শনিবাৰে মন্ত্ৰী হিমন্ত বিশ্ব শৰ্মাই সংবাদমেলযোগে ৰাজ্য চৰকাৰৰ কৰ্মচাৰী আৰু পেঞ্চনাৰ সকলক ঘৰৰ কাষতে থকা দৰিদ্ৰ লোকসকলক সহায় কৰিবৰ বাবে আহ্বান জনাইছিল। আৰু ইয়াৰ পাছতে আৰ্তজনক সহায়ৰ বাবে আগবাঢ়ি আহিছে শিল্পী ৰাজকুমাৰ ঠাকুৰীয়া।
মিৰ্জা বা তাৰ কাষৰ স্থানীয় ৩০টা অতি দৰিদ্ৰ পৰিয়ালক ৫ কেজিকৈ চাউল বিতৰণৰ কথা ঘোষণা ৰাজকুমাৰ ঠাকুৰীয়াৰ। নিজৰ ফে’চবুক প’ষ্টত ঠাকুৰীয়াই এই কথা জনায়।
অৱশ্যে ল’কডাউন শেষ হোৱাৰ পাছতহে দৰিদ্ৰ লোকসকলক সহায়ৰ হাত আগবঢ়াব বুলি ঠাকুৰীয়াই উল্লেখ কৰে।
“বৰ্তমান ল’কডাউন চলি থকাৰ বাবে আমাৰ কাষৰ দোকানসমূহত খাদ্য বস্তুৰ নাটনি হৈছে। সৰহকৈ সামগ্ৰী ক্ৰয় কৰাত অসুবিধা হয়। এই সময়ছোৱাত বাহিৰলৈ বেছি ওলাব নোৱাৰি বাবে বস্তু যোগাৰ কৰাত অসুবিধা হৈছে। সেয়েহে ল’কডাউন শেষ হোৱাৰ পিছতহে এইসকল দৰিদ্ৰ লোকক সহায় কৰিম।” ঠাকুৰীয়াই নৰ্থ-ইষ্ট নাওৰ সাংবাদিকৰ আগত কয়।
তেওঁ আৰু কয় “একেবাৰে অসহায় লোকসকলক মই সহায় কৰিম। কিছুমানে চাকৰি কৰি থাকিও হাতত মোনা লৈ সহায় বিচাৰি আহে, কিছুমানে ঘৰত ভাং খাই বহি থাকি সহায় বিচাৰি আহে, তেনে লোকক সহায় নকৰো। পূৰ্বতেও মই এনেদৰে দৰিদ্ৰ লোকক সহায় কৰিছোঁ।”
জাতি ধৰ্ম বৰ্ণ নিৰ্বিশেষে তেওঁ দৰিদ্ৰ লোকসকলক সহায় কৰিব বুলি সদৰী কৰে। উল্লেখযোগ্য যে সংগীত আৰু অভিনয় চর্চাত ব্যস্ত ৰাজকুমাৰ ঠাকুৰীয়া এজন পেঞ্চনাৰ।
