“জাতীয় নায়ক হায় হায়”, “নাগৰিকত্ব সংশোধনী বিধেয়ক বাতিল কৰি চহিদৰ কেঁচা তেজৰ মূল্য দিয়ক” আদি ধ্বনিৰে আজি উত্তাল হ’ল দীঘলীপুখুৰীৰ পাৰ।
নাগৰিকত্ব সংশোধনী বিধেয়ক ২০১৬’ বাতিলৰ দাবীত সদৌ অসম জাতীয় চহিদ পৰিয়াল সমন্বয়ৰক্ষী পৰিষদে আজি ইয়াত অৱস্থান ধৰ্মঘট কাৰ্য্যসূচী ৰূপায়ন কৰে। পুৱা ১১ বজাৰ পৰা আৰম্ভ হোৱা এই অৱস্থান ধৰ্মঘট কাৰ্যসূচী বিয়লি ২ বজালৈকে চলি থাকিব।
তদুপৰি, প্ৰতিবাদকাৰী সকলে “জাতীয় নায়ক সৰ্বানন্দ সোনোৱাল হায় হায়”, “চহিদৰ কেঁচা তেজৰ মূল্য দিয়ক”, “অসম চুক্তি ৰূপায়ণ কৰক”, ৰাষ্ট্ৰীয় নাগৰিক পঞ্জীত থকা আঁসোৱাহ দূৰ কৰি শুদ্ধ এনআৰচি প্ৰস্তুত কৰক”, চহিদ-নিৰ্য্যাতিত পৰিয়ালক সংস্থাপন কৰক” ইত্যাদি ধ্বনিৰে দীঘলী পুখুৰীৰ পাৰ কপাঁই তোলে।
সদৌ অসম জাতীয় চহিদ সমন্বয়ৰক্ষী পৰিষদৰ অৱস্থান ধৰ্মঘট কাৰ্য্যসূচীত সদৌ অসম ছাত্ৰ সন্থাৰ উপদেষ্টা সমুজ্জল কুমাৰ ভট্টাচাৰ্যও উপস্থিত হয় প্ৰতিবাদকাৰীসকলৰ লগত অৱস্থানত বহে।
উক্ত অৱস্থান ধৰ্মঘট কাৰ্যসূচীত কিছু সময়ৰ বাবে উপস্থিত হৈ বিশিষ্ট কন্ঠশিল্পী মহেন্দ্ৰ হাজৰিকাই “চহিদ প্ৰণামো তোমাক” শীৰ্ষক গীতটিৰ লগতে অন্য দুই এক দেশপ্ৰেমমূলক গীতেৰে প্ৰতিবাদকাৰীসকলক উৎসাহিত কৰে।
উক্ত অৱস্থান ধৰ্মঘট কাৰ্যসূচীত অংশগ্ৰহণ কৰা পৰিষদৰ সভাপতি ৰাজেন ডেকাই সংবাদ মাধ্যমৰ আগত কয়, “৮৫৫ জন চহিদে নিজৰ জীৱন উচৰ্গা কৰিলে। হেজাৰজনে নিজৰ জীৱন ঘুণীয়া কৰিলে তথা এইসকলৰ ত্যাগৰ বিনিময়ত স্বাক্ষৰিত হোৱা অসম চুক্তিৰ ৩৮ বছৰ পাৰ হ’ল কিন্তু অসম চুক্তি সফল ৰূপায়ণ নহ’ল।”
তেওঁ লগতে জাতিধ্বংসী নাগৰিকত্ব সংশোধনী বিধেয়ক ২০১৬’ বাতিলৰ দাবী জনোৱাৰ লগতে অসম চুক্তি ৰূপায়ণ কৰিবৰ বাবে আহ্বান জনায়।
তদুপৰি অসম অন্দোলনৰ চহিদ আৰু নিৰ্য্যাতিত পৰিয়ালৰ লোকসকলক সংস্থাপনৰ বাবে দাবী জনায়।
প্ৰতিবাদকাৰীসকলে অৱস্থান ধৰ্মঘটৰ অন্তত উক্ত দাবীসমূহ সম্বলিত এখন স্মাৰক পত্ৰ ৰাজ্যপাললৈ প্ৰেৰণ কৰিব।
