এতিয়াও বিশ্বকাপ ফুটবলত অংশগ্ৰহণৰ যোগ্যতা অৰ্জনৰ বাবে সংগ্ৰাম কৰি থাকিবলগীয়া হোৱা ভাৰতীয় ফুটবলক বিশ্বকাপৰ মজিয়ালৈ আগবঢ়াই নিয়াৰ বাবে ফুটবলৰ ঘৰ স্পেইনত গোপনে অনুশীলন অব্যাহত ৰাখিছে অসম সন্তান তথা ভাৰতৰ প্ৰতিভাৱান ফুটবলাৰ কবীৰ বৰুৱা নাথে।
১৯৩২ চনতে স্থাপন হোৱা স্পেইনৰ প্ৰসিদ্ধ ফুটবল ক্লাৱ চি ডি অলিম্পিক ডি জাটিভালৈ প্ৰথমগৰাকী ভাৰতীয় ফুটবলাৰ হিচাপে নিৰ্বাচিত হৈছে কবীৰ বৰুৱা নাথে।
১৮ বৰ্ষীয় তাৰকা ফুটবলাৰ গৰাকীক অসামান্য ড্ৰিবলিং, বলৰ ওপৰত থকা নিয়ন্ত্ৰণ আৰু গ’ল কৰাৰ ক্ষমতাৰ বাবে এগৰাকী বিশ্বমানৰ ফুটবলাৰত পৰিণত কৰিছে।
উল্লেখযোগ্য যে, বিশ্বৰ বিভিন্ন স্থানৰ পৰা বাছি উলিওৱা ৩৫ জন ফুটবলাৰৰ ভিতৰৰ পৰা মাত্ৰ তিনিজন ফুটবলাৰক স্পেইনৰ মূল ক্লাৱটোৰ হৈ খেলিবলৈ নিৰ্বাচিত কৰা হৈছে।
বিশ্বৰ আগশাৰীৰৰ ফুটবল খেলা দেশ সমূহৰ খেলুৱৈক নিজৰ প্ৰতিভাৰে পৰাস্ত কৰি অসমৰ খেলুৱৈ কবীৰে স্পেইনৰ ক্লাৱটোৰ হৈ বিশ্বমানৰ ফুটবলাৰৰ সৈতে খেলিবলৈ সুযোগ লাভ কৰে।
লক্ষ্যণীয় কথাটো হ’ল ভাৰতীয় ফুটবলত দীৰ্ঘদিনৰ পৰা তাৰকা ষ্ট্ৰাইকাৰ আৰু মিডফিল্ডাৰৰ অভাৱ অনুভৱ হৈ আহিছে। পূৰ্বে বাইচুং ভূটীয়া আৰু বৰ্তমান সুনীল ছেত্ৰীয়ে কিছু পৰিমানে সেই অভাৱ পুৰণ কৰিবলৈ সক্ষম হৈছে যদিও সেয়া বিশ্বকাপৰ দৰে প্ৰতিযোগিতাত দলক উপনীত কৰোৱাৰ বাবে পৰ্য্যাপ্ত নহয়।
সতীৰ্থৰ সহযোগিতাৰ অভাৱত প্ৰতিভা থাকিও দেশক বিশ্বকাপলৈ লৈ যাব নোৱাৰিলে বাইচুং আৰু সুনীলে। এতিয়া অধিনায়ক সুনীল ছেত্ৰীৰো বয়স হৈছে।
আশাকৰা হৈছে ইনিয়েষ্টা, ডেভিদ ভিল্লা, ৰেমোছৰ দেশত ফুটবলৰ আধুনিক শৈলীৰে পৈনত হৈ আহি অসমৰ কবীৰে অনাগত দিনত ভাৰতীয় ফুটবলৰ গুৰি ধৰিব।
কবীৰ বৰুৱা নাথৰ ঘৰ অসমৰ যোৰহাটত। তেওঁৰ পিতৃ ডাঃ কল্পজিৎ নাথ আৰু মাতৃ ডাঃ গীতাৰাণী বুৰৱা।
অসমৰ খেলুৱৈ গৰাকীৰ সফলতাই সমগ্ৰ দেশত খলকনি লগোৱাৰ সময়তে সমূহ অসমবাসী ৰাইজে তেওঁলৈ শুভেচ্ছা জ্ঞাপন কৰিছে।
