জাতিধ্বংসী বিধেয়কৰ ওপৰত ৰাষ্ট্ৰপতিৰ হস্তক্ষেপ বিচাৰিলে প্ৰদেশ কংগ্ৰেছে
নাগৰিকত্ব সংশোধনী বিধেয়ক, ২০১৬ বাতিলৰ দাবীত ৰাজ্যৰ চৌদিশে ক্ষোভৰ জুই চলি থকাৰ সময়তে অসম প্ৰদেশ কংগ্ৰেছ কমিটিয়ে এই জাতিধ্বংসী নাগৰিকত্ব বিধেয়কৰ ওপৰত ওপৰত ৰাষ্ট্ৰপতিৰ হস্তক্ষেপ বিচাৰি আজি এখন স্মাৰকপত্ৰ প্ৰেৰণ কৰে।
উল্লেখযোগ্য যে জাতিধ্বংসী বিধেয়কৰ বিৰুদ্ধে সমগ্ৰ ৰাজ্যজুৰি আজি কংগ্ৰেছে ৫ ঘণ্টীয়া অনশনৰ কাৰ্য্যসূচী ৰূপায়ণ কৰে। ইয়াৰ সমান্তৰালকৈ গুৱাহাটীৰ দিচপুৰ প্ৰেছ ক্লাবৰ সন্মুখত প্ৰদেশ কংগ্ৰেছেও পাঁচঘণ্টীয়া অনশন কআৰ্য্যসূচী গ্ৰহণ কৰে। অনশনৰ পিছত জিলা উপায়ুক্তৰ জৰিয়তে ৰাষ্ট্ৰপতিলৈ এখন স্মাৰকপত্ৰ প্ৰেৰণ কৰে বুলি জানিবলৈ দিয়ে প্ৰদেশ কংগ্ৰেছৰ সভাপতি ৰিপুন বৰাই।
‘বিলখনক কেন্দ্ৰ কৰি অসম অগ্নিগৰ্ভা হৈছে তথা এই বিলখন সংবিধান বিৰোধী। লগতে এই বিলখনে অসম তথা উত্তৰ-পূৰ্বাঞ্চললৈ ভয়াবহ বিপদ নমাই আনিব’ অনশনত অংশ গ্ৰহণ কৰি ৰিপুন বৰাৰ মন্তব্য।
সেই পৰিপ্ৰেক্ষিততে বিলখন সম্পূৰ্ণৰূপে বাতিল কৰিবৰ বাবে কেন্দ্ৰীয় চৰকাৰক দাবী জনোৱাৰ লগতে ৰাষ্ট্ৰপতিলৈ প্ৰেৰণ কৰা স্মাৰকপত্ৰতো উপৰোক্ত কথাখিনি উল্লেখ কৰা বুলি বৰাই সাংবাদিকক জানিবলৈ দিয়ে।
তাৰোপৰি ৰাজ্যসভাত জাতিধ্বংসী বিলখন প্ৰতিহত কৰাৰ কৌশলো সংবাদ মাধ্যমৰ জৰিয়তে ৰিপুন বৰাই বৰ্ণনা কৰে।
তেওঁ কয় যে ‘কংগ্ৰেছ আৰু ইয়াৰ সমভাৱাপন্ন সকলো বিৰোধী দলেই ৰাজ্যসভাত একত্ৰিত হৈ যুঁজ দিব লাগিব। বিৰোধী দলসমূহৰ সৈতে কংগ্ৰেছে ইতিমধ্যেই যোগাযোগ চলাইছে।‘
অলপতে হৈ যোৱা ৰাজ্যসভাৰ অধিবেশনত বিলখন উত্থাপন হোৱাৰ পূৰ্বে কংগ্ৰেছে বিলখন ৰখোৱা বুলি দাবী কৰি বৰাই কয় যে ‘কংগ্ৰেছৰ সাধাৰণ সম্পাদক হৰিশ ৰাৱাতৰ লগতে আহমেদ পেটেল, গোলাম নবী আজাদে মিলি কৌশল ৰচনা কৰি ৰাজ্যখনত বিলখন উত্থাপন হোৱাৰ পৰা সাময়িকভাৱে বিৰত ৰাখিছিল।’