কোকৰাঝাৰত আছাম ষ্টেট পাৱাৰ ৱৰ্কাৰ্ছ ইউনিয়নৰ কৰ্মচাৰীয়ে আজি দুই ঘন্টীয়া ধৰ্ণা কাৰ্যসূচী ৰূপায়ণ কৰে। কোকৰাঝাৰ বিজুলী কাৰ্যালয় চৌহদত পুৱা ১০-০০ বজাৰ পৰা দুপৰীয়া ১২-০০ বজালৈ অনুষ্ঠিত দুই ঘন্টীয়া অৱস্থান ধৰ্মঘটত সকলো কৰ্মচাৰীয়ে ক’লা বেজ পৰিধান কৰি ধৰ্মঘটত অংশগ্ৰহণ কৰে।
বিশেষকৈ ৰাজ্যত স্ব-নিৰ্ভৰশীল বিদ্যুৎ ব্যৱস্থা গঢ়ি তোলা, বিদ্যুৎ কৰ্মচাৰীৰ দৰমহা সংশোধনী ২০১৬ৰ আসোঁৱাহসমূহ দূৰ কৰা, আইটিআই /স্কিলড এমপ্লয়ী দ্বিতীয় গ্ৰেড কৰ্মচাৰী গ্ৰেডপে, বইলাৰ এটেণ্ড গ্ৰেড-২ (Boiler attend grade -2)(কনিষ্ঠ) সম পৰ্যায়ত কৰা, একেদৰে আইটিআই/ স্কিলড গ্ৰেড-১ কৰ্মী গ্ৰেড পে’ৰ (Boiler attend grade -1) সম পৰ্যায়ত কৰা, বিল ক্লাৰ্ক আৰু মিটাৰ ৰীডাৰৰ পদ দুটাৰ একত্ৰিকৰণ বন্ধ কৰি পূৰ্বৰ দৰে বেলেগ বেলেগ কৰি ৰখা, অস্থায়ী কৰ্মীৰ চাকৰিত স্বচ্ছ আৰু নিকা প্ৰক্ৰিয়াৰে নিযুক্তি দিয়াৰ ব্যৱস্থা কৰা আৰু অতি কমেও পাঁচটা পদোন্নতি নিশ্চিত কৰা আদিকে ধৰি মুঠ ১৮টা দাবীৰে ধৰ্ণা কাৰ্যসূচী ৰূপায়ণ কৰে।
কৰ্মচাৰী সকলে উক্ত সমস্যাৰ সমাধান বিচাৰি ৰাজ্যৰ বিদ্যুত বিভাগৰ মন্ত্ৰী তথা চৰকাৰৰ সৈতে বাৰম্বাৰ আলোচনা কৰি অহা সত্বেও চৰকাৰে কোনো গুৰুত্ব নিদিয়াৰ ফলত কৰ্মচাৰী সন্থাই ধাৰাবাহিকভাৱে আন্দোলনৰ কাৰ্যসূচী ৰূপায়ণৰ সিদ্ধান্ত গ্ৰহণ কৰিছে। তাৰেই অংশ হিচাপে আজি ৰাজ্য জুৰি বিজুলী কাৰ্যালয়ত দুঘন্টীয়া ধৰ্ণা কাৰ্যসূচী ৰূপায়ণ কৰা হয়।
তাৰোপৰি আগন্তুক দিনত ধাৰাবাহিকভাৱে অহা ১১ নৱেম্বৰত বিজুলীৰ মহাপ্ৰৱন্ধক তথা উপ মহাপ্ৰৱন্ধক কাৰ্যালয়ত পুৱা ১০-০০ বজাৰ পৰা ১২-০০ বজালৈকে দুই ঘন্টীয়া অনশন, ১৬ নৱেম্বৰত নিজৰ নিজৰ কৰ্মস্থলীত উপস্থিত হৈ নিজৰ কৰ্মৰ পৰা বিৰত থাকি ২৪ ঘন্টীয়া প্ৰতিবাদ সাব্যস্ত কৰা, ২৮ নৱেম্বৰত ৰাতিপুৱা ৬-০০ বজাৰ পৰা ৪৮ ঘন্টীয়া কৰ্মবিৰতি পালন কৰা, ১১ ডিচেম্বৰৰ ৰাতিপুৱা ৬-০০ বজাৰ পৰা ৪৮ ঘন্টীয়া ধৰ্মঘট আৰু পৰৱৰ্তী ৭২ ঘন্টীয়া ধৰ্মঘট আদি আন্দোলনৰ কাৰ্যসূচী পালন কৰা হব বুলি সংবাদ মাধ্যমৰ যোগেদি চৰকাৰলৈ জনাই দিয়ে কৰ্মচাৰী সন্থাৰ সভাপতি স্বম্ভু মুখাৰ্জীয়ে।
