তিনিচুকীয়া জিলাৰ মাকুমত অসম আৰক্ষীৰ এজন কমাণ্ডোক দেওবাৰে নিশা একাংশ দুৰ্বৃত্তই খেদি খেদি ঘপিয়াই অতি নৃশংসভাৱে হত্যা কৰে। দুৰ্বৃত্তৰ হাতত নিহত অসম আৰক্ষীৰ কমাণ্ডোজনক গিৰীশ দত্ত বুলি চিনাক্ত কৰা হৈছে।
ঘটনাৰ বিৱৰণি মতে অসম আৰক্ষীৰ কমাণ্ডো গিৰীশ দত্তই দেওবাৰে নিশা টিংৰাইত অনুষ্ঠিত এক সাংস্কৃতিক অনুষ্ঠআনৰ পৰা আহি আছিল। বাটতে একাংশৰ সৈতে কোনো কথাক লৈ গিৰীশ দত্তৰ মাজত তৰ্কাতৰ্কি হয়।
ইয়াৰ পিছতে গিৰীশ দত্তই ঘটনাস্থলী ত্যাগ কৰি নিজৰ ঘৰলৈ যায়। কিন্তু দুৰ্বৃত্তৰ দলটোৱে গিৰীশৰ পিছে পিছে গৈ গিৰীশৰ ঘৰত উপস্থিত হয়গৈ। আৰু গিৰীশক ঘৰৰ পৰা ৰাস্তালৈ মাতি আনি অতি নৃশংসভাৱে খেদি খেদি ঘপিয়াই হত্যা কৰে।
আনকি ঘটনা সংঘটিত হোৱাৰ সময়ত ঘটনাস্থলীত উপস্থিত থকা গিৰীশৰ দেউতাকে দুৰ্বৃত্তৰ দলটোক নামাৰিবৰ বাবে অনুৰোধ কৰাৰ পিছতো দুৰ্বৃত্তৰ দলটোৱে কমাণ্ডোজনক ৰেহাই নিদিলে।
আনহাতে আজি এই ঘটনাক কেন্দ্ৰ কৰি মাকুমত তীব্ৰ উত্তেজনাৰ সৃষ্টি হয়। স্থানীয় ৰাইজে ঘটনাৰ লগত জড়িত দুৰ্বৃত্তৰ দলটো তথা দোষীক অতি শীঘ্ৰে গ্ৰেপ্তাৰ কৰাৰ দাবীত ৰাষ্ট্ৰীয় ঘাইপথ অৱৰোধ কৰি প্ৰতিবাদ সাব্যস্ত কৰে।
