ক্লাইমেট ফ’ৰ্চ আৰ্কটিক এক্সপেডিশ্যনত ভাৰতক প্ৰতিনিধিত্ব কৰিব অসমৰ ঋতুৰাজে

সুমেৰু অঞ্চললৈ যাবলগীয়া এটা অভিযানকাৰী দলত অন্তৰ্ভুক্ত অসমৰ ঋতুৰাজ ফুকন। ঋতুৰাজে ক্লাইমেট ফ’ৰ্চ আৰ্কটিক এক্সপেডিশ্যন ২০১৯ (Climate force arctic expedition 2019)ত ভাৰতক প্ৰতিনিধিত্ব কৰিব।

উল্লেখযোগ্য যে বতৰ পৰিৱৰ্তন আৰু সুমেৰুৰ বৰফ গলাৰ সম্পৰ্কে অধ্যয়ন কৰিব লগীয়া উক্ত অভিযানকাৰী দলটোত অংশ ল’বলগীয়া ঋতুৰাজ উত্তৰ-পূবৰ একমাত্ৰ সদস্য।

এই উদ্দেশ্যে আজি গুৱাহাটীৰ পৰা নৰৱেৰ উদ্দেশ্যে যাত্ৰা আৰম্ভ কৰিলে ঋতুৰাজ ফুকনে। নৰৱেৰ পৰা ১৫ জুনত বিশ্বৰ বিভিন্ন প্ৰান্তৰ পৰা অহা গৱেষকৰ দলৰ সৈতে তেওঁ সুমেৰু অভিমুখে অভিযান আৰম্ভ কৰিব। ১০ জুলাইত অভিযান সামৰি তেওঁ অসম আহি পাবহি।

উল্লেখযোগ্য যে ঋতুৰাজ ফুকন গ্ৰীন গাৰ্ড (Green gaurd) নামৰ পৰিৱেশ সংস্থাৰ সৈতে জৰিত। আজি দিচপুৰ প্ৰেচ ক্লাবত ৰাজ্য চৰকাৰৰ হৈ বন আৰু পৰিবেশ মন্ত্ৰী পৰিমল শুক্লপদ্যই তেওঁক এই যাত্ৰাৰ বাবে শুভেচ্ছা জনাই অভিযানৰ ফ্লেগ অফ কৰে।

ঋতুৰাজে জনোৱা মতে উক্ত অভিযানত ৰবাৰ্ট স্বান, বাৰ্নি স্বানৰ দৰে বিশিষ্ট অভিযানকাৰীৰ লগতে বহু কেইগৰাকী আন্তঃৰাষ্ট্ৰীয় বতৰ বিজ্ঞানীয়ে অংশ ল’ব।