যোৱা শুকুৰবাৰে (৩ মে’) ভাৰতৰ অংগৰাজ্য মণিপুৰত সংঘটিত হোৱা হিংসাত্মক পৰিস্থিতিৰ এবছৰ সম্পূৰ্ণ হ’ল। এই সময়ছোৱাত প্ৰধানমন্ত্ৰী নৰেন্দ্ৰ মোদীয়ে হিংসাৰ জুইত জ্বলি থকা এই উত্তৰ-পূৰ্বাঞ্চলৰ ৰাজ্যখনলৈ এবাৰো ভ্ৰমণ কৰা নাছিল যদিও আনফালে দেশৰ অন্যান্য ৰাজ্যলৈ ১৬২ বাৰ চৰকাৰী আৰু বেচৰকাৰী ভ্ৰমণ কৰিছে৷
এই সময়ছোৱাত প্ৰধানমন্ত্ৰী মোদীয়ে বিদেশতো ১৪টা চৰকাৰী ভ্ৰমণ কৰিছিল, আৰু এই ভ্ৰমণসমূহ কৰিছিল যেতিয়া মণিপুৰ হিংসাৰ জুইত জ্বলি আছিল, যাৰ ফলত ২৩০ জন লোকৰ মৃত্যু হৈছিল আৰু ৬০ হাজাৰৰো অধিক লোক গৃহহীন হৈ পৰিছিল। ৰাজ্যত ভাৰতীয় জনতা পাৰ্টিৰ চৰকাৰ আৰু হিংসাত্মক পৰিস্থিতিৰ মাজতো মুখ্যমন্ত্ৰী এন. বীৰেন সিং নিজৰ পদত আছে আৰু তেওঁৰ বা আন কোনো মন্ত্ৰীৰ বিৰুদ্ধে কোনো ব্যৱস্থা গ্ৰহণ কৰা হোৱা নাই।
মণিপুৰত প্ৰধানমন্ত্ৰীৰ অনুপস্থিতিত বিৰোধীয়ে সদায় প্ৰশ্ন উত্থাপন কৰি আহিছে। মণিপুৰ যেতিয়া হিংসাৰ কবলত আছিল তেতিয়া কংগ্ৰেছ নেতা ৰাহুল গান্ধীয়ে ৰাজ্যখন ভ্ৰমণ কৰিছিল। পিছলৈ মণিপুৰৰ পৰাই তেওঁৰ ‘ভাৰত জোডো ন্যায় যাত্ৰা’ও আৰম্ভ কৰে।
পিএমঅ’ৰ ৱেবছাইটৰ পৰা বিবিচি হিন্দীয়ে সংগ্ৰহ কৰা তথ্য অনুসৰি ২০২৩ চনৰ মে’ৰ পৰা ২০২৪ চনৰ এপ্ৰিলৰ ভিতৰত প্ৰধানমন্ত্ৰী মোদীয়ে সৰ্বাধিক ২৪বাৰ ৰাজস্থান ভ্ৰমণ কৰিছে। একে সময়তে তেওঁ ২২ বাৰ মধ্যপ্ৰদেশতো ভ্ৰমণ কৰিছিল। বিগত বৰ্ষৰ নৱেম্বৰ মাহত দুয়োখন ৰাজ্যতে বিধানসভা নিৰ্বাচন অনুষ্ঠিত হৈছিল আৰু তাতেই প্ৰধানমন্ত্ৰী মোদীয়ে বিজেপিৰ হৈ ব্যাপক প্ৰচাৰ চলাইছিল।
মণিপুৰত যেতিয়া হিংসাত্মক পৰিস্থিতি আৰম্ভ হৈছিল তেতিয়া কৰ্ণাটকৰ বিধানসভা নিৰ্বাচনৰ প্ৰচাৰত ব্যস্ত আছিল প্ৰধানমন্ত্ৰী মোদীব। বিবিচিৰ তথ্য অনুসৰি যোৱা এবছৰত তেওঁ ৮বাৰ কৰ্ণাটক ভ্ৰমণ কৰিছিল। এই সময়ছোৱাত তেওঁ নিজৰ গৃহ ৰাজ্য গুজৰাট ১০ বাৰ আৰু লোকসভাৰ সৰ্বাধিক আসন থকা ৰাজ্য উত্তৰ প্ৰদেশলৈ ১৭ বাৰ ভ্ৰমণ কৰে।
চলিত বৰ্ষৰ ফেব্ৰুৱাৰী-মাৰ্চ মাহত প্ৰধানমন্ত্ৰী মোদীয়ে উত্তৰ-পূৰ্বাঞ্চলৰ ৰাজ্যসমূহৰ ভিতৰত অসম, ত্ৰিপুৰা আৰু অৰুণাচল প্ৰদেশ ভ্ৰমণ কৰিছিল যদিও মণিপুৰ ভ্ৰমণ কৰা নাছিল। তিনিবাৰকৈ অসম ভ্ৰমণ আৰু ত্ৰিপুৰা আৰু অৰুণাচল প্ৰদেশলৈ এবাৰ ভ্ৰমণ কৰে।চৰকাৰী তথ্য অনুসৰি ৯ মাৰ্চত প্ৰধানমন্ত্ৰী মোদীয়ে ‘ভাৰত বিকাশ, উত্তৰ-পূব বিকাশ’ কাৰ্যসূচীৰ বাবে অৰুণাচল প্ৰদেশ ভ্ৰমণ কৰিছিল।
যোৱা বছৰৰ নৱেম্বৰ মাহত পাঁচখন ৰাজ্যৰ বাবে অনুষ্ঠিত হোৱা বিধানসভা নিৰ্বাচনৰ সময়ত প্ৰধানমন্ত্ৰী মোদীয়ে আন সকলো ৰাজ্যতে তীব্ৰ প্ৰচাৰ চলাইছিল যদিও মিজোৰামলৈ যোৱা নাছিল। মিজোৰাম মণিপুৰৰ গাতে লাগি থকা এখন ৰাজ্য, য’ত মণিপুৰৰ হিংসাত্মক পৰিস্থিতিত স্থানচ্যুত হোৱা কুকি সম্প্ৰদায়ৰ লোকে বৃহৎ সংখ্যক প্ৰব্ৰজন কৰিছিল।ঘৰুৱা ভ্ৰমণৰ উপৰিও ২০২৩ চনৰ মে’ মাহৰ পৰা ১৪টা আন্তঃৰাষ্ট্ৰীয় ভ্ৰমণো কৰিছিল প্ৰধানমন্ত্ৰী মোদীয়ে। এই সময়ছোৱাত তেওঁ ইউ এ ইৰ এটা হিন্দু মন্দিৰৰ উদ্বোধনী অনুষ্ঠানতো অংশ লৈছিল।