যোৱা ২৩ জানুৱাৰিত দিচপুৰ আৰক্ষীয়ে গ্ৰেপ্তাৰ কৰা অসম যুৱ কংগ্ৰেছৰ ৰাজ্যিক সভাপতি কামৰুল ইছলাম চৌধুৰীয়ে কেন্দ্ৰীয় কাৰাগাৰৰ পৰা মুক্তি লাভ কৰিবলৈ সক্ষম হয়।
বুধবাৰে ন্যায়াধীশ ৰুমী কুমাৰী ফুকনৰ আদালতে কামৰুল ইছলামৰ জামিন মঞ্জুৰ কৰে।
উল্লেখ্য যে যোৱা ১১ ডিচেম্বৰত নাগৰিকত্ব সংশোধনী বিধেয়কৰ বিৰুদ্ধে গুৱাহাটীত সাব্যস্ত হোৱা তীব্ৰ প্ৰতিবাদী কাৰ্যসূচীৰ সময়ত সংঘটিত হিংসাত্মক কাৰ্যসূচীৰ সৈতে জড়িত থকাৰ অভিযোগত গ্ৰেপ্তাৰ হৈছিল কামৰুল ইছলাম।
তেওঁৰ বিৰুদ্ধে ভাৰতীয় দণ্ডবিধিৰ১২০(বি)/১২১(এ)/১২২/১২৩/১৪৩/১৪৮/১৫০/১৫২/১৫৩/১৫৩(এ)/৩২৬/৩৩৩/৩৫৩/৪২৭/৪৩৬ ধাৰাত ৩০/২০১৯ত এক গোচৰ ৰুজু হৈছিল।
কামৰুল ইছলাম মুকলি আকাশৰ তললৈ অহাৰ পিছতেই প্ৰদেশ কংগ্ৰেছৰ একাংশ বিষয়ববীয়াই চৰকাৰক তীব্ৰ সমালোচনা কৰে।
কংগ্ৰেছৰ মতে CAA বিৰোধী আন্দোলনত সবলভাৱে অংশগ্ৰহণ কৰি চৰকাৰৰ জাতি বিৰোধী কাম কাজৰ বিৰুদ্ধে মাত মতা বাবে সম্পূৰ্ণ প্ৰতিশোধমূলক আৰু ষড়যন্ত্ৰমূলকভাৱে গ্ৰেপ্তাৰ কৰি জেইললৈ নিক্ষেপ কৰা হৈছিল অসম প্ৰদেশ যুৱ কংগ্রেছৰ সভাপতি গৰাকীক।
ইফালে আজি দিনৰ প্ৰায় ১১.৩০ মান বজাত গুৱাহাটীৰ ৰাজীৱ ভৱনত কামৰুল ইছলামে ৰাজ্যৰ সাম্প্ৰতিক পৰিস্থিতি আৰু যুৱ কংগ্রেছৰ কৰ্মপন্থাৰ সংক্ৰান্তত এখন সংবাদ মেলৰ আয়োজন কৰিছে বুলি জানিব পৰা গৈছে।
