অসম আৰক্ষীয়ে শেহতীয়াকৈ এনকাউণ্টাৰেৰে অসমত পুলিচৰাজ প্ৰতিষ্ঠা কৰিবলৈ চেষ্টা কৰি থকাৰ সময়তে এইবাৰ পোহৰলৈ আহিছে আন এক ভয়ানক কাণ্ড। বাৰে বাৰে ন্যায়ালয়ত মুখ থেকেচা খোৱাৰ পিছতো, বাৰে বাৰে সচেতন লোকসকলে আহ্বান কৰি অহাৰ পিছতো অসম আৰক্ষীয়ে এনকাউণ্টাৰ কৰিবলৈ এৰা নাই।
ন্যায় ব্যৱস্থালৈ কেৰেপ নকৰি এনকাউণ্টাৰেৰে চমক সৃষ্টি কৰি জনসাধাৰণৰ আশ্বাসৰ পাত্ৰ হ’ব খোজা অসম আৰক্ষীৰ হাতত এইবাৰ প্ৰাণ গ’ল আকৌ এজন সাধাৰণ নাগৰিকৰ। ডকাইটিৰ গোচৰত অভিযুক্ত ওদালগুৰিৰ কেনাৰাম বসুমতাৰীক গুলী কৰি হত্যা কৰিব খোজা আৰক্ষীৰ গুলীত কেনাৰাম বসুমতাৰীৰ সলনি প্ৰাণ হ’ল ডিম্বেশ্বৰ মুছাহাৰী নামৰ এগৰাকী নীৰিহ লোকৰ।
উল্লেখ্য যে যোৱা শুক্ৰবাৰে নিশা ডকাইটিৰ গোচৰত অভিযুক্ত কেনাৰাম বসুমতাৰী আৰক্ষীৰ এনকাউণ্টাৰত নিহত হোৱা বুলি সংবাদ মাধ্যমত খবৰ বিয়পি পৰিছিল। কিন্তু শনিবাৰে দিনত এই কথা পোহৰলৈ আহে যে আৰক্ষীয়ে এনকাউন্টাৰৰ নামত হত্যা কৰা ব্যক্তিজন আচলতে ডকাইত হিচাপে অভিযুক্ত কেনাৰাম নহয়। আৰক্ষীয়ে কেনাৰাম বসুমতাৰী বুলি ভাবি গুলীয়াই হত্যা কৰে ডিম্বেশ্বৰ মু্ছাহাৰী নাম অন্য এজন ব্যক্তিকহে।
উল্লেখ্য যে ডিম্বেশ্বৰ মুছাহাৰী হৈছে এগৰাকী সাধাৰণ দৰিদ্ৰ নাগৰিক। ডকাইটিৰ সৈতে কোনো সম্পৰ্ক নাই ডিম্বেশ্বৰ মুছাহাৰীৰ। আৰক্ষীৰ অতপালিত প্ৰাণ হেৰুওৱা ডিম্বেশ্বৰ মুছাহাৰী পৰিয়ালটোত এতিয়া শোকৰ বন্যা।
এতিয়া প্ৰশ্ন হয়, আৰক্ষী কিম্বা চৰকাৰে এতিয়া কি উত্তৰ দিব ডিম্বেশ্বৰ মুছাহাৰীৰ পৰিয়ালটোৰ আগত? এনকাউণ্টাৰক সমৰ্থন কৰা চৰকাৰ কিম্বা সাধাৰণ জনতাই কি ক’ব এই ঘটনাৰ পিছত? এই মুহূৰ্তত এই প্ৰশ্নই উত্থাপন হৈছে সকলোৰে মনত।
