ৰাজ্যৰ পৰ্যটন ক্ষেত্ৰত বৃহৎ পৰিৱৰ্তনৰ সম্ভাৱনাৰ সৃষ্টি কৰি বিশ্ববেংকে ৮০০ কোটি টকাৰ পুঁজি যোগান ধৰাটো প্ৰায় নিশ্চিত হৈছে।
এই কথা জানিবলৈ দিছে পৰ্যটন মন্ত্ৰী চন্দন ব্ৰহ্মই। বিশ্ববেংকৰ এই বৃহৎ পৰিমাণৰ পুঁজিৰে পৰ্য্যটন খণ্ডৰ বিকাশ সাধন কৰিব পৰা যাব বুলি মন্ত্ৰীজনে জানিবলৈ দিয়ে।
উল্লেখযোগ্য যে বিশ্ববেংকৰ প্ৰতিনিধিয়ে ৰাজ্যখন ভ্ৰমণ কৰাৰ পিছতে এই সুখবৰটো ৰাজহুৱা কৰে বিভাগীয় মন্ত্ৰীজনে।
এই পুঁজিৰে ব্ৰহ্মপুত্ৰত পৰ্য্যটকৰ বাবে নৌকাবিহাৰ, মাজুলীৰ নিৰ্বাচিত পৰ্য্যটন সম্ভাৱনাময় ক্ষেত্ৰবোৰৰ বিকাশ আৰু অন্যান্য পৰ্য্যটন স্থানৰ বিকাশ সাধন কৰা হ’ব।
বিশ্ববেংকৰ প্ৰতিনিধিকেইজনৰ সৈতে অসম পৰ্য্যটন নিগমৰ মন্ত্ৰী-বিষয়াই মিলিত হোৱাৰ পিছত বিশ্ববেংকৰ পৰা এই পুঁজি লাভ কৰাটো নিশ্চিত হয় বুলি মন্ত্ৰীজনে সংবাদ মাধ্যমৰ আগত কয়।
আনহাতে মন্ত্ৰীজনে কয় যে বিশ্ববেংকৰ প্ৰতিনিধি কেইজনমান অহা মাহত দহদিনৰ বাবে অসমৰ ক্ষেত্ৰ অধ্যয়ন কৰিবলৈ অসমলৈ আহিব।
মন্ত্ৰী ব্ৰহ্মই দাবী কৰে যে এই পুঁজিৰ বিনিয়োগৰ ফলত পৰ্য্যটন ক্ষেত্ৰখনৰ বিকাশ হোৱাৰ লগতে স্থানীয় নিবনুৱাৰো সংস্থাপনৰ বাট মুকলি হ’ব।
