পাৰো।”
অসমীয়াৰ আয়ুস ৰেখা ব’হাগ বিহু দুটা গ’ল, অসমৰ চৰকাৰী কৰ্মচাৰী আজিও খাদিধাৰী নোহোৱাকৈয়ে ৰ’ল!
