কৰোনাৰ ত্ৰাসত সন্ত্ৰস্ত অসমত মংগলবাৰে নিশা প্ৰথমগৰাকী ব্লেক ফাংগ’ছ ৰোগীৰ ধৰা পৰিছে।
এক সূত্ৰৰ মতে মংগলবাৰে নিশা গুৱাহাটী মহানগৰীৰ এপল’ হাস্পতালত চিকিৎসাধীন হৈ থকা কোভিড১৯ত আক্ৰান্ত এগৰাকী ২৭ বছৰীয়া যুৱকৰ শৰীৰত ব্লেক ফাংগ’ছ ভাইৰাছৰ উপস্থিতি ধৰা পৰিছে।
হাস্পতালৰ সূত্ৰই প্ৰকাশ কৰা অনুসৰি দুদিনৰ পূৰ্বে কোবিড আক্ৰান্ত যুৱকজনক এপল’ হাস্পতালত ভৰ্তি কৰোৱা হৈছিল।
যুৱকজনৰ শৰীৰত ব্লেক ফাংগ’ছ মিউক’ৰ্মাইকোচিছ ভাইৰাছ বিধ ক’ৰ পৰা সংক্ৰমিত হ’ল এতিয়ালৈকে জানিব পৰা হোৱা নাই।
আনহাতে ব্লেক ফাংগ’ছ আক্ৰান্ত হোৱা যুৱকজনৰ স্বাস্থ্য বৰ্তমান সুস্থিৰ হৈ আছে বুলি জনাইছে চিকিৎসালয়খনৰ এক সূত্ৰই।
দেশৰ ৰোগ নিয়ন্ত্ৰণ আৰু প্ৰতিৰোধ কেন্দ্ৰই প্ৰকাশ কৰা মতে এই মিউক’ৰ্মাইকোচিছ ব্লেক ফাংগ’ছ ভাইৰাছে বিশেষকৈ মাটি আৰু ক্ষয় যোৱা জৈৱিক পদাৰ্থ, যেনে পাত, পচন সাৰৰ স্তূপ বা পচা কাঠ আদিত বাস কৰে।
ভাইৰাছ বিধে নাক, মুখ আৰু কটা ঘাৰেদি মানুহৰ শৰীৰত প্ৰৱেশ কৰি ৰোগ প্ৰতিৰোধ ক্ষমতা হ্ৰাস পোৱা লোকক প্ৰধানত আক্ৰমণ কৰে।
কিডনী, ডাইবেটিছ, কেঞ্চাৰ আদি ৰোগত ভুগি শৰীৰৰ ৰোগ প্ৰতিৰোধ ক্ষমতা হ্ৰাস হোৱা লোকক এই ভাইৰাছ বিধে অধিকতৰ ভাৱে আক্ৰমণ কৰে বুলি জানিব পৰা গৈছে।
স্বাস্থ্য বিশেষজ্ঞসকলৰ মতে ভাইৰাছবিধ হাওঁফাও, মগজু, চকু, চাইনাছ আদিত সংক্ৰমিত হয়। হাওঁফাওত সংক্ৰমণ ঘটিলে উশাহত কষ্ট পোৱাৰ লগতে মগজুত সংক্ৰমিত হ’লে চকু আক্ৰান্ত হৈ ৰোগীয়ে দৃষ্টি শক্তি হেৰুওৱাৰ উপক্ৰম হয়। ভাইৰাবিধ সংক্ৰমিত হোৱাৰ প্ৰাথমিক অৱস্থাত ধৰা পৰিলে ৰোগীয়ে আৰোগ্য লাভ কৰে বুলিও প্ৰকাশ কৰিছে স্বাস্থ্য বিশেষজ্ঞসকলে।
“যেতিয়া ৰোগী এজনক অক্সিজেন দিয়া হয়, আৰ্দ্ৰ কন্টেইনাৰৰ পৰা এই ভাইৰাছ সংক্ৰমণ হোৱাৰ সম্ভাৱনা বৃদ্ধি পায়। এইটো নিশ্চিত কৰিব লাগে যে হিউমিডিফায়াৰৰ পৰা যাতে পানী নিগৰি নাযায়,” চৰকাৰী এক পৰামৰ্শত এইদৰে কোৱা হৈছে।
ভাৰতত কোভিড নিগেটিভ হোৱা কিছু ৰোগী ব্লেক ফাংগ’ছত আক্ৰান্ত হোৱা দেখা গৈছে। চিকিৎসকৰ মতে এই ৰোগৰ পৰা আৰোগ্য হাৰৰ হৈছে প্ৰায় ৫০ শতাংশ।
প্ৰথাৱস্থাত ভাইৰাছবিধ সংক্ৰমিত হোৱা ধৰা পৰিলে চিকিৎসাৰ দ্বাৰা আৰোগ্য লাভ কৰাতো প্ৰায় নিশ্চিত বুলিও প্ৰকাশ কৰিছে স্বাস্থ্য বিশেষজ্ঞসকলে।
