অসমৰ মুখ্যমন্ত্ৰী হিমন্ত বিশ্ব শৰ্মা নেতৃত্বাধীন বিজেপি চৰকাৰে বিগত দুটা মাহত আঁচনিভুক্ত কৰ্মচাৰীসকলৰ মাননি বৃদ্ধি সংক্ৰান্তত তিনিটা ঘোষণা কৰিছে৷ প্ৰথম ঘোষণা ১০ জুন, ২০২৫ ত, ৰাষ্ট্ৰীয় স্বাস্থ্য মিছন (NHM)ত তৃণমূলৰ সেৱাকৰ্তা ‘আশা’ সকলৰ বাবে মাত্ৰ এহেজাৰ টকা বৃদ্ধিৰ ঘোষণা৷ দ্বিতীয় ঘোষণা ২২ জুন, ২০২৫- ত মধ্যাহ্ন ভোজন আঁচনিত কৰ্মৰত ৰন্ধন কৰ্মচাৰীসকলৰ বাবে মাত্ৰ ৫০০টকা বৃদ্ধিৰ ঘোষণা৷ তৃতীয় ঘোষণা ১০ জুলাই ২০২৫ ত আই চি ডি এছৰ তৃণমূলৰ কৰ্মচাৰী অংগনৱাড়ী কৰ্মীলৈ ১৫০০ টকা আৰু সহায়িকালৈ ৭৫০ টকা বৃদ্ধিৰ ঘোষণা৷ এই বৃদ্ধি অতি নগণ্য আৰু এই ঘোষণা প্ৰবঞ্চনামূলক৷
নিত্য ব্যৱহায্য সকলো সামগ্ৰীৰ অবাধ দাম বৃদ্ধি চলি থকাৰ সময়ত মাত্ৰ ২০০০-৪০০০ টকাৰে এগৰাকী কৰ্মচাৰীক জীৱন নিৰ্বাহ কৰিবলৈ দিয়াটো চৰকাৰখনৰ দায়িত্বহীনতাৰ বহিঃপ্ৰকাশ মাত্ৰ৷ অসমত দিনহাজিৰা ভিত্তিত কাম কৰি থকা লোকসকলেও ৬০০ টকাৰ তলত কাম নকৰে৷ তেনেসময়ত চৰকাৰে একোগৰাকী মহিলা কৰ্মচাৰীক মাত্ৰ ২৬৬ টকাৰ তলত হাজিৰা দি কামত খটুৱাব বিচাৰিছে৷
উল্লেখযোগ্য এই তিনিওখন আঁচনি কেন্দ্ৰীয় চৰকাৰৰ ধ্বজাবাহী (Flagship)আঁচনি৷ অসমত এই আঁচনিত কৰ্মৰত বৰ্তমান কৰ্মচাৰী ২লাখ ৬২ হেজাৰ৷ (অংগনৱাড়ী-১ লাখ ২১ হাজাৰ, ৰন্ধন কৰ্মচাৰী ১লাখ ২২জহাজাৰ আৰু আশা ৩৩ হেজাৰ৷) তিনিওখন আঁচনিত কৰ্মৰত কৰ্মচাৰীসকলৰ ইউনিয়নে অসম চৰকাৰৰ পৰা পোৱা উদগনিমূলক মাননি (incentives) কমেও দহ হেজাৰ টকাৰ দাবী কৰি আছিল৷ অসম চৰকাৰে এনে দাবীবোৰ সন্দৰ্ভত বিচাৰ বিবেচনা কৰি চৰকাৰক পৰামৰ্শ দিবলৈ সংশ্লিষ্ট বিভাগৰ মন্ত্ৰী অজন্তা নেওগক অধ্যক্ষা হিচাপে লৈ এখন কেবিনেট উপসমিতিও গঠন কৰি দিছিল৷ এই কেবিনেট উপসমিতিৰ ওচৰতো উল্লেখিত কৰ্মচাৰী সংগঠনবোৰে সাক্ষ্যদান কৰিছিল আৰু আৱেদনো জনাইছিল যাতে কেন্দ্ৰ ৰাজ্য উভয় চৰকাৰ মিলি অন্ততঃ দহ হাজাৰ টকা মাহিলি মাননি পোৱাৰ ব্যৱস্থা কৰে৷
বিজেপি দলৰ নিৰ্বাচনী প্ৰতিশ্ৰুতি, মুখ্যমন্ত্ৰীৰ বিভিন্ন ঠাইত দিয়া ভাষণ, কেবিনেট উপসমিতি গঠন কাৰ্য সকলো এতিয়া ভেকোভাওনাত পৰিণত হ’ল৷ অতি সামান্য মাননিৰ ধন বঢ়াই দি চৰকাৰে বাঃ বাঃ ল’ব বিচাৰিছে৷ যি সময়ত কেন্দ্ৰীয় চৰকাৰৰ দ্বাৰা গঠিত ভাৰতীয় শ্ৰম সন্মিলনৰ ৪৫ আৰু ৪৬ সংখ্যক বৈঠকৰ অনুমোদন অনুসৰি এইসকল কৰ্মচাৰীক ন্যূনতম মজুৰি আইনৰ আওতালৈ আনি ন্যূনতম মজুৰি প্ৰদান কৰিব লাগে সেইসময়ত বিজেপি চৰকাৰে উপযুক্ত মাননিৰ ধন কেইটামানো বৃদ্ধি কৰাত অপাৰগতা প্ৰকাশ কৰি আছে৷ চৰকাৰৰ এই ভূমিকা অতিশয় নিন্দনীয়৷ ভাৰতৰ কমিউনিষ্ট পাৰ্টি (মাক্সৰ্বাদী)ৰ ১০-১১ জুলাইত অনুষ্ঠিত অসম ৰাজ্যিক কমিটিৰ সভাই আঁচনিভুক্ত কৰ্মচাৰীৰ প্ৰতি অসম চৰকাৰৰ চৰম বঞ্চনাক গৰিহণা দিয়ে আৰু তাৎক্ষণিকভাৱে উল্লিখিত ঘোষণাবোৰ পুনৰ বিবেচনাৰ দাবী জনাইছে৷
