কেন্দ্ৰ চৰকাৰৰ সন্ত্ৰাসবাদৰ বিৰুদ্ধে শূন্য সহনশীল নীতিৰ বিষয়ে উল্লেখ কৰি কেন্দ্ৰীয় চৰকাৰৰ গৃহ ৰাজ্যিক মন্ত্ৰী জি কিষাণ ৰেড্ডীয়ে সোমবাৰে ভাৰতৰ আভ্যন্তৰীণ সুৰক্ষা ব্যৱস্থা উন্নত হোৱা বুলি মন্তব্য কৰে।
ৰেড্ডীয়ে ইয়াৰ ফলত আৰক্ষী বিষয়া আৰু সাধাৰণ নাগৰিকৰ হতাহত হোৱা ঘটনাও হ্ৰাস পাইছে বুলি কয়।
সোমবাৰে অসমত আৰক্ষী স্মৰণ দিৱস উপলক্ষ্যে অনুষ্ঠিত হোৱা এক অনুষ্ঠানত অংশগ্ৰহণ কৰি ৰেড্ডীয়ে এনেদৰে মত প্ৰকাশ কৰে।
ভাৰতীয় সুৰক্ষা বাহিনীয়ে দেশৰ আভ্যন্তৰীণ সুৰক্ষাৰ প্ৰতি আহিব পৰা সকলো ধৰণৰ ভাবুকিৰ সৈতে মোকাবিলা কৰিবলৈ সম্পুৰ্ণৰূপে সক্ষম বুলিও কেন্দ্ৰীয় মন্ত্ৰী গৰাকীয়ে কয়।
‘‘অসম আৰক্ষীৰ জোৱানসকলে আইন শৃংখলা ৰক্ষাৰ ক্ষেত্ৰত সন্ত্ৰাসবাদীৰ বিৰুদ্ধে হোৱা সংঘৰ্ষত, সীমান্ত অঞ্চলৰ সুৰক্ষা ব্যৱস্থা নিয়ন্ত্ৰণৰ ক্ষেত্ৰত নিজৰ আত্মবলিদান দি আহিছে,’’ ৰেড্ডীয়ে কয়।
ভাষণ প্ৰসংগত ৰেড্ডীয়ে ১৯৬৪ চনৰ পৰা বৰ্তমানলৈ ৮৭৯ গৰাকী অসম আৰক্ষীৰ জোৱানে আইন শৃংখলা ৰক্ষাৰ নিমিত্তে প্ৰাণ আহুতি দিয়া বুলি উল্লেখ কৰে।
বহু দশক ধৰি অসম আৰক্ষীয়ে উগ্ৰবাদী আৰু সন্ত্ৰাসবাদীৰ বিপক্ষে শান্তি প্ৰতিষ্ঠাৰ ক্ষেত্ৰত চলাই অহা অভিযানত নিজৰ দক্ষতা আৰু সক্ষমতাৰো প্ৰমাণ দাঙি ধৰিছে বুলি কেন্দ্ৰীয় মন্ত্ৰী গৰাকীয়ে অসম আৰক্ষীক প্ৰশংসা কৰে।
আৰক্ষী জোৱান সকলৰ আত্মবলিদানে অসমৰ সুৰক্ষা ব্যৱস্থাৰ মান সম্পুৰ্ণৰূপে সলনি কৰি তোলাৰ লগতে ৰাজ্যখনত শান্তি আৰু সমৃদ্ধি প্ৰতিষ্ঠাৰে নিয়োগৰ সুযোগ বৃদ্ধি কৰাত উল্লেখযোগ্য বৰঙণি যোগাই আহিছে বুলি ৰেড্ডীয়ে মত প্ৰকাশ কৰে।
সমগ্ৰ অসমে প্ৰধান মন্ত্ৰী নৰেন্দ্ৰ মোদীৰ পূবলৈ চোৱা নীতিক সঁচা অৰ্থত প্ৰয়োগেৰে আগবাঢ়ি যাবলৈ সক্ষম হৈছে বুলিও তেওঁ কয়।
আনহাতে, সংবাদ মাধ্যমৰ সৈতে হোৱা মুখামুখিত কেন্দ্ৰীয় মন্ত্ৰীগৰাকীয়ে উত্তৰ-পূবৰ সকলো উগ্ৰপন্থী সংগঠনক অস্ত্ৰ সম্বৰণ কৰি মূল সুতিলৈ উভতি আহি দেশৰ প্ৰগতিত অৰিহণা যোগাবলৈ আহ্বান জনায়।
