মন্ত্ৰী ভৱেশ কলিতাৰ ছত্ৰছায়াত জলসিঞ্চন বিভাগত বহিছে চাকৰিৰ বজাৰ। মন্ত্ৰীজনৰ ঘনিষ্ঠ জলসিঞ্চন বিভাগৰ এজন সহকাৰী কাৰ্যবাহী অভিযন্তাৰ নেতৃত্বত চাকৰি দিয়াৰ নামত ব্যাপক ধন সংগ্ৰহৰ অভিযোগ আনিছে আছাম পাব্লিক ৱৰ্কছে।
শনিবাৰে গুৱাহাটীত এক সংবাদমেল অনুষ্ঠিত কৰি আছাম পাব্লিক ৱৰ্কছৰ সভাপতি অভিজিৎ শৰ্মাই নিযুক্তিৰ নামত ইতিমধ্যে চাকৰি প্ৰত্যাশী বহু প্ৰাৰ্থীৰ পৰা ৩ লাখ টকাকৈ উৎকোচ সংগ্ৰহ কৰা হৈছে বুলি অভিযোগ উত্থাপন কৰে।
তেওঁ কয়, ‘অতি শীঘ্ৰেই জলসিঞ্চন বিভাগত প্ৰায় ৮০০ টা পদত নিযুক্তি আৰম্ভ হ’ব আৰু এই নিযুক্তি প্ৰক্ৰিয়াৰ পূৰ্বেই প্ৰাৰ্থিত্ব প্ৰয়াসীৰ পৰা মনেশ্বৰ ডেকা নামৰ এজন সহকাৰী কাৰ্যবাহী অভিযন্তাৰ নেতৃত্বত উৎকোচ সংগ্ৰহ আৰম্ভ হৈছে’।
‘বিষয়াজনৰ সৈতে তেওঁৰ এই কামত সহযোগ কৰিছে তেওঁৰ বিশ্বস্ত মৃগেন বড়ো আৰু পৱিত্ৰ ডেকাই।‘ শৰ্মাই কয়।
উল্লেখযোগ্য যে কাৰ্যবাহী অভিযন্তা নিযুক্তি নিদিয়াকৈ বিগত এটা বছৰে জলসিঞ্চন মন্ত্ৰী ভৱেশ কলিতাই তেওঁৰ ঘণিষ্ঠ মনেশ্বৰ ডেকাক বিভাগটোৰ গুৱাহাটী সংমণ্ডলৰ কাৰ্যবাহী অভিযন্তাৰ চকীত বহুৱাই ৰাখিছে।
আনহাতে মনেশ্বৰ ডেকাৰ নেতৃত্বত চলা উক্ত বিয়াগোম নিযুক্তি কেলেংকাৰিত মন্ত্ৰীজনৰ এজন পুৰুষ খুলশালিও জড়িত থকাৰ গুৰুতৰ অভিযোগ আনে অভিজিৎ শৰ্মাই।
তদুপৰি ইতিমধ্যে গুৱাহাটী সংমণ্ডলৰ জলসিঞ্চনৰ তিনিখন বৃহৎ আঁচনিৰ কাম সম্পূৰ্ণ নকৰাকৈ বিভাগীয় মন্ত্ৰীৰ ঘনিষ্ঠ হোৱাৰ সুবাদতে মনেশ্বৰ ডেকাই ধন আত্মসাৎ কৰা বুলিও সংবাদমেলত শৰ্মাই অভিযোগ উত্থাপন কৰে।
