কৰ’নাৰ সংহাৰ! গুৰুগ্ৰামত অসমীয়া যুৱক অংশুমান ভূঞাৰ কোভিড-১৯ত মৃত্যু
গোটেই দেশতে এতিয়া কৰ’নাৰ ভয়াবহ সংক্ৰমণৰ বিভীষিকাই ছানি ধৰিছে। ইয়াৰ ফলত দৈনিক প্ৰাণ হেৰুৱাবলগীয়া হৈছে বহু লোকে।
ইতিমধ্যে দিল্লীত বহুকেইজন অসমীয়াই কোভিড-১৯ৰ সংহাৰৰ বলি হৈছে। ইয়াৰ মাজতে হাৰিয়ানাৰ গুৰুগ্ৰামত অংশুমান ভূঞা নামৰ এজন অসমীয়া যুৱকে কোভিড-১৯ত প্ৰাণ হেৰুৱালে।
কোভিড-১৯ আক্ৰান্ত হৈ গুৰুগ্ৰামৰ এখন ব্যক্তিগত চিকিৎসালয়ত চিকিৎসাধীন হৈ থকা ৩০ বছৰীয়া অংশুমান ভূঞাৰ বৃহস্পতিবাৰে মৃত্যু হয়।
উল্লেখ্য যে কেইদিনমান পূৰ্বে অংশুমানৰ পিতৃ মৃদুল ভূঞাও কোভিড-১৯ত আক্ৰান্ত হৈ মৃত্যুক সাৱটি লৈছিল।
মৃদুল ভূঞা পাৱাৰগ্ৰীডৰ মহাপ্ৰৱন্ধক হিচাপে কৰ্মৰত আছিল। তেওঁ গুৰগাঁৱৰ আছাম এছ’চিয়েশ্যনৰ প্ৰতিষ্ঠাপক সভাপতিও আছিল।
মৃত্যুৰ সময়ত অংশুমানে তেওঁৰ মাতৃ আশালতা ভূঞা আৰু ভগ্নী আকাংক্ষা ভূঞাক এৰি থৈ গৈছে।
কৰ’নাৰ কৰাল গ্ৰাসত এনেদৰে পিতৃ আৰু পুত্ৰই প্ৰাণ হেৰুওৱাৰ ঘটনাই গুৰুগ্ৰামৰ অসমীয়া সমাজ তথা দিল্লীৰ আছাম ছচাইটিৰ লগতে পৰিচিত মহলক মৰ্মাহত কৰি তুলিছে।