অসমৰ প্ৰথমগৰাকী ব্লেক ফাংগাছ ৰোগীৰ মৃত্যু হৈছে।
নগাঁও জিলাৰ ধিঙৰ পলমণি বৰা নামৰ ২৭ বছৰীয়া যুৱকজন ব্লেক ফাংগাছ ৰোগত আক্ৰান্ত হৈ বুধবাৰে গুৱাহাটীস্থিত এপল’ হাস্পতালত মৃত্যু হয়।
সংকটজনক অৱস্থাত পলমণি বৰাক যোৱা ১৬ মে’ত এপল’ হাস্পতালত ভৰ্তি কৰোৱা হৈছিল।
এপল’ হাস্পতাল কৰ্তৃপক্ষ প্ৰকাশ কৰা অনুসৰি কৰোনাৰ পৰা আৰোগ্য হোৱাৰ পিছতে যোৱা ১৫ মে’ৰ পৰা পলমণি বৰাৰ দুয়োটা চকুৰে দৃষ্টিশক্তি হ্ৰাস পাবলৈ ধৰে আৰু ১৬ মে’ত তেওঁক সংকটজনক অৱস্থাত হাস্পতালখনত ভৰ্তি কৰোৱা হয়।
এপল’ হাস্পতালৰ কৰ্তৃপক্ষই কয় “কৰোনাৰ পৰা আৰোগ্য লাভ কৰা পিছত ৰোগীজনৰ শৰীৰত ডাইবেটিছকে আদি কৰি বিভিন্ন সমস্যাই দেখা দিয়ে আৰু তেওঁৰ একাধিক অংগ লাহে লাহে বিকল হ’বলৈ আৰম্ভ কৰে। চিকিৎসকৰ এটা দলে সৰ্বতোপ্ৰকাৰে তেওঁক বচাবলৈ চেষ্টা কৰে যদিও ১৯ মে’ৰ পুৱা ৬ বজাত তেওঁৰ মৃত্যু হয়।”
উল্লেখ্য যে যোৱা ১৮ মে’ৰ নিশা পলমণি বৰা অসমৰ প্ৰথমগৰাকী ব্লেক ফাংগাছ ৰোগী বুলি হাস্পতালখনৰ কৰ্তৃপক্ষই সদৰী কৰিছিল যদিও তাৰ পিছ দিনা অৰ্থাৎ ১৯ মে’ৰ পুৱা ভাগত গুৱাহাটী চিকিৎসা মহাবিদ্যালয়ৰ অধ্যক্ষ ডাঃ অচ্যুৎ কুমাৰ বৈশ্যই অসমত ব্লেক ফাংগাছ ৰোগী ওলোৱা নাই বুলি ঘোষণা কৰিছিল।
ইয়াৰ পিছতে পলমণি বৰা ব্লেক ফাংগাছ ৰোগত মৃত্যু হৈছে নে নাই সেই লৈ এক দোধোৰ-মোধোৰ অৱস্থাৰ সৃষ্টি হয়।
অৱশেষত এপল’ হাস্পতাল কৰ্তৃপক্ষই ১৯ মে’ৰ ৰাতিলৈ পলমণি বৰা ব্লেক ফাংগাছ ৰোগত আক্ৰান্ত হৈ মৃত্যু হোৱা বুলি নিশ্চিতি প্ৰদান কৰে।
ইয়াৰ লগে লগে অসমত প্ৰথমগৰাকী ব্লেক ফাংগাছ ৰোগী ধৰা পৰাৰ লগতে তেওঁৰ মৃত্যু হোৱাতো নিশ্চিত হ’ল।
